سپاو پارسدارانو ئێرانی جە هەرێمەکێ هەورامان، چلچەمە و برادۆست-ی پڕۆژەی سیخوڕیش دژ بە پژاک-ی و گەریلای و لایەنە نەیارەکێ تەرێ بەنامێ (ئەمنیەت کوهستان - ئاسایشو کویسانی) وەگەڕ وستەن و پایەگایێ و بنکێ تازێ دروستێ مەکەرۆنە.
ماوێوەن هامتەریب چەنی هێرشە ئەرەگێرەکێ ڕژێمو تورکیا جە پانیشت(باشور) و وەرنیشت (ڕۆژافا)و کوردستانی، ڕژێمو ئێرانی جە وەرهۆرز (ڕۆژهەڵات)و کوردستانی جموجوڵێ و کەردە سەربازیێ و سیخۆڕیەکێش دژ بە پژاک-ی و گەریلاکێ یەرەکە-ی بەتایبەتی و پارت و لایەنە نەیارەکێ تەرێ بەگشتی وەگەڕ وستەن.
بە پاو هەواڵێوی کە هۆرام ئنفۆ (Horam.info)ی وەڵاو کەردەنەوە، جە نەورۆزو ١٣٩٩ وەرەتاوی وەرانوەر بە ٢١-٣-٢٠٢٠ بە ئامانجو کۆنترۆڵ کەردەی جموجوڵ و ئاستەنگ کەردەی هێزەنەیارەکانش بەتایبەتی پژاک و گەریلاکێ یەرەکە-ی، سپا پرۆژێوی نوش بەنامێ ( ئەمنیەت کوهستان - ئاسایشو کویسانی) بە شێوەی تایبەت دەسپەنە کەردەن.
سپاو پاسدارانی جە پرۆژەکەشەنە سەرەراو بەکاربەردەی پەهبادی جاسوسی (باڵەپڕی بێباڵەپڕوانی سیخوڕی)، چێروو نامێ پارێزەرانو ژیوگەی و سروشتی، گەشتیار و کەشەوانی-یەنە کەسانێوی فرێش ڕێکێوستێنێ کە ئەرکشان جەم کەردەیی زانیارین سەبارەت بە گەریلا و جومووڵەکانش و ئا کەسە وڵاتپارێزێ کە هەمیاری و هامکاریشان مەکەرانێ. جە ئی چوارچێوەنە ڕوانە هەر کەسێوی بەکرێگیریا ٨٠ هەزار تمەنێ مووچەش پەی بڕیانەوە.
پاوە سەر بە هەورامانی، سەقز سەر بە پارێزگاو سنە-ی و شارو ئورمیە-ی پێسەو ناوەندێ سەرەکیێ ئی پڕۆژەیە دەستنیشانێ کریێنێ.
هەر پەیوەست بە هەمان پڕۆژەی، جە دوێ هەفتێ ویەردێنە جە هەورامان، مەریوان، چلچەمە، دیواندەرە و برادۆست ڕژێم بنکێ و پایەگایێ تازێش دروستێ کەردێنێ.
چەنڎ ڕوێ وەڵتەر (یەرەکە - YRK)، سەبارەت بە جموجوڵەکێ هێزە چەکدارەکێ ئێرانی زانیاریش دابێ و کوشتەی ٣ پاسدارێ و برینداربیەی ١ پاسداری تەریش ئاشکرا کەردەبێ.
(یەرەکە - YRK) جە بەیاننامێوەنە ئەرەیاونابێش: "هێزەکێمان جە ۵ مانگەو مەی وەرانوەر بە ١٦ پاژەرەژو ١٣٩٩ وەرتاوی کە بە مەبەستو رێکوستەی گەلی ناوچەکەنە بێنێ، جە دەگاو نەرگسڵەی چەنی هێزەکانو سەر بە رژێمی دەرگیرێ بێیەنی و جە ئاکامشەنە ٣ پاسدارێ پلە بەرزێ کوشێنێ و ١ پاسداری تەریچ بریندار بییەن و گەریلاکێمان بێزیان و سڵامەتێ بیێنێ و ئا سەرچەمێ ڕژێمیە پڕوپاگەندێشان کەردێنێ کە گوایا هەڤاڵێمان جە دەرگیریەکەنە شەهیدێ و بریندارێ بیێنێ، دورێنێ جە ڕاستیەوە و بێبنەمێنێ".
(یەرەکە - YRK) دەستنیشانش کەردەبێ: "با گرد کەس و لایەنێ ئاگادارێ بانێ هیچ هێرش و کەردێوە دژمان بەبێ وەڵام نمەبۆنە و هەر کەسی دەستش جە شەهیدکەردەو هەڤاڵامانە بۆنە با چەمەڕواو سزادای وێش ببۆنە".
(یەرەکە - YRK) نامێ ٣ پاسدارە پلە بەرزە کوشیێکێ ڕژێمیش بە ئی جۆرە ئاشکرێ کەردێ بێنێ:
شەکیبا سەلیمی فەرماندەو فەیلەقو شارامفەری سەر بە سپاو سنە-ی
جەعفەر نیزام پوور ئەرکدار جە ئیتلاعاتو سپای
حمد شەکەری ئەرکدار جە ئیتلاعاتو سپای
