بە بۆنەو ١٥ مەی یا ٢٦ پاژەرەژی کە پێسەو ڕۆو یەسنە (جەژنە)و زوانی کوردی دەستنیشان کریان، زانستگاو ڕۆژاڤاو کوردستانی جە شارو قامشلۆی هەورامی پەیامێوی پیرۆزباییش وەڵاو کەردەنەوە و جە میانشەنە زاونش بە (نەخشیاو ویری، باغو گۆرانیا و هونەری و شناسنامەو گەلی) بەنامێ کەردەن.

تەمامی پەیامەکەی:

یەسنەو زوانی کوردی مۆبارەکە بۆنە:

زوان ئا ویرەنە کە پسۆ ئامیانێ بە بەرکەوتەیش بیەن بە دەنگ و ڕەستەو واتەی. زوان نەخشیاو ویرەکان. زوان باغو گۆرانیا و هۆنەریا. زوان هلیانەو ویەردەینە. پۆچی گرد گەل و نیشتەگایێوە بە زوانوو وێش مژناسیۆوە. هەر پۆکەی زوان بییەی و شناسنامەن.

زوانوو کوردی بە گردوو بەشەکاشۆ چوون ( هۆرامی، لەکی، کەلهۆری، کرمانجی، زازاکی و سۆرانی ) یون جە کۆنتەرین زوانەکا دنیای. یون  جە ئا زوانانە کە کۆنتەرین فەرهەنگو ئی دنیێەشە جە دلێ وێشەنە شارتەنەوە. سەرەراو گردوو ئا هێرشا کە پێ تاونای و فۆتنایش کریان سەرش و کریو، بەلام هەر پێسەو وێش مەنەنۆ و پارێزنای جە فەرهەنگێ دەوڵەمەنی کەرۆ و سەروو پەیاوە مدران.  

ئێمە پسۆ دەسەو ڕاوەبەری دانشگاو رۆژئاوای کە دانشگێوە کوردیا و جە دلێ گردوو ئی نەهامەتیانەو جە درەنجامو مدرامانێ تاریخی سۆز بییەنەوە، واچمێ: "بییەو ئێمە و کۆشیای پێ مەنەیۆ زوانەکەیما، بە ماناو تێکدایۆ و وڕناو ئا سیستمانە کە ئامانجشا تاوناینەوە فەرهەنگ و زوانەکان".

ئێمە ئی ڕوەیە، جە قووڵایی ویەردێوە هەر جە عەلی حەریری، بابا تاهێر، ئەحمەدی خانی و  ناڵی-یەوە هەتا جارنامەو هاوار ، گیو موکریانی و گردوو ئا کەسا کێ چی ڕێنە زەحمەتشا کێشتەن مۆبارەکبایی کەرمێ و داواما ئانەنە کە: ”با ساحێبداری جە ئامیان و بییەو زوانوو وێما کەرمێ”.