هیزی یەک شەممە کە جەژنەو پاکی بێ، جە سریلانکا پێسەو سەرجەم جیهانی کریستیانەکێ جە کلیسا و یەگە کردییەکان و یانەکانشانە سەرقاڵێ پەرستش، نییایشی و ئاهەنگێڵنای بێنێ. جەی وەختەنە جە ٣ کلیسێ و ٤ هۆتێلێ-نە ۸ کردێ تەرۆرستیێ و ئەۋەتەقنایێ دڕندانێ ئەنجامێ دریێ بێنێ و جە ئاکامشانە سەدان کەسێ کوشیێ و بریندارێ بیێ.
بە پاو دمایین ئاماری کە پۆلیس و وەزارەتو تەندروستی سریلانکای  ئاشکرا کردەن،  قوربانیەکێ  ٢٩٠ کوشیێ و ٥٠٠ بریندارێش دەرباز کەردەن. 
وەزارەتو بەری ئاشکراش کەردەن:  ٣٦ کەسێ جە کوشیاکان بیانیێنێ و ئاشکراش کەردەن، کە شناسنامەو ٥ هاوولاتیێ بەریتانیێ، ٣ دانیمارکیێ، ٣ هندستانییێ و ۱ پرتوگالی پەشتڕاستێ کریێنێ کە کوشیێنێ و هەوڵ و تەقەلا پەی ئاشکراکەردەی قوربانیە بیانیەکان بەردەوامەن.

پۆلیسی سریلانکی جە ۋەڵوکریێۋەنە ئاشکراش کەردەن: پەیوەست بە پەیوەست بە کەردە تەرۆرستیەکان ٢٤ کەسێشان دەستگیرێ کەردێنێ و پەیجۆری جددی دەستش پنە کریان. پۆلیس زیاری و وردەاری زیاتەرش نەدان، تەنها ئانەشە ئاشکرا کەردەن کە دەستگیرکریێکێ سەر بە تاقمە تندڕەوەکانێ.

ڕانیل ویکر مسینگە سەروەزیران سریلانکای ۋاتەنش: پنەۋازی بە ۋنەکۆڵای و پەیجۆری خێرای هەن جە کەمتەرغەمی و وەڵتر نەگێرتەی ڕاوجای ئەمنی جەلاو پۆلیس، ئاساییش و دەستگا ئەمنیەکانۋە. نامبریا سەرەڕاو ڕەخنەیش جە کەمتەرغەمیەکەی، بەڵێنش دان تا سەرجەم تاوانبارێ و هامکارەکێشان کە دەستشان جە کەردە تەرۆرسیەکان و ئەۋەتەقنایەکانەنە هەن دەستگیرێ و دادگایی بکریانە.

جە  ٢٠٠٩وە دەوڵەتو سریلانکای بەدەیان هەزار کەسێ تامیلیێش کۆمەڵکوشێ کەردێ، کەردە تەرۆرستیەکێ  و ئەۋەتەقنایەکێ یەک شەممەی ۋیەردەی هوناویتەرین ڤیەرێ ئا وڵاتەیەنێ.