جە شارو فلۆرانس-و ئیتاڵیا-ی، هەڵمەتو 'Rîseûp 4 Rojava'ی کە ئیتالیەکێ سەرپەرشتیش مەکەرانی، بانگەوازیش پەی بایکۆتکەردەی بەرهەمی تورکی کەرد. جەی چوارچێوەوەنە ئەندامێ 'Rîseûp 4 Rojava'ی چەنڎین چالاکیێشان ئەنجامێ دێ و وەڵاوکریێ و پۆستەرێشان وەڵێکەردێوە کە ستەم و زۆردای ئەردۆغانی و ڕژێمە دکتاتۆرەکەیش و دژبەریش پەی گەلو کوردی نیشانە دێنێ.
 
چالاکگەرە ئیتالیەکێ داواشان جە ئیتالیەکان کەرد: تا بە تایبەتی بایکۆتو (یونیکرێدی بانک، کۆمپانیاو چەکیو تفاقی سەربازی لێئۆناردۆی، چۆکۆلاتەی تورکی و شیرینی ئیتاڵی فەریرۆ)ی بکەرانێ کە جە ئیتالیانە کار و بازرگانی فراواشان هەن و سودی فرەی دارایی و ئابوری بە تورکیای مەیاونانێ.

جە وەڵاوکریاکانە ئاماژە بە ئانەیە دریان "٧٠% ئا فندقەیە کە جە دروستکەردەو  (فیریرۆ)ی ئیتاڵی-یەنە بەکارمەبریۆنە تورکی-یەن و پۆکەی پنەوازەن کەس نەسانۆنەش و نەوەرۆنە. 

هەرپاسە پانکارتێ کە سەرشاوە نویسیابێ "نا پەی جەنگی، بەڵێ پەی ئاشتی، جەی سەرو ساڵێنە فەریرۆی بایکۆت بکەردێ' کوجیە و کۆڵانەکانو شاریەنە هۆرئاوێریێ.

دمابەدمای هێرشەکێ تورکیا و تاقمە چەتەکانش پەی سەرو ڕۆژاڤاو کوردستانی و کوشوبڕکەردەی مەدەایەکان، هەڵمەتێ بایکۆتکەردەی بەرهەمە تورکییەکان جە پانیشت (باشور)و کوردستانی دەستشان پنەکەرد و تا بە ئارۆ بە شێوازی فراوان بەردەوامێنێ. جە ئارۆچەنە بایکۆتەکە باشورش دەرباز کەردەن و چەنڎین وڵاتێ جیهانیش گێرتێنێوە. بایکۆتکەردەکەی سەڎان ملیۆن دۆلارێ زیانی داراییش جە تورکیای دان و ڕۆچ بە ڕۆچ زیانەکێش فرەتەرێ و زیاتەرێ مەبانێ و ئانەیچە دەسەڵاتدارێ تورکیاش هەراسانێ کەردێنێ و هەوڵ و تەقالای فرەشان دان تا بایکۆتەکە بێکاریگەر بکریۆنە وەلێ سەرکەوتێ نەبیێنێ.