ڕژێمە فاشیست و دکتاتۆرەکەو ئەردۆغانی کە هۆکارەن پەی ئاڵۆزی و ناکۆکی و جەنگی جە کوردستان و هەرێمەکەنە بە ئاشکرا چەتێ سورێی ڕەوانەو لیبیای مەکەرۆنە و گەرەکشەن لیبیای بەدەردو سوریای ببەرۆنە.
جەی چوارچێوەنە دیدەوانی سوری پەی مافەکێ مرۆڤی ئاشکراش کەرد: "ڕژێمو تورکیا تا ئیسە سەڎان چەتێ بەکرێگیریێ سوری-ێش ڕەوانەو لیبیا-ی کەردێنێ و چەتەکێ جە تەرابولسی پایتەخت بەجا کریێنێ و دژ بە هێزەکێ جەنەراڵ حەفتەری مەجنگانێ".

دیدەوانەکە دەستنیشانش کەردەن: "تورکیا بە نیازەن هەزاران چەتێ تەرێ سوریێ ڕەوانەو لیبیای بکەرۆنە و جە ئیسەنە زیاتەر جە ۱٦۰۰ چەتێ پەیوەستێ پەروەردە و بارئاوردەی سەربازی بیێنێ تا دماتەر ڕەوانەو لیبیای بکریانێ".

دیدەوانی سوری پەی مافەکێ مرۆڤی جەی بارەوە زانیاری فرەتەرش دان و ئاشکراش کەردەن: "بە پاو ئا بەڵگە دەنگیانە کە دەستمان کەوتێنێ، تورکیا پەی ۱ چەتەی بەکرێگیریای کە ڕەوانەو لیبیا-ش مەکریۆنە مانگانە نزیک بە ۲ هەزارێ تا ۲ هەزارێ و ٥۰۰ دۆلاری پوڵ مڎۆنە و ئەگەر چەتەکە تا زیاتەر جە لیبیا بمانۆوە و جەنگێ زیاتەر بکەرۆنە ئاوەختە پوڵی زیاتەر و کرێ زیاتەرە هۆرمەگێرۆنە".