کۆمسیۆنو فەرهەنگی پلاتفۆرمو هۆرام-ی بە بۆنەو کۆچی دمایی هونەرمەند”جافر زەلکەیی“ پەیامو سەرەوەشیشدان و ئاشکراش کەرەدەن: هۆرامان هەرگیز ئا هونەرمەندە و خزمەتە هونەرەیەکاش جە ویر نمەکەرۆن.
دمابەدمای ئانەی هونەرمەند”جافر زەلکەیی“ جە مەریونن جە ڤیەرێوی هاوشیێنە گیانش جەدەستدا، کۆمسیۆنو فەرهەنگی پلاتفۆرمو هۆرام-ی بە ئا بۆنەوە پەیامێوی سەرەوەشیشدا.
هۆرام جە پەیامەکەنە سەرەڕاو سەروەشی، جەپاو خزمەتە هونەریەکاش بە موزیک و هونەرو هۆرامانی ستایشو کچکەردەیش کەردەن و دەستنیشانش کەردەن: هۆرامان هەرگیز ئا هونەرمەندە و خزمەتە هونەرەیەکاش جە ویر نمەکەرۆ.
تەمامی پەیامەسەروەشیەکەو کۆمسیۆنو فەرهەنگی پلاتفۆرمو هۆرام-ی:
بە بۆنەو کۆچ و نابەوەختوو هۆنەرمەند و شمشاڵژەنوو هەرێموو هۆرامانی ، هونەرمەند جافر زەلکەیی
خەڵو وەشەویسو هۆرامانی بەگردی و بە تایبەت خانەوادە ، کەسوکار و یانەوادە و هۆنەرمەندێ هۆرامانی و وەرکەوتو کوردستانی، هەر پاسە ئاگادارێندێ ڕۆو ٢٤و کۆپری وەرانوەر بە ١٦ جووڵاو ٢٠٢١ی هەواڵو گیان جەدەستداو هونەرمەند و شمشاڵژەنو هەرێمو هۆرامانی و کوردەواری کاک جافر محەمەدی زەلکەیی ڤیەرو ماشینی وەڵاوبیەوە. پسەو کۆمسیۆنو فەرهەنگی پلاتفۆرمو هۆرام-ی کە هەمیشە پاڵپەشتو هونەرمەندا و کەلتور و نەتەوەکەیمان بیەن و هەن، مەرگ و هونەرمەندو وەشەویسو گەلەکەیما بەگردی و هۆرامانی بەتیبەتی کاک جافر زەلکەیی خەمبارێ کەردیمێ. ئی کۆستە گەورەیە بە کۆست و وێما مزانمێ . سەرەراو سەرەوەشی جە خانەوادە و کەسوکارو کۆچکەردەی، هیواو سەبووری و سڵاماتیشا پەی موازمێ.
مشیۆم ئا ڕاسیەیە باس بکەرمێ کە جە دماو کۆچو هۆنەرمەند قاڵە مەڕەی، کاک جافر بە وێش و شمشاڵەکێش ناستش یۆ جە هونەرە کۆنەکاو کوردەواری چراوەش کزە بۆنە. بەڵام بەداخەوە بە هۆو تەسادفی کاک جافر جە تەمەنێنە جیاش ئاستیمێ کە هێشتا هونەر و کەڵلتورو کوردەواری پنەوازیش بەساز و دەنگو شمشاڵەکێش بێ .
جوون کۆمسیۆنو فەرهەنگی پلاتفۆرمو هۆرام-ی، هیواما ئانەن کە جە زووتەرین وەختەنە بتاومێ ئاسارە هونەریەکاش بە شێوەی سەردەمیانە پەی نەوەکاو دماو ڕۆی کۆبکەرمێوە و پارێزنمشا و بەیاد کەردەیش، نامێش پەی هەمیشە زینڎێ بازمێوە . دڵنیەنمێ خەڵکو هۆرامانی تا هونەرشا مەنۆنە، دەنگو شمشاڵەکەو هۆنەرمەند جافر زەلکەیی فەرامۆش نمەکەرا.
کۆمسیۆنو فەرهەنگی پلاتفۆرمو هۆرام-ی
