”باخوو دڵی“ دوەم دیوانی شیٛعری شاعری هەورامانی ”قەیوم دانشوەر نەرۋی“ـەن و چاپ و ۋەڵا بییەنەۋە و جە کتیب ۋرەشیەکێ پاۋەی و مەریۋانی ۋەردەستەن.

پێسە شاعری وێش نۋیستەنش: "دیوانەکە جە ۱۰٥ لاپەلێ، ۷۸ هۆنیێ، ٤۲۲ بەیتێ شێعرێ، بەهیمەتەی بەرزەو (فەتحوڵڵا ڕەزایی داریانی) و (عەبدوڵڵاحەبیبی نۆدشەیی) ویرایش و پەلۋناری کریان و بە هونەرمندٚی (عەدنان مورادی پاوەیی)بەرگش پەی وەش کریان و زمسانوو ساڵەو ۱۳۹۷ی کۆچی ڕۆجیاری.جە ۋەڵاۋگەو (ئارۆ)ی جە پاۋە شار بەڕاوەبەری عەدنان مورادی، دریان چاپ و ۋەڵا کریانەۋە". 

قەیۆم دانشوەر نەروی نۋیستەنیچش: "ئینە دووەمین کتێبی شێعریمەن، یەکەم کتێبیم بە نامێ (ڕازۆ دڵی) جە۸٦ لاپەلێ، ۳۸ هۆنیێ، ۸۳۰ بەیتێ شێعرێ، هامنو ۱۳۹۳ی ڕۆجیاری بە زەحمەتو عەبدوڵڵا حەبیبی و فەتحوڵڵا ڕەزایی ویرایش و پەلۋناری کریان و جە ۋەڵاۋگەو(ئەوین)ی جە (مەریۋان) بەڕاوەبەری بەرزان حۆسەینی چاپ بی و پێشکەش کریا بە کتێبخانەو هەورامانی".

نموونێ جە شعرێ دیوانەکەی:

باخوو دڵەکەیم ڕۆو خەزانیشەن
وەختوو خەزانوو داروەزانیشەن

خەزان هجووم ئاردٚ پەی هەنار و وەز
سوەیل دان دیدٚەی نەونەمامی ڕەز

ڕەز دیدٚە ڕەشتەن بە سورمەی سوەیل
مەجنوون چەمەڕای ئامای کۆچی لەیل

یانێ های ئێڵاخ نیەن جای مەننەن
ئاڵشتە وارا تەمە داش بەننەن

(قەیۆم دانشوەر نەروی)