ژنانی شەنگال: بۆپاراستنی خاک، چیاکان و منداڵەکانمان بەرخۆدان دەکەین

ژنانی شەنگال لە دژی هەڕەشەكانی دەوڵەتی تورک و حکومەتی عێراق، ڕاگەیەنراوێکیان بڵاو کردەوە و دەستنیشانیانکرد کە هەتا دوا هەناسە بەرخۆدان دەكەن ‌و منداڵان و خاك ‌و چیاکانی خۆیان، دەپارێزن.

ئەنجومەنی خۆبەڕێوبەریی شەنگال، لەگەڵ نوێنەرانی یەبەشە و یەژەشە، ئاسایشی ئێزدخان، پادێ و تاژێ‌، ڕێکخراوەکانی کۆمەڵگەی مەدەنی لە شەنگال و پیرانی هەرێمەکە، كۆبوونەوە ‌و بڕیاریان دا، بەرخۆدان بكەن بۆ پاراستنی دەستکەوتەکانی ئێزدخان.

دوای كۆبوونەوە فراوانەكە، تەڤگەری ئازادیی ژنانی ئێزدی (تاژێ‌)، كۆبوونەوەیەكی تایبەتی ساز كرد ‌و جەختی كردەوە كە لەبەرامبەر هەموو هەڕەشەكانی سەر شەنگال، دەوەستنەوە ‌و بەیاننامەیەكیان لەوبارەیەوە بڵاو كردەوە كە لەلایەن سیهام شەنگالی، خوێنرایەوە.

 لە بەیاننامەكەی تاژێدا هاتبوو: “ئێمە وەک ژنانی ئێزدی، تا کۆتایی خاکی خۆمان دەپارێزین ‌و بەرەنگاری هەڕەشە ‌و هێرشەكان دەبینەوە.

ئاماژەی بەوەیش كردوە: “لە دوای ئەوەی شەنگال لەلایەن گەریلاکانی ئازادیی كوردستانەوە، ئازاد کرا، ئێمە دەزگا و دامەزراوەی مەدەنی ‌و خۆبەڕێوەبەریی دیموکراتیکی خۆمان دامەزراندوە ‌و کارەکەمان لەسەر بنەمای شەنگالێکی سەربەخۆ بوە كە لە بەرژەوەندیی وڵاتان نەبوو، بۆیە كەوتنە پیلانگێران لە دژی.

تاژێ‌، باسیش لەوە دەكات، “لەم دواییانەدا سوپای عێراق داوا دەکات، چیا پیرۆزەکانمان ببەزێنن و هێزمان لەو شوێنانە دابڕن”، بۆیە جەختیش دەكاتەوە لەوەی، “ئێمە ئەو هەڵوێستانە و دابەشبوونی ڕێکخستن و ئیرادەی شەنگال، شەرمەزار دەکەین ‌و چیاكانی شەنگال، پیرۆزن و شوێنی پاراستنی ئێمەن و قبوڵی ناكەین دوژمنان دەستیان پێیان بگات.

لە كۆتاییدا، تاژێ‌ داوا لە حکومەتی عێراق دەكات، هێرش و هەڕەشەکانی ڕابگرێت، بەڵام دەڵێت: ” ئەگەر ئەوان سووربن لەسەر هەڕەشەكانیان، ئەوا ئێمەش چەک هەڵدەگرین و پێکەوە شەڕ دەکەین بۆ پاراستنی خاک و چیاکانمان.

ک-ش