موستەفا قەرەسوو ئەندام جە کۆنسەو ڕاۋەبەری (کەجەکە - KCK)ی ڕۆچی مەردەی چوون چالاکی ۱٤و تەموزی بە مێژووییە بەنامێ مەکەرۆنە و ئاشکراش کەرد: "دلێگەو جەنگی تایبەتی کە ئاکەپە مەبەرۆنەش ڕاۋە سەبارەت بە دیدارو ڕێبەر ئۆجالانی گومانێ دروستێ مەکرۆنە.
موستەفا قەرەسوو ئەندام جە کۆنسەو ڕاۋەبەری کۆما جڤاکێن کوردستان (کەجەکە - KCK)ی، جە دیمانێۋەنە چەنی مەدیا خەبەر تیڤی سەبارەت بە گۆشەگیری ئیمرالی، مانگێرتەی دژ بە گۆشەگیریەکەی و گومان ۋستەی سەرو دیدارو ڕێبەر عەبدوڵا ئۆجالانی و هۆرخەڵەتنای ڕای گردیی هۆرسەنگنای گرنگش کەردەن و ۋاتەنش: "ئیمراڵی سیستماتیکانە و بە بەرنامە گۆشەگیری مەبریۆنەڕاۋە. جە ڕاستیەنە گۆشەگیری جە ئان و ساتو دەستگیرکەردەیشەۋە سەپیان سەرو ڕێبەر ئاپۆ-یەرە. گۆشەگیریەکە بازێ جارێ تونڎ کریان و بازێ جارێچ بەهۆو بارودۆخی سیاسی کەم کریانەۋە. بەڵام گۆشەگیری ئارۆی سەخت و دژۋارەن و ئانەیچ پەیوەستەن بە بارودۆخی سیاسی. هامتەریب چەنی گۆشەگیری پاکتاۋکەردەی و فشار سەپیان سەر و کوردی و دیموکراتیۋازەکێ تورکیایەرە".
قەرەسو بەردەۋام مەبۆنە و مەۋاچۆنە: "هاموەخت چەنی تونڎکەردەی گۆشەگیری، جە ۲۰۱٥/۰٤/۰٥ی جە کوردستان هێرشێ پاکتاۋکاریێ سەرتاسەریێ دەستشان پنەکەرد. لەیلا گۋڤەن-ـە بە زهنیەتی دیموکراتیی قوڵ دژ بە گۆشەگیریەکەی و هێرشەکان دەستش بە چالاکیی مانگێرتەی جەواردەی بێوادەی کەرد. چونکە لەیلا گۆشەگیری ئیمرالی چوون گۆشەگیرکەردەی سەرجەم کوردی و دیموکراسی مەۋینۆنە و پۆکەی دژش مدراۋە. دماتەر جە کوردستان و ئەورووپا و جیهان بە هەزاران کەسێ ئازادیۋازێ پەیۋەستێ مانگێرتەکەی بیێ. ئانێچە کۆمەڵگەی کوردیش دژ بە گۆشەگیری و فاشیزمی خرۆشنا. شونیشەرە مدرامان و چالاکیی ئەڎایان و ڕۆچی مەردەی ئوما و ئیتر گرد پێۋەرە بیێ بەفشاری فرە گەورە پەی سەرو دەسەڵاتداری ئاکەپەی و تەنگەتاۋشان کەرد".
کاراسو ئاشکراش کەرد: "ئاکەپە جە تەنگەتاۋیشەنە و ب ناچاری و پەی دەربازکەردەو وێش جە فشارەکان پارێزەرەکێ ڕێبەر ئاپۆ-یش کیاستێ ئیمرالی. سەرەتا کە پێسەو ۸ ساڵێ ۋیەردەی پارێزەکێ دۆزگەرشان بەسەر کەردەبێۋە، ڕاشان نەدێبێنێ سەردای ئیمرالی بکەرانە، بەڵام دماتەر جە ۲۰۱۹/۰٥/۰۱ دۆزگەر وێش تەلەفۆنش پەی کەردێبێنێ تا بشانە ئیمرالی و چەمشان بە ڕێبەر ئۆجالانی بگنۆنە. پارێزەێ شیێ ئیمرالی و دیدارشان ئەنجامدا و ئەنجامو دیدارەکەیشان پەی ڕای گردیی ئاشکرا کەرد. هەڵبەتە دیدار جە هەلومەرجو گۆشەگیریەنە ئەنجام دریا. پۆکەی زندانیێ دۆزو پەکەکەی و پاژکی ۋەڵاکریاشان دا و ۋاتشان؛ گۆشەگیری کۆتاییش نامان و درێژە بە مانگێرتەی جە ۋاردەی مدانە. شونیشەرە ڕۆچی مەردەی دەستش پنە کەرد کە ۳۰ زیندانیێ مانگێرێ بەشدارێشەنێ. هاموەخت ڕای گردی کوردی و تورکیای خاس مزانانە کە ئاکەپە جە سەروبەندو دووبارە هۆرۋچنای شارۋانی ئەستەنبوڵ-یەنە مۆڵەتش بە دیداری دا، تا جەی ڕاۋە ۋەڵێ هۆرۋچناکەی ۋێنا زەرەتاڵەکەو وێش شیرین نیشانە بدۆنە و ڕای گردیی هۆرخەڵەتنۆنە".
موستەفا قەرەسوو ئەندام جە کۆنسەو ڕاۋەبەری کۆما جڤاکێن کوردستان (کەجەکە - KCK)ی دەستنیشانش کەردەن: "ڕۆچی مەردەی چوون چالاکیی و ڕۆچێ ۱٤و تەموزی مێژووییەنە. مانگێرتەی و مانگێرەکێ و داۋاکاریەکەشان مافدارێ و ڕەۋێنێ و پەشتیۋانیشان ۋنە مەکەرمێنە. ڕێبەر ئاپۆ جە پەیامەکەشەنە بە ڕۆشنی باسش چانەیە کەردەن و بەڵام بە دیاری کریای باسش جە کۆتایی ئاۋردەی بە چالاکییەکەی نەکەردەن. جە حەقیقەتەنە ڕاست نییەن مرۆڤ چەمەڕاییۋی پی جۆرەشە ببۆنە کە ڕێبەر ئۆجالانی بانگەۋازیۋی پی جۆرە بکەرۆنە. ئامانج ئانەن تا گومان پەی دیدارەکەی دروست بکریۆنە. جە ڕاسیەنە مشیۆم بزانمێنە کە دلێگەو جەنگی تایبەتی کە ئاکەپە مەبەرۆنەش ڕاۋە سەبارەت بە دیدارو ڕێبەر ئۆجالانی گومانێ دروستێ مەکرۆنە و گەرەکشەن ڕای گردی لاڕارە ببەرۆنە، جەی چوارچێۋەنە مشیۆم گرد کەس و لایێ وریا و هەستیار بۆنە".
