جمیەروو کولتوور و هونەروو دیموکراتیکی (تەڤ-چاند) جە پڕۊژەو هەرمانگەو سینەمێنە، کە سەرمەشقا، کۊمۊنوو فیلموو سینەمۍ، شانۊیی کەشی و سینەشانۊ بەچالاکانە هەرمانەکا بەرۊ ڕاوە. کۊمۊنوو سینەمۍ و شانۊی سەر بە تەڤ- چاندی پێسە گرڎ جارێوە، پەی ئی پڕۊژەیچە حەوڵەکیش وستێنۍ هەرمانە.

وانەکاو هەرمانگەو سینەمێ: تاریخوو سینەمۍ، وانای فیلمی، دەنگ، کورد و سینەمای شۊڕشگێڵییە، دیکۊر، ڕێژی، ڕۊشنایی، مۊنتاژ و بەرئارڎەی"نۍ. خەباتکاراو کولتوور و هونەری "شێرۊ هند، هاشم ئایدەمیر، نوعمان ییگیت، دیرۊک ئارتۊس و ئەکین ڕۊنی" وانەکا ماچاوە.

داواکاری پەی نامەنویستەی هەرمانگەکەنە  ٢٣ۍ ئاداریوە دەسش پەنە کەرڎەن. عومروو فێروازا مشۊم بەینوو ١٦-٢٥ ساڵانە بۊ. ئا کەسۍ کە نامۍ منویسا، چەمپەنەکەوتەیشا چەنی کریۊ و شەرتەیچ نییەنە کە وەڵتەر مەجالەکێنە بیێبا. لە پەروەرڎەنە ئانە گرنگا حەز و ئارەزوون پەی مەجالەکۍ. ٨وو نیسانی دەس بە کارگەکەی کریۊ و ماوەو ٤٥ ڕوا خواینۊ.

دماو تەمامیای خولەکەی بڕوانامە بە تەلەبەکا دریۊ، تەلەبە خاسۍ و عارەزوومەنڎەکۍ متاوا بەشڎارۍ کۊمۊنوو فیلموو وەرنیشتینە با. یاگۍ هەرمانگەکەی قامیشلۊن، وەلۍ شارەکای تەریچۊ فێروازۍ بەشڎارۍ با.

تەلەبەکۍ دماو بەشڎاری جە پەروەرڎەکەینە، بەشڎارۍ جە پڕۊژەو بەرهەمئارڎەی کوڵەفیلمینە کەرا، کە هامنۍ دەس بە هەرمانەو ڕسمگێرتەیشا کریۊ.

چی ساڵە دمایینانە فیلمۍ فرۍ بەری کریێنۍ، کۊمۊنوو فیلموو وەرنیشتی ١٤و تەمووزوو ساڵەو ٢٠١٥ینە ئەرەمەرزیا و سەرمەشق و خەباتۍ فرەی هونەرییش کەرڎەن. فیلمەکاو پەی ئازادی و کۊبانۍ، زنجیرە دراماکاو ئەڤینوو کوردی و وەرەتاوی سووریچشا تۊمار کەرڎێنۍ. پەی وەڵێوەبەرڎەی هونەری هەوڵۍ فرێشا دێنۍ. جە ماوەو هەشت ساڵی ویەرڎەینە، چنڎین دەورۍ پەروەرڎەی لاو کۊمۊنوو فیلموو وەرنیشتیوە کریێنێوە.

هەرمانگەو سینەمۍ، کە قۊناغوو وەڵۍ ئەکادیمیاو کولتوور و هونەرین، سینەماکارۍ یاونۊ پەنە پەی دماڕۊو ئا ئاکادیمیایە. ئەکادیمیاو گەشمەرڎە "یەکتا"ی کە لاو تەڤ-چاندیوە کر و یانۊماوەو دووۍ ساڵان هەرمانۍ پەروەرڎەیۍ کولتووریۍ کەرۊ. فرەو ئا گەنجا چا ئەکادیمیانە پەروەرڎۍ بیێنۍ، جە چالاکییەکاو تەڤ-چاندینە  وەررنیشتنە، جە خەباتەکاو کولتووری و هونەرینە دەوری خاس گێڵنا. بەتایبەتی جە فیلموو "پەی ئازادی، کۊبانۍ و زنجیرە دراماکاو ئەڤینوو کوردی و وەرەتاوی سوور"ینە دەورشا بییەن.

س.ز