جە کوردستان و تورکیا، هێزە سەرکوتکەرەکێ ڕژێمو تورکیای بەردەۋامێنێ جە ئەنجامدای ئۆپەڕاسیۆنو قڕکەردەی سیاسیی و دەستگیر و زیندانیکەردەی هەر کەسێ کە ڕەخنە جە ئەردۆغانی و ڕژێمەکەیش بگێرۆنە.

جەی چوارچێۋەنە، جە ۱۹و ئاداری ۋیەردەیەنە جە بورسا ۱۳ کەسێ دەستگیرێ کریێبێنێ. دمای ئانەیە دەستگیرکریێکێ بریێبێنێ دادگا، سزا زیندانیکەردەی پەی ٥ کەساشان بڕیاۋە کە نامەکێشان پی جۆرەنە: ڕەمەزان ئۆزدەمیر، قادر تەزکی، محەمەد شیپال، عومەر بۆزکورت و حامی بەجەریک.

ڕۆ ۳ شەممەی، جە ناوچەو ستەوری کە سەر بە پارێزگاو میردین-یەن، هێزە داگیرکەرەکێ تورکیای هۆرشانکۋان سەرو یانا و جە ئاکامشەنە  ۱۰ کەسێشان دەستگیرێ کەردێنێ کە ئینە نامێ ۹یشانێ: مەعسوم دەنکتاش، محەمەد دورماز، محەمەد زرار گیونەش، یڵماز سایدوت، ناجی ئەشیویۆک، زومەڕەد یڵدرم، حەنیقە ئویگار، یوسف سۆزەن، خالید جەیلان.

هاموەخت جە ئەستەنبوڵ هێزە ئەمنیەکێ تورکیای هۆرشانکۋان سەرو یانا و ژمارێۋی فرێ هاموڵاتیێ و موحەمەد زەکی ئادار هامسەرۆکو هەدەپە-و ناوچەو سوڵتانگازی-شان دەستگیرێ کەردێنێ. هاموڵاتییە دەستگیرکریێکێ نامەکێشان پی جۆرەنە: ڕدڤان سۆلا، جه‌نگیز سۆلا، مه‌ته‌ ئاشناش، محه‌مه‌د زه‌كی ئادار، موهاجیر ئیلهان، فاتیح ئه‌رگوون، ئایجان دالداگول و جیهان موتلوو.

هەرپاسە جە ئەنتالیا هێزە ئەمنیەکێ تورکیای، ٦ ئەندامێ پارتو شۆڕشگێڵ-یشان دەستگیرێ کەردێنێ و دادگا سزا زیندانیش پەی ۲یشان (گیول یاڵچین و موراد ئاکبابا) بڕیەنەۋە و ٤ ئەندامەکەی تەریچ گەشت پەی بەرو وڵاتیشان ۋنە قەدەغە کریان.

هەر هیزی یەرە شەممە، جە ناوچەو شاخی کە سەر بە پارێزگاو وان-یەن، هێزە داگیرکەرەکێ تورکیای هۆرشانکۋان سەرو ۳۷ یانا و ۱۱ کەسێشان دەستگیرێ کەردێنێ و بڕیارو دەستگیرکەردەیپی ۲٦ کەسێ تەریچ دریان. کەسە دەستگیرکریێکێ نامەکێشان بریتینێ جە: تاجدین بالکا، نیهاد بابور، عەتار ئەرتاش، فازل ئەڤریم، رەقیب بابور، حیکمەت تۆماک، ئۆزگیور ئۆرەک، عەبدی سەمۆ، مەران کاپلان، عەلی بوگە و ئیسکان تافور.