ئەمڕۆ نووسینگەی یاسایی سەدە ڕاگەیەندراوێکی سەبارەت بە گۆشەگیریی ڕەهای سەر ڕێبەری گەلی کورد، عەبدوڵا ئۆجالان بڵاوکردەوە و ڕایگەیاند: بۆ شکاندنی گۆشەگیریی ئیمرالیی، سەردانی دەیان دەزگای پەیوەندیداری ناوخۆیی و نێودەوڵەتییان کردووە، بەڵام سەرجەمیان بێ ئەنجام ماونەتەوە.

لە بەشێكی تری ڕاگەیەنراوەكەدا ئاماژە بەوەش کراوە، کە پچڕینی پەیوەندیی زیندانیی لەگەڵ پارێزەر و خانەوادەکانیان، پێچەوانەی یاسا نێودەوڵەتییەکانە، بەڵام ماوەی ٢٠ مانگە هیچ زانیارییەک لەسەر ڕێبەر ئۆجالان و سێ زیندانییەکەی دیکەی ئیمرالی، وەرنەگیراوە.

نووسینگەکە تیشکی خستووەتە سەر سەردانەکەی سی پی تی لە مانگی سەپتەمبەر (ئەیلوولی)ی ئەمساڵدا بۆ ئیمرالی و ڕایگەیاندووە: بەرپرسانی سی پی تی، لەسەر ڕەوشی بریگرتەکەمان، بچووکترین زانیارییمان پێنادەن و وەڵامی پرسیارەکانمان نادەنەوە.

هەر لە ڕاگەیەندراوەکەدا هاتووە: ئێمە ڕۆژی ١٣ی ئۆکتۆبەر لەگەڵ سی پی تی کۆبووینەوە، بەرپرسانی سی پی تی تەنیا پێیانوتین، کە ئەوان ڕاپۆرتێک ئامادە دەکەن و پێشکەشی تورکیای دەکەن، ئەگەر تورکیا پەسەندی بکات، ئەوا بۆ ڕای گشتیی بڵاودەکەنەوە.

نووسینگەی یاسایی سەدە ئاشکراشی کردووە: بیستوومانە، کە لەکاتی سەردانی سی پی تی بۆ ئیمرالی، بەڕێز ئۆجالان ڕەتیکردووەتەوە چاوی پێیان بکەوێت، لەکاتی کۆبوونەوەشمان لەگەڵ سی پی تی، زانیارییەکی پێچەوانەی ئەوە پشتڕاست نەکرایەوە.

لە بەشێكی تری ڕاگەیەنراوەكەدا هاتووە: لەدوای سەردانەکەی سی پی تی و کۆبوونەوەکەی ئێمە لەگەڵیان، گومانی زیاترمان لەسەر دۆخی ئیمرالی بۆ دروستبووە و دەبێت سی پی تی، لەپێناو لەدەستنەدانی بەهای ڕێکخراوەیی خۆی و پاراستنی یاسا نێودەوڵەتییەکان، زانیاریی سەبارەت بەو سەردانە بڵاوبکاتەوە.

جێگای ئاماژەیە، دوایین جار لە ٣ی مارسی ٢٠٢٠، خانەوادەی زیندانیانی ئیمرالی ڕێگایان پێدراوە سەردانی دەستگیرکراوان بکەن. لە ٢٥ی مارسی ٢٠٢١-یشدا، بۆ یەکەم جار ڕێگا بە پەیوەندیی تەلەفۆنیی درا و چەند خولەکێکی کەم ڕێبەر ئۆجالان لەگەڵ محەمەد ئۆجالانی برای قسەیکرد، لەدوای ئەو پەیوەندییەوە، هیچ زانیارییەک سەبارەت بە دۆخی ڕێبەر ئۆجالان و سێ زیندانییەکەی دیکەی ئیمرالی، بڵاونەبووەتەوە.

ف.ق