تێکەڵی و ئامێتەی بیەی ژیوەنی ئێمەمانا و ژیوگەی نەبڕیا و نەپڕچیا بیەن و هەن، چا سەرەوەختەنە ئێمە و ژیوگە تخوونێ یەکترینی نەکەوتیمێوە ئێتر ئانە هەروەرەنە و وارە بە وارە مەرگ و نەمەنای بۆ بە پشکەما!!.
ئارۆ ڕۆ بوورژوازی پەی هۆرگێرتەی قازانجی و لیکم کەردٚەی باخەلاش جە زەڕی بەزەیش نمەیوە ژیوگەیەرە و بەداخەوە فرەتەر جە گردٚ زەمانیوی خەریکوو تێکدای و شێونای ژیوگەیا و ژیوگە دەسشەوە زەرێڵا،ئینە بیەن نوونگەو فەتووت بیەی سرووشتی و هەرپاسە بێ هاز و بێ ڕۆح بیەی ژیوای کۆمەڵگا بەشەریەکا.
ئێنسان خەریکوو وشک کەردٚەی دەریاکا،بڕیای درەختەکا،جادٚە کێشای دلێ بوومە وێ ڕسەکا،ئەرەمەرزنای کۆمپانیاکا و بە تەشک و دیامانیوی گردٚین ماشینی کەردٚەی ژیوایشا،گەورەتەرین بەر و ئاکاموو ئی هەرمانێچشە ئاسنین کەردٚەی و تەوەنین کەردٚەی زێڵۆ کۆمەڵگاکان.
متاڤمێ واچمێ چی ڕاچەنە تا حەننایوی فرە سەرکەوتە بیەن،ئیسە ئێتر کەم کەس هەن پەرسۆوە وێش وەروو چێشی ئێنسان مشیۆم بەروبووموو وێش تێک دۆ تا یانێوی زلتەر،بازاریوی ورشەدار و ......ش بۆ؟!
وەروو چێشی و وەروو چ دەسکەوتیوی مشیۆم پێوەزیش چنی ژیوگەی پڕچنۆ و سامڵسایی کەرۆ خەڵاتوو پرزێ دماڕۆیش؟!.
بێ هیچ شکێوە ئا زەمانە مەی ڤەرەڤە کۆمەڵگا ئێنسانەکێ و دەوڵەتە بێ چەم و ڕوەکێ سەرەرە وسێ هەرمانێ ئیسەیشا باوە بەڵام ئا وەختە دێرا و فرەو چێوا دەسەنە شیێنێ.
بە وەشحاڵیەوە ئینە سەرێڤوو وەرێسەکێن و هەنێ ئا ئێنسانە گەشاوەزێ،ئا ڕێکڤزیا خەڵکیێ و ئا کۆماڵە ژیوەگە دۆسێ کە ئی پەڕ تا ئەو پەڕوو دنیای بە دڵیوی وەرهەڵا،ویریوی ترۆق کەردٚە و زێڵێوە پاک و پۆختێ وەراوەر پی هەرمانە ناشیرینا مدراینێ و چەم نەتەرسانە سەوزێنێ و سەوز مدراینێ پاوە!!.
ئی بنیادٚمە وێ ویەردٚێ یاواینێنە ئێژایی ژیوگەی و سرووشتی و چەپەوانەو ویری باوی، زەمینی هینوو گردٚ گیانداریوی مزانا و چن حەق مدٚا بە ژیوای درەختیوی ئاننەیچە حەق مدٚا ئێنسانی و بە ئەشرەفوو مەخلووقاتی مەزاناش کە ئاغە بۆ و تێڵاش ئاویەنە گێڵۆ!!
هەورامانیچ چی ئێنسانە ژیرا و چی کۆماڵە وێ ویەردٚا بێ بەش نەبیەن و نیا.
گردٚ وەڵاتێو بە تایبەتمەندیێوشەوە مژناسیۆ و هەورامان بە دیمەنی وەش،دڵگیر و سێحراویشەوە.وەڵاتێو کە بەهەشتیوی گولالەن جە ڕۆ زەمینی و چ وەش مامۆسا گۆران لاڤنۆشەوە و ماچۆ:
سیاچەمانە سیاچەمانە
بەهەشتی عەشقە ئەم هەورامانە
چننێ ساڵێن هەورامانیچ کەوتەن وەروو هڕووموو کۆمەڵگای بە نامێ مۆدێڕنی و ژیوگەش هەروەرەنە خەریکا تێک بشۆ.چی هڕوومەنە:
 مڵکێ کریا بە یانێ و ساختمانێ
دەرێ و دەرەکڵێ کۆرێ باوە و جادٚە کیشیۆ
درەختێ بڕیا و چاگەنە دیواروو یانەی منریۆ
تاڵانیوی سەمەرە،بێ وێنە و بێ ئەوەئامای!!
بەڵام وەشبەختانە بڕێو هەورامیێ ژیرێ پێسەو ویەردٚەی بریقەداریشا هەر یاگێوە دالێو خاک شکە بەرا کەراش مڵک و درەختێش چنە منیا و سەوزش کەرا.
ئادٚێ تایبە چی دە پانزە ساڵەنە کە شێونای ژیوگەی یاوان ئەوپەڕوو تاوانوو وێش بە هەڵمەتێ
 نەمام نیای و ئاو داریشا
ئاییرەوە کۆشنای کەشەکا
شەخەڵەوە ماشای دلێ سەیرانگاکا
فێرکەردٚەی هاموەڵاتیەکا و زیتەوە کەردٚەیشا
تا ڕادیوی فرە ناستەنشا نیشینگەو ژیرلا نەدٚامەت بەی ملشەرە.
هەرچن ئا هەرمانێ سەرەوە نامێما بەردٚێ گردٚ بێجگەم ئێنسانە گەورا کەس مەتاڤۆ تخوونشا گنۆ  بەڵام پاسە بزانوو نەمام نیای و درۆسنایشا چەویشا هەمیەت دارتەرێنێ چووک ئەوێ وەرگیری کەردٚەیا جە تاوانی و ئێدٚ وەش کەردٚەیا و هەمیشە وەش کەردٚەی سەخڵەتیش فرەتەرا.
نیای، درۆسنای و پنەیاونای نەمامیوی یانێو ئەرەکەردٚەی کەلەبەرێو ڕوو بە دنیایوی گەشتەری و کەسانێو ئی هەرمانێشا چنە مەی کە خاس یاوای بانە فەلسەفەو ژیوای و زانابۆشا ژیوەنی یانێو سەوزی،سەوز کەردٚەی و درۆسنای پەی دماڕۆی نەک ژیوایوی بێ هایە و مایە و واردٚەی و وتەی!!.
هەڵمەتوو بەڵوو نیای بەنامێ زاگرۆسانەی چن مەکین و وەش بی نوونگەو یۆگیری جوانەکاو وەڵاتی و نەمام نیای جە سەرکەشە سەربەرزەکانە.
هەرمانێوە کە چی دە ساڵەنە وەروو گڕ گێرتەی کەشەکاما و سۆتەی درەختەکاما فرە پنەوازە بێ.
ئی هەڵمەتێ شاروو نۆدشەیچەنە پێسەو فرە یاگەکاو نیشتمانی بریا ڕاوە و فرە جوانخاس سینەو کەشەکاشا بە نیای و درۆسنای نەمامەکا ڕەنگینتەر کەردٚ،هەر ئینە بی بە تۆ گێرتەی ئامیانەویرێو دلێ مەژگوو ڕاوەبەراو کەمپەینوو پارێزی.
کەمپەینوو پارێزی گرمەو نەوەشی پیسوو کرۆنایەنە بە دەسوو ویربەرزاو شاروو نۆدشەی و بە نوونگەو پارێزنای خەڵکی جە نێگبەتوو نەوەشیەکەی مەرزیارە و شۆنیچشەرە هەر بەردەوام تا ئیسە بە دڵیوی ئەوەکریا و ویریوی گەشەوە لوان پێوای گێچەڵەکاو خەڵکوو نۆدشەیوە.
پارێز پەی پارێزنای کەش و کۆ وەڵاتیچ قۆڵێ هەرماناش هۆرکەردٚێ و پووزەوانێ خیرەتیش هۆرکێشتێ،چی ماوەنە دایمە پەی ئایر کەوتە کتوپڕەکا حازر بیەن و وێ بەخشانە ئەندامە ئازیزەکێش لواینێ ئایرەوە کۆشنای.
ویرێوتەر کە بەڕاسی بی بە هەرمانێوە گەورێ و دیارە نەمام نیای بێ
ئادٚیچ چا یاگێ گێڵیاریێنە کە گردٚوو خەڵکوو نۆدشەی لای کەمەوە حەفتێو کەڕەتێو سەرش مدٚۆ ڤنە و دامنەو کەشی وەشیشەنە پەی لەحازێوە مسیۆوە،ملەگاو باڕامی تا مەحموودٚی سەرەواڵا.ئا یاگێ هەرچن یاگێو گێڵای بیێنە بەڵام تا ئیسە هیچ ڕێکڤزیایێڤی وەرپەرس لاش نەکەردٚەنەوە لاش تا ئەندامێ چنەئامای و ژیرێ کەمپەینوو پارێزی پەی درۆسنای تۆموو وەشەویسی و وەڵات پارێزی بە شێویوی زانستی‌ جە سیاوکاموو ساڵەو 1399ی ڕۆجیاری نەمامە تفیشا نیای.
چننێ ڕوێ خەریکێ بیێ تا چاڵی کنیای،نەمامێ نریای.
پەی ئانەیە حەیوانێ نەمامەکا نەکرۆچا یەکەم جار دەورشا فەنسشا تەنا دماتەر واتشا با وێمانە دەورشا تەنمێ و داواشا جە جوانا و تارسەمەندٚا کەردٚە جە هەڵمەتێوەنە بلا بلچی پاچا و دەوروو نەمامەکا پەڕچین کەرا کە وەشبەختانە فرەو خەڵکیچ لوای یاردٚیشا و دەورشا پەرچین کریا.
نەمام نیای لایێڤ ئاو دارایش لایێڤ.ئەندامێ پارێزی فرە جە ئاو دارەکەینە مانیاییشا کێشا،تا ماوێوی فرە گردٚ حەفتێو جارێو بە تانکێرە ئاویشا دارێنێ، نۆدشەنە تانکێرە ئاوی گۆزێنێ و بە شڵێنگ ئاوی دارێنێ تا ویروو چار کەردٚەی ئا گێچەڵێچشا کەردٚ،ئادٚێ زانێنێ هەم کەڕەتێ ئاو داراکەی فرێ با و هەمیچ مەکریۆ گردٚجارێو بە تانکێرە ئاوی بەرا پەی یاگەکێ چووک خەرجوو ئامەشۆکەی و مانیاکەیش فرەن پەوکای یاگەکێشا پیما و 430مێترێ لوولێ پۆلی ئێتیلینەشا جە یۆ جە خاستەرین کارخانەکاو وەرنیشتوو ئێرانی ئەسا و بە یاوەری ڕاوەبەروو مەردٚەشۆرخانەی چاگەنە ئاویشا بە شڵێنگ کێشا پەی یاگەکێ.ڕاکێشا گردٚ بە بێڵ مێکانیکی هۆرکڵاشا،شڵێنگەکەشا کەردٚ چێرەوە و پەی هەمیشەی لوولەکەشیشا کەردٚ.ئیسە ئاودارەیچشا ڕەحەت بیەنەوە و ها خەریکا درەختەکێ گردٚ سەوزێ بیێنێ و دیمەنیوی جوانخاسشا کەردٚەن خەڵاتوو ڕاویارا و گێڵیارا.
دڵنیانا چانەیە دماڕۆیوی نزیکەنە ئا یاگێ وەروو ئی هەرمانە ژیرانێ بۆ بە یاگێوێ بەهەشتیە پەی نۆدشەشاری و هەورامانی و وەڵاتی.
هەرچن کارێ چێمنێ بە هیچ زوانێڤ عەوەزاشا مەدٚریۆوە و خامە مەتاڤۆ وەراوەر پا هەرمانێ ئانە ئێژان بنویسۆش و بیاڤنۆش بەڵام دماینەنە پێسەو نۆدشیێڤی به ئەرکوو سەروو شانەیم مزانووش ئەوپەڕوو سپاس و پنەزانای وێم پێشکەشوو ئازیزا و خەمەوەراو کەمپەینوو پارێزوو شاروو نۆدشەی کەروو کە بە دڵیوی وەرهەڵا،ئاوەزیوی گەش و لێریوی پۆڵایین سەوزی و سەوز بیەیشا کەردٚ نزانی نیشتمانی.

ئاواتەوازەنا دەلاقەو ویری گەشیتانە دنیا پیڤیۆ پەی کۆمەڵگای و تەشابی ئاوەزیتانە وەرەشێڵەو ڕۆجیاروو حەوت ئاسمانەی گنۆ بوومیما.
 نموونەتا فرە بۆ و ڕاتا پەڕ ڕاویارە بۆ.

نۋیسەر: ئۆمید حەبیبی

سەرچەمە/ پاوەپرێس