جە هورۋچناکا تورکیایەنە، ئاکەپە دەسش بەساختەکاری مەزنی کەردەن

سەعات ۰۸:۰۰ سەرسەبای ئارۆی جە سەرتاسەرو کوردستانی سەرینی و تورکیای جە چوارچێۋەو هۆرۋچنایەکا پارلمانی و سەرۆکایەتی کۆماری، پڕۆسەو دەنگدای دەسش پنە کەرد.

ئارۆ هەر جە سەرەتا پڕۆسەو هۆرۋچنایەکا توریای،  ئاکەپە دەسش بە ساختەکاری و فشار و هەڕەشە کەردەی کەردەن و سەرەڕا ناڕەزایەتیەکا تا ئیسە کردەۋەکە بەردەۋامەن.

جە ئامەد، وان و سێرت، پسوڵەکێ دەنگدای هۆرۋچنەرا بەنایاسایی دریێنێ بە سەربازا و جەندرمەکەکا و بە هەلیکۆپەر فاڕیێنێ. ئەی کردەۋە بە پاساو ئاساییشی و پارێزنای پسوڵەکا ئەنجام دریان.

ساحتەکاری هەرە گەۆرە جە پارێزگەو ڕحای و ناوچەکاش بەتایبەتی پرسوس( سرووچ) ئەنجام دریان. بە پا زانیاریێ و دیمەنێ بەدەسۋزیێ، دەیان کەسێ جە پیاکا ئاکەپەی و ئیبراهیم خەلیل، نامزەدو ئا پارتەیە، جە پرسوس سەرجەم ناۋەندەکێ دەنگدایشا بەزۆرو بەچەک بەسەر کەردێنێ و سندوقەکێشا پەڕ جە دەنگە ساختا کەردێنێ و سەرجەم پسوڵەکێ دەنگدەراچشا چەنی وێشا بەردێنێ و پڕۆسەکەشا بەتەمامەتی پەکە ۋستەن. 

زانیا هەرکەس ۋەرگیریش جە چەتەکا ئاکەپەی کەردە بۆنە، بەچەک هەڕەشێ کوشتەیش ۋنە کریان، بەتایبەتی ئا هەڕەشێ جە ئەنداما و لایەنگرا و چەمدارا هەدەپەی کریێنێ. سەرو ئانەیە هەدەپە  و جەهەپە بەبەڵگێۋە سکاڵاش کەردەن، بەڵام تا ئیسە کۆمسیۆنو باڵا هورۋچناکا تورکیای هیچ هەڵۋێستێۋش نەرمانان.
جەهەپە و هەدەپە داۋاشا جە حکومەتی کەردە تا سنور پەی پاشێکاری و ساختکاری ئاکەپەی بنیۆرە.