کەرنەڤاڵوو نەورۊزوو ئێساڵوو ھۊرامانېنە ڕێزگێرتێوە قابلانە پۍ "مامۊسا حەمەحسێن کێمنەیی" ڕێک وزیۊ.

کەرنەڤاڵو نەورۊزو ھۊرامانی ڕۊو دووەشەممەی ٢٠/٣/٢٠٢٣ۍ سەعات 3ۍ دمانېمەڕۊی جە مەنتېقەو سێدارانوو ئەحمەڎئاواینە ملۊڕاوە.

ماڵپەڕو ھۊراماننېوزی پەیکەرێۋە بەقابل پۍ مامۊساو سېاچەمانە و ھونەروو ڕەسەنوو ھۊرامانی مامۊسا" حەمەحسێن کێمنەیی" ۋەش کەرۊنە و جە شارۊچکەو خورماڵینە نریۊرە.

"گڵوۍ ئاڵتوونېیەو سیاچەمانەینە و زیاڎ جە هەشتا سیاچەماناش چڕیێنێ"

یاگۍ واتەینە هونەرمەنڎی نامە بریا، عومرش ئېنا سەڎ ساڵێنە، خزمەتۍ گەورەی فەرهەنگیی هەورامېیانەیش کەرڎەن، بەشێوە فرەو بەزم و گۊرانییەکاش بیێنی بە مۊرەی تایبەتەو وێش و بە نامۍ وێشۊ مشناسیاوە پێسە "قیبلێم بارش کەرڎ، سەلە سەلە، بەزموو کەڵەکا،ھەوری لەمل، مێۋە دەیمیەکۍ" و چنڎین بەزما تەری، کە جە چارەکوو دمایی سەڎەی ویەرڎەینە چەنی هونەرمەنڎا " عوسمان کێمنەیی، شەفێع کێمنەیی، جەمېل نەوسوڎیی" مەکتەبێوە هونەری هەورامییانەشا بە دەنگوو وێشا مەرزنارە و ڕێبازە هونەرییەکە بە نامۍ "برایاو کێمنەی"یۊ ئشناسیا.

"خانەواڎێۋە هونەریش بەخشێنۍ بە هونەروو هەورامانی"

کێمنەیی جگە خزمەتە تایبەتەکاش گۊرانیواتەینە و هامشانوو برایاو کێمنەی،هاموەخت چەنی "عوسمان هەورامی جەمیل نەوسووڎۍ و وێش" یەرەکوچکەو گۊرانییە هەورامییاناشا هەن و بییەن بە ۋەڵېنگێۋە ئاڵتوونی، ئینە جگە ئانەی دوۋۍ کوڕۍ هونەرمەندێش بە نامەکا " سیروان خالدی، دڵسۊز خالدی" بەخشێنۍ بە قافڵەو هونەروو هەورامانی و نەوەکێش ئیسەنە ڕێکۍ تاتەیشانە ئارۊیانە ملا.

"مۊرەو وێش نېێنە هونەروو هەورامانیوە"

کێمنەیی دیمە هونەرییەکەش ئاننە باڵادەسا تەماموو پلەو قۊناغەکا هونەری هەورامینە یاوان ئەوسەر جگە چانەی گۊرانیێ"سیاچەمانۍ، دەرەیۍ، شێخانۍ، ورڎەبەزمۍ، چەپڵۍ " و چنڎی تەرێش واتێنۍ بڕێچشانە ئارڎەینە "داهێنان"ش کەرڎەن و مۊرەو وێش دێنەش هونەروو هەورامانیوە و سەرڎەمێوەن بە "مامۊسا حەمە حسێن کێمنەیی" نامیەن.

ھ.ش