جە ئێران و وەرهۆرز (ڕۆژهەڵات)و کوردستانی جە هیزی هەینییەۋە وێنیشاندای و ناڕەزایی جەماروەری  دژ بە گرانکەردەی بەنزینی دەستش پنە کەردەن و ئارۆ شەممە وێنیشاندای و ناڕەزایتیەکە فراۋانتەر بیەنەۋە و سەرجەم شارێ و شارچێ ئێرانی و وەرهۆرز (ڕۆژهەڵات)و کوردستانیش گێرتەنەۋە.
جە تاران، تەورێز، شیراز، ئەهواز، مەشهەد، ئەسپەهان، کەرج، زنجان، هەمەڎان، ڕەشت، کرمان، بەندەر عەباس، خوڕەم ئاۋا، بوشەهر و بەهبەهان و چەنڎین شارێ و شارچێ تەرێ ئێرانی و شارێ و شارەکێ وەرهۆزو کوردستانی چوون، سنە، کرماشان، ئیلام، ئورمییە، مەریوان و بانە دوروبەریشان ناڕەزایەتیەکێ بەردەۋامێنێ و بەرفرەتەرێ بیێنێۋە. هێزە ئەمنیەکێ ئێرانی دژ بە جەماۋەری ناڕازی تونڎوتیژی بەکارمەبەران و ئانەیچە ئانڎەی تەر جەماۋەری  توڕەتەر کەردەن.

سەرچەمەکێ هەۋاڵی و تۆڕە کۆمەڵایەتییەکێ جە ئێران و ڕۆژهەڵاتەۋە ئاشکراش کەردەن: "جە تونڎوتیژیەکانە دەیان کەسێ بریندارێ بینێ و دەیانی تەرێ دەستبەسەرێ و قۆڵبەستێ کریێنێ و جەماۋەر ناڕازیچ چەنڎین بانکێ و باڵەخانێ و ماشینێ حکومیێشان سۆچنێنێ".

ئامانج جە وێنیشاندای و ناڕەزایەتیەکان، گرانکەردەی بەنزین-یەن بە بڕیاو سەرەککۆمارو ئێرانی حەسەن ڕۆحانی. ڕۆحانی بانگەشەش کەردەن، گرانکەردەکەی سودش پەی چینە هەژارەکان هەن، بەڵام هاموڵاتیە ئێرانیەکێ بە پێچەۋانەۋە گرانکەردەی بەنزینی بە زیان پەی سەرجەم ئیرانیەکان بە تایبەتی پەی هەژارەکان جە قەڵەم مەڎانێ و داۋا مەکەرانێ تا هەرچی زووەن گرانکەدەی نرخو بەنزینی هۆربشنیۆۋە.

یاگێ باسکەردەیەن وێنیشاندای و ناڕەزایەتیە جەماۋەریەکێ ئێرانی جە دمای ئانەیە دەستشان پنە کەرد کە کۆمپانیاو مللی پەخشکەردەو بەرهەمە نەوتیەکانو ئا وڵاتەیە کتوپڕ و بێئاگاداری وەڵینە نرخو بەنزینی پەشتیۋانیکریای حکومیش پەی ۱۵۰۰ تومەنێ و نرخو بەنزینی ئازادیش پەی ۳۰۰۰ تومەنێ بەرزکەردەۋە.