جە وەرکەوتو کوردستانی پەشتیوانی جە (زارا محەمەدی)ێ کریا

جە وەرکەوت (ڕۆژاڤا)و کوردستانی چەنڎین ڕێکوزیێ پەشتیوانیشان جە (زارا محەمەدی)ێ و وانای بە زوانی ئەڎایی کەرد.

کاروەدایەکێ وەرانوەر بە زیندانی کەردەی چالاکوانە و فێرکارەو زوانی کوردی (زارا مەحەمەدی)ێ بەردەوامێنێ. پەیوەست بە ئانەیە جە رۆژئاواو کوردستانی چالاکی ئەنجام دریا. جە چالاکییەکەنە کە بە ئامانجو پەشتیوانی جە مافو وانای بە زوانی ئەڎایی و ئازادکەردەی زارا مەحەمەدیێ ڕێکوزیابێ، پەنج رێکوزیێ ژەناو ئا بەشەو ووڵاتێ (سارا، ڕەنگ، ژەناو رۆژئاوای، ستێرک و زوانی ئەدایی) بەشدارێش بیێ.
بەشداربییەکێ جە وەردەمو بارەگاو نەتەوەیۆگێرتەکانی جە شارو قامشلۆی کۆبیێوە و بەتنڎی زیندانیکەردەی (زارا مەحەمەدی)ێشان جەلاو دەسەڵاتدارانو ئێرانیەوە شەرمەزار کەرد.
 ژەناو رۆژئاوای یاداشتێوشان دا بە نەتەوەیۆگێرتەکان کە جە میانشەنە ئامابێ: ئێمە داواکارێ ئازادی سەرجەم ئا ژەنانمێ کە جە ئێران و تورکیەنە سەرو بابەتو زوانی ئەدایی قۆڵبەسێ و زیندانیێ کرینێ، بەتایبەتی چالاکوانە و فێرکارەو زوانی کوردی (زارا مەحەمەدی)ـە.
جە چالاکیەکەنە ئارەزو تەمۆ، ئەندامە جە رێکوزیاو سارای قسێش کەردێ و واتش: زوانو کوردی پێسەو گردو زوانەکاو تەری چوون: عەرەبی، فارسی و تورکی ئا مافەش هەن تا پەنەش بوانیۆن و بنویسیۆن و بەفەرمی بوزیۆنە پڕۆگرامو پەروەردەی و فێرکاری و بارئاوردەی.