داستانە 'نامی'ـەکێ"شێخی سەنعان"ی، کە بە چەندین زۋانێ زیندێ جیهانی نویسیێنە و ۋەڵێ کریێنە و قسێ و باسێ و ۋنەکۆڵیێ فرێش سەر کریێنێ، ئیسە نویسەرو نامی هەورامانی و کوردستانی "نامق هەورامی" جە کارێۋی بەرئاۋردی و ۋنەکۆڵیایەنە، بە هەورامی ئامادەو چاپ و ۋەڵاکەردەیش کەردێنە.

جەی بارەۋە نامق هەورامی، بەئاژانسو هەواڵو فوڕاتیی ۋاتەن:" ئەی بەرهەمە تازەم ئەنجامو مانیای زیاتر جە ساڵێوەن کە کارم کەردەن سەرۆ ۋنەکۆڵیای و ساغکەردەی و بەرئاۋردەکەدەێش. داستانەو "شێخی سەنعان"ی بە زۋانی هەورامییەنە و کارێۋی مانیاکەر بییەن، بەڵام چەنی ئانەیە یاگێ دڵوەشیم بییەن."

هەورامی، زیاتەر جەی بارەۋە ماچۆنە:" کارەکەم بەرئاوردێۋنە سەرو مێژوو نوسیتەی داستانەو شێخی سەنعانی و دماتەر ۋەڵابییەش، ئینجا نۋیستەیش بە کوردی، بەپا دەقە مێژووییەکا یەکەم جار "فەریدەدین عەتار نیشابوری" (1146 ز- 1221 ز ) داستانەکێش بەفارسی نۋیستێنە، هەر چەندە شارەزێ بوارەکەی پەیلۋای تەرشا هەن و ماچا:"پەی یەکەم جاری جە کتێبو توحفە الملوک و "غەزالی"یەنە ( 1058ز - 1111ز ) نۋیستێنە، دلێ کوردی چەنە "فەقێ تەیران"ی ( 1590 ز -1660 ز) نۋیستێنە، هەر پاسە بە هەورامی جە سەدەو 13ی ۋەرەتاۋی نۋیسیێنە.

من  کتێبەکەمەنە ڕۆشناییم ۋستەۆ سەرو ئا بابەتەیە و ڕاڤەم کەردەن، هاموەخت، دەق و دەسنۋیسە هەورامیەکەو داستانەکێ و تێکستەکێ تەرو داستانەکێ بەکوردی دلین و  عەتاری نیشاپوریم بەفارسێ ۋەڵێ کەردێنێ."

نامق هەورامی، ۋاتەنش:" وەشبەختانە گردو هەرمانەکا کتێبەکەی تەمامیێنێ و جەی نزیکانە جە چاپخانەنە گێلۆۋە و مەگنۆنە ۋەرو دیدەو ۋنەرا. هیۋادارەنا تاۋابۆم هەرمانێۋە خاسەم پەی فەرهەنگو نەتەوەکێم کەردێ بۆ. سوپاسو گردو ئا بەڕێزا مەکەروونە کە بە واچێۋەچ بیەبۆ هاماکاریشا کەردەنا."

نامق هەورامی، ئاشکراش کەردەن:"کارش سەرو دەسنۋیسو داستانە نامیەکێ "مەم و زین"یچ کەردەن." بەڵام ئانە یاگێ سەرەسوڕمەنەیەنە، دەسنۋیسەکە هینەکەو "ئەحمەدی خانی"، گۆرە شاعرو گەلەکێما نییەن کە بە کرمانجی هۆنیانەۋە، بەڵکو تەمام بەزۋانی هەورامییەن.

نامق هەورامی، سەبارەت پانەیە ماچۆنە:" دەسنۋیسەکەو مەم و زینی بەزۋانی هەورامییەن و مێژوو دەسنۋیسەکەی پەی 172 ساڵا جەی ۋەڵتەری مەگێڵۆۋە، ساغکردەی و ۋنەکۆڵایم پەی کەردەن و ئامادەن پەی چاپی و وازیارەنا  تەمەن دەرفەتم بدۆنە ئێساڵ بە چاپش بیاۋنونە".

جە دماییەنە نامیق هەورامی واتەنش:"ئەگەر کتێبو داستانەکێ "شێخی سەنعان"ی بە هەورامی بە چاپ بیاۋۆنە، ئانە هیشتای ١٢ کتێبێ تەرێش هەنێ کە ئامادێ چاپیەنێ، داۋاکارەن جە لایەنی پەیوەندیدار و هۆگرا کتێبی، ۋێژە و ئەدەب و مێژوو کوردی،جە بەچاپ یاۋناشان هامکارێش بانە."

یاگێ باسیەنە، نامق هەورامی تا ئیسە 12 کتێبێش جە  بوارەکا، شعرێ و وێژە و مێژوو و ۋنەکۆڵیای چاپ و ۋەڵێ کەردێنە.