دیدارو "ئەدەب و کولتووری هەورامانی" ئەنجام دریا

جە هەڵەبجە بەشداریێۋی فرەی جەماوەری، ئەرەمەرزیاو (کەریم عەلکە)ی دوەمین دیدارو "ئەدەب و کولتووری هەورامانی" ساز کەرد کە تایەت بۍ بە مامسا (جەمال بێدار)ی نۋیسیار و زۋانزانی.

ڕۊو شەممەی، جە مینۆمێنتو شەهیدانو شارو هەڵەبجە-ی سەر بە پانیشتو کوردستانی، ئەرەمەرزیاو (کەریم عەلکە)ی دوەمین دیدارو "ئەدەب و کولتووری هەورامانی" ساز کەرد. ئێساڵ دیدارەکە تایبەت بێ بە مامسا (جەمال بێدار)ی نۋیسیار و زۋانزانی.
دیدارەکە بە پشتیوانی دارایی (د. تەها ڕەسوڵ)ی و سەرپەرشتی شاخەوان سدیق-ی و هامکاری سوهەیب ڤاروق-ی شاعیری، ئەنجام بریا ڕاوە و جە میانشەنە چنڎین نۋیسەرۍ ئەکادیمیسەنۍ و شارەزۍ و ئەدەبدۆستۍ و کلتور دۆستۍ هەم جە پانیشتو کوردستانی و هەم جە وەراسانو کوردستانی بە بابەتۍ و پەیجۆرۍ بەشدارۍ بیۍ.
هەرپاسە و وەزیرو ڕۆشنۋیری حەمەو حەمەسەعید-ی و پارێزگارو هەڵەبجەی و جەماوەرێۋی فرە ئامادۍ دیدارەکەی بیۍ.

جە دیدارەکەنە ئی بابەتۍ و پەیجۆرۍ قسۍ و باسێشان سەر کریۍ:

١- پەیوەندیی میانو "زۋانی و زار و شێوەزار"ی کوردی، گۆرانی، هەورامی بە نموونە.. دکتۆر بێستوون حەسەن.. ماسا جە زانشتاگاو سلێمانیۍ.

٢-شۆڕشە ڕۆشنگەرییەکەو هەورامانی.. حەمەکەریم هەورامی/ نۋیسەر.

٣- هۆرسەنگنای جوگرافیی پەی دەرامەتو ئاۋۍ جە هەورامانەنە و ڕۆڵش جە ڤیاری گەشتیارییەنە.. ڕێباز لوقمان مستەفا/ مسیارو دکتۆرای.

٤- ئەۋەوانیێۋ پەی داستانو یوسف و زوڵێخا-ی.. لوقمان کەریم/ ماستەر جە ئەدەبیاتو زانشتگاو سنەی.

٥- شیعرۍ خانەقایی و سەرنجێۋ.. هۊمایۊن ساحێب/ نۋیسەر و پەیجۆرکار.

٦- ڕەوتوو شیعرۍ نۊو هەورامیۍ..سابیری عەزیزی/ نۋیسەر و شاعیر.

٧- گەشەی ئەوەمەنە و بوومی و ڕەسەن.. ئازاد ئەمینی/ پەیجۆرکار.

٨-پێوەنو شیعرۍ و مۆسیقای.. ئەرشەد یامەولا/پەیجۆرکار، هونەرمەند و موزیسیەن.


٩-کاریگەریی فیلمی دۆکیۆمێنتەری سەرو گلێرگەو هەورامانی.. پەروێزی ڕوستەمی/ بەرئاۋەری سینەمایی و سینەماکار.

١٠-چەنی زۋانەکەیمان پارێزنمۍ؟.. جەلیل عەباسی/ نۋسەر و پەیجۆرکار و شاعیر.

هەرپاسە جەماوەری بەشدار بە سەرنج و پەیواکانشان دوەمین ”دیدارو ئەدەب و کولتووری هەورامانی"شان دەوڵەمەند تەر کەرد.

هەرپاسە چنڎین خەڵاتۍ بەخشیۍ بە مامسا جەمال بێداری و چنڎ کەسایا تەرۍ دیدارەکەی.