ڕۆژنامەی "دەیلی تەلگراف"ی بەریتانی هەواڵێکی بڵاوکردووەتەوە دەربارەی ئەوەی کە حکومەتی بەریتانیا بەنیازە لە کاردانەوەی نیشان بدات لەهەمبەردەستبەسەرداگرتنی کەشتییە نەوت هەڵگرەکەی لەلایەن ئێرانەوە و بە نیازە سزای ئەو وڵاتە بدات.

ڕۆژنامەکە ئاماژەی بەوەداوە، کە ئەگەری زۆر هەیە ئەمڕۆ جرمی هانت، وەزیری دەرەوەی بەریتانیا ئەو گەمارۆ ئابوورییە و کردەوە دیپلۆماتیانە دژی ئێران ڕابگەیەنێت.

لە هەواڵەکەدا ئاماژە بەوەشکراوە کە پێدەچێت بەریتانیا داوا لە نەتەوە یەکگرتووەکان و یەکێتی ئەوروپا بکات، کە گەمارۆکانی سەرڕژیمی ئێران لە پێش ڕێککەوتنە ئەتۆمییەکە جارێکتر بگەڕێنێتەوە و بیانخاتەوە گەڕ.

بەریتانیا دوێنێ سکاڵای دژی ڕژیمی ئێران پێشکەشی ئەنجومەنی ئاسایشی نەتەوەیەکگرتووەکان کردووە و لەسکاڵاکەیدا جەختی لەوەکردووەتەوە کە کەشتییە نەوتبەرەکەی لە ئاوە نیشتمانیەکانی وڵاتی عومان دەستی بەسەردا گیراوە و ئەم کارەی ئێران بە 'دەستێوەردانی نایاسایی' ناوبردووە.

هەر دوێنێ ڕێکخراوی هاوپەیمانیی(ناتۆ)، لە ڕاگەیەندراوێکدا دەستبەسەرداگرتنی ئەو کەشتییەی ئیدانە کرد و بە پێشلکاری ئازادیی کەشتیوانی نێودەوڵەتی ناوی برد، داواشی لە ئێران کردووە کە هەرچی زووە ئەو کەشتییە ئازاد بکات.

ک.ش