جەی بارەۋە ئورمیلا بهۆلا (Urmila Bhoola) ڕاپۆرتەی تایبەت بە کۆیلایەتی سەر بە نەتەوە یۆگێرتەکان (ن.ی) ئاشکراش کەرد: "جە ئەنجامو ٦ ساڵێ کارکەردەی و پەیسەری پەیاپەی جە جیهانەنە پێم ئاشکرا بی کە پەی بنەبڕکەردەی کۆیلایەتی جە جیهانەنە هێشتای ڕێ دوورێ و درێژێ ئینێ ۋەردەمشەنە و پنەوازی بە کۆشای زیاتەری هەن".

بهۆلا ئۆمێدش واستە تا ۲۰۳۰ کۆیلایەتی بنەبڕ بکریۆنە و ۋاتەنش: "پەی یاوای بە ئانەیە پەنەوازی هەن ساڵانە ۱۰ هەزار کەسێ کە کۆیلێ کریێنۍ ڕزگارێ و ئازادێ بکریانەو ئانەیچە کار و کۆشای جددیش گەرەکەن".

ئورمیلا بهۆلا ڕاپۆرتەری تایبەت بە کۆیلایەتی سەر بە نەتەوە یۆگێرتەکان (ن.ی) جەی بارەۋە ڕاپۆرتێۋش دان بە لیژنەو مافەکانو مرۆڤی جە ژنێڤ و دلێشەنە ئاشکرا کریان: "٤٠ ملیۆنێ ئەرەنیشتێ جیهانی کۆیلایەتی بەشەشانە و جە بارودۆخی فرە سەختەنە ژیۋای مەبەرانۍ سەر کە  ٦٤% شان جە سێکتەرە تایبەتەکانە کاری زۆرەملێشان پنە مەکریۆنە و ٢٥% شان زارۆڵەدارێنێ. دلێ ژەنە کۆیلەکانە، ٩٨%شان ڕووبەڕوو توندوتیژی سێکسی بیێنێۋە".

هەر جە ڕاپۆرتەکەنە ئاماژە دریان بە: "ئەگەر هەن جە وڵاتە تازە پنەیاواکان و کەم پنەیاواکانە ٢٤ ملیۆن گەنجێ بە کۆیلێ بکریانە و پەی ئانەیە چنین چێۋێ ڕووە نەڎۆنە پنەوازی هەن ئا وڵاتێ کە  ئەندامێنێ جە نەتەوە یۆگێرتەکانە بەپەلە و خێرایی دژ بە کۆیلایەتیی گۆڕ بە کار و خەباتی بڎانە".

جەلایێ تەرەۋە، ڕێکۋزیێ پەیوەندیدارێ بە مافەکێ مرۆڤی و کۆیلایەتی باسشان جەئانەیە کەردەن: "جە جیهانەنە بە شێوازێ نۊینێ و مۆدێرنێ کۆیلایەتی پەرەش پنە مدریۆنە و زیاتەر جە ئانەیە کە جە ڕاپۆرتەکەو نەتەوە یۆگێرتەکانە ئومان کۆیلێ هەنێ و ساڵ بە ساڵ ژمارەشان زیاتەر مەبۆنە  و جە هەر هەزار کەسان یەکەس کۆیلەن".

ڕێکۋزیێ پەیوەندیدارێ بە گومانێنێ جە بنەبڕکەردەی کۆیلایەتی تا ۲۰۳۰ پا جۆرە کە نەتەوە یۆگێرتەکێ جە ڕاپۆرتەکەشەنە باسش کەردەن و دەستنیشانشان کەردەن: "مشیۆم جە بە شێۋازی سیستماتیک و کارا  و جددیانە کار پەی بنەبڕکەردەکەی بکریۆنە و بودجە و دارایی گەورەش پەی تەرخان بکریۆنە و یاسێ و قانونێ تازێش پەی مجیارە و هامکات هەڵمەتێۋە فراۋانە پەی هۆشیارکەردەی و پەرۋەردەکەدەی تاکی و کۆمەڵگەی جە سەرتاسەرو جیهانیەنە دەست پنەبکریۆنە و ئا کەسێ و لایەنێ کە بە سیستەماتیک کار پەی بە کۆیلەکەردەی مەکەرانێ بە قورسی سزا بدریانێ".

هاموەخت ئا ڕێکۋزیێ ئاماژەشان بە ئانەیە دان: "ژمارەو کۆیلەکان جە جیهانەنە فرە جە ئانەیە زیاتەرەن کە نەتەوە یۆگێرتەکێ باسش کەردەن، چونکە هیچ وڵاتێۋە ئامادە نییەن ئاماری ڕاست جەی  بارەۋە بڎۆنە". 

ئەرەمەزیێ و ڕێکۋزیاکێ مافەکانو مرۆڤی باس جە ئانەیە مەکەرانێ تا ئا یاگۍ کە زانیان، "نزیک بە ٥۰ ملیۆن کەسێ جە جیهانەنە کۆیلێ مۆدێرنێنێ و نیم ئانڎە زیاتەریچ مەتەرسی بە کۆیلەبییەشان. جە ئیسەنە نزیکە بە ٥% جە ئەرەنیشتێ جیهانی کۆیلێنێ و ڕەنگەن ئا ڕێژە پەی ۸%ی بەرز ببۆوە ئەگەر بە زوویی کار پەی بنەبڕکەردەی کۆیلایەتیی نەکریۆنە. چونکە جە چەند ساڵێ ۋیەردێنە ۳٥ ملیۆن کەسێ کۆیلێ بینێ و ئەی ساڵ پەی ٤٦ ملیۆنان ڕێژەکە بەرز بیەنەۋە".

هەمان ڕێکۋزیێ دەستنیشانشان کەردەن: "زیاتەر جە ۷۰%و کۆیلەکان ژەنی و کناچێنێ کەم تەمەنێنێ و هندستان بە زیاتەر جە ۱۸ ملیۆن کۆیلێ ڕیزبەندی یەکەمەنە یاگێش گێرتێنە و شۆنیشەرە چین، پاکستان و وڵاتە ئافریقایەکێ مەیانێ".

 کۆیلایەتیی مۆدێرن بریتییەن، جە کار و کردارێ کە کەسەکێ بە ئاۋەز و ئارەزوو وێشان و ئازادانە ئەنجامش نەڎانە، بەڵکو بە فشار و زۆرداری بسەپنیۆن سەرشارە و ئەنجامش بڎانە و جە ۋەرانۋەرشەنە هیچ هەقدەستێ هۆرنەگێرانێ و سەرجەم مافە ئانزانیەکێشان پاشێلێ بکریانۍ.