جە کەرکوک بە تایبەتی و ئێراق بە گشتیی، ڕژێمە داگیرکەرەکەو تورکیای بەردەۋامەن جە بە پڕاکتیزەکەردەو ئەجندا و پیلانە دژە کوردییەکانش و هەوڵ مڎۆنە سیما و مێژوو و ڕاستینە کوردییەکەو شارەکەی بشێونۆنە و گەرەکشەن پێسەو شارێۋی تورکنشینی نیشانەش بڎۆنە.
پەی پڕاکتیک-کەردەی ئانێچە، ژمارێو جە تورکومانەکێ کەرکوکیش ئەرکدارێ کەردێنێ تا جە کۆڵانێ و جادێ شارەکەیەنە دروشمێ بنۋیسانە و لافیتێ و پۆستەرێ هۆرئاۋێزنانە.
دروشمێ و لافیتێ و پۆستەرەکێ سەرشانەۋە نۋیسیان: "کەرکوک تورکومانییەن، ئاۋی و هەوا و خاک-و کەرکوکی تورکومانییەن، کەرکوک شارێۋی ئێراقییەن. با حەشدی شەعبی شارەکەنە بمانۆۋە. با پارێزگار تورکمان بۆنە. با پێشمەرگە نەگێڵۆۋە کەرکوک".

هاموەخت ڕژێمو تورکیای بەردەۋامەن جە پەڕچەک-کەردەی و مەشق پنەکەردەی تورکومانەکان و بەردەی سەدان تورکومانان پەی  تورکیای و پەروەردەکەرەیشان بە فکری فاشستی.
سەرەاو ئانەیچە، چند جارێ باڵیۆزو تورکیای جە ئێراق سەردای شارەکەیش کەردەن و شارەکەش بەشارو باۋانیش بەنامێ کەردەن و بەزۆری زۆرداری نۆژەنکەردەو بازارو (قەیسەری) شارەکەیش جە ئەستۆ گێرت و جە نۆژەنکەردەکەیەنە سیمای تورکی عوسمانی بەخشیا بە قیسەریەکەی.
هەرپاسە جە چند ساڵێ ۋیەردێنە، فرە جارێ دەسەڵاتدارێ تورکیا بە ئاشکرا کەرکوکشان بە شاری تورکی نامێ بەردەن و دژایەتی وێشان پەی کورد بییەی شارەکەی نیشانە دان.

کەرکوک و ناوچەکێش هەر جە دێرزەمانەۋە تا ئارۆچ، سەرەڕاو بەزۆر کۆچ پنەکەردەی و کوشتوبڕکەردەی خەڵکە ڕەسەنەکەیش، بەڵام فرەیی خەڵکەکەیش کوردێنێ و زیاتەر جە ٥۰٪ شارەکەی هێشتای کوردێنێ و بێجگە جە حەویجەی کە ناوچێ بەعەرەب-کریان، سەرجەم ناوچەکێ کەرکوکی هەر بە کوردنشینی مەنێنێۋە.
کەرکوک جە ۋیەردەنە ڕووبەرێ فراۋانتەرش جە ئیسەی بییەن و دوزخورماتوو، چەمچەماڵ، کفری و کەلار سەر بە ئاگەی بیێنێ و بەڵام جە پڕۆسەو بە عەرەبکەردەیەنە ڕژێموبەعشسی ئاشارێ و ناوچێشە بە هەزاران دەگایێۋە بە کەرکوکی بڕیێرە و ۋستێش سەرو پارێزگاکێ سەلاحەدین، دیالە و سلێمانیێ.