جە چوارشەمەوە تا ئیسە جە هەر چوار بەشێ کوردستانی پیرۆزبایەکێ نەورۆزی بە جۆش و خرۆش و جەماوەریانە ئەنجامێ مدریانە.
ڕۆو چوارشەممەی جە وەرهۆرز و پانیشتو کوردستانی جە سەرسەبایەوە تا دێرشەۋ جە سەرجەم شارێ، شارچێ و دەگایەکانە ئێر کریاۋە و ئامێتە چەنی هۆڕپڕای و ڕەشبەڵەکی کوردەواری نەورۆزی نەتەوەیی پیرۆز کریا.

ئارۆچ جە سەرنیشتو کوردستانی و تورکیا، سەرەڕاو ئاستەنگیێ و هەڕەشێ ڕژێمو ئەردۆغانی، جە ئامەد، قارس، دێرسیم، وان، ئاگری، بەدلیس، چەولیک، مێردین، شرنەخ، جزیرە، جۆلەمێرگ، باتمان، سێرت، سەمسور، مووش، ئەردەخان، ئەرزڕووم، مەرەش، سیواس، ئیزمیر، مێرسین، ئەدەنە، ئەنقەڕە، ستەنبوڵ و دەیان شارێ تەرێنە نەورۆزی بەبەشداری فراوانی جەماوەری پیرۆز  مەکریۆنە و مەیدانەکێ نەورۆزی فاڕیێنێ پەی مەیدانێ مدرامانی و ڕووبەرووبییەی فاشیزمی و شکستدای بە گۆشەگیری ئیمرالی کە ۲۰ ساڵێن زاڵمانە سەپیان سەرو ڕێبەر عەبدوڵا ئۆجان-یەرە. 

ئارۆ هاموەخت چەنی سەرنیشتو کوردستانی، جە قەندیل بەشداری گەلی و گەریلای ئەۋاۋەجەمی نەورۆز شکۆمندانە پیرۆز کریا.
جیا جە کوردستانی، جە بەرو وڵاتی سەدان شارێنە نەورۆز بە مەراسیمێ و ئاهەنگێ و چالاکیێ جۆربەجۆرێ پیرۆز کریا.

s.m