پلاتفۆرمو ھۆرام-ی جە پانیشتو کوردستانی بەبۆنەو ٣۱مین ساڵیادو جینۆسایدو ھەڵەبجەی  بەیاننامەش دان و دەستنیشانش کەردەن: "ھامشێوەو ھەڵەبجەی، جینۆسایدو گەلو کوردی بەردەواما و
دمای کیمیاواران و جینۆسایدو خەڵکو ھەڵەبجەی، تا ئیسەیچ تەرسی جە جینۆسایدکەردەی گەلو کوردی بەردەواما و دماییش نامان و تاوانەکاو ھامشێوەو ھەڵەبجەی بەشێوەی جیاواز جە یاگە جیاجیاکاو کوردستانی درێژەشا هەن".

بەیاننامەکە:

پلاتفۆرمو ھۆرام-ی جە پانیشتو کوردستانی جیا جە ئیدانە کردەو تاوانەکەی ھامخەمی وێش پەی کەسوکارو شەھیداو ھەڵەبجەی نیشانە مڎۆنە و ئاواتەوازا کە بریندارەکێ چەکو کیمیایی برینەکێشا ساڕێژێ  بباوە. ڕژێمو بەعسی بەشێوەی نائینسانانە و جە ماوەو چند دەقێویەنە پەنج ھەزار کەسێش شەھیدێ و بە ھەزاران کەسێش زامدارێ و ئاوارە کەردێ، ھەورامان و ھەورامییەکێچ چی تاوانەنە پشکێوە فرەشا وەرکەوتە و زیاتەر جە چند سەد کەسێ شەھید و سەدان زامدارێشان بێنێ و هەزاران کەسێشا ئاوارێ بییێ.
ئی تاوانە تەنیا تاوانو ڕژێمو بەعسیا نیا وەراموەرو گەلو کوردی ،چوون جە ویەردەنە تاوانێ پێسەو کۆمەڵکوشی و بێسەروبەر کەردەو کوردە فەیلییەکا، ئەنفال کەردەو ١٨٢ ھەزار کەسێ و زینە بەچاڵ کەردەیشا و چەنی کۆمەڵکوشکەردەو ھەشت ھەزار بارزانییێ ئەنجامێ دریێنێ.
دماو ٣١ ساڵێ جە تاوانو ھەڵەبجەی و تاوانەکاو تەری کە ملو گەلەکەیمارە ئامێنێ، ھەڵای دادگا نێودەوڵەتییەکانە بە جینۆساید نەشناسیان و ئینەیچ ناھەقیێوی گەورەن دژو خەڵکو ھەڵەبجەی و تەمامو گەلو کوردی. ئینەیچ پاسەش کەردەن کە تاوانێ پێسەو ھەڵەبجەی سەرو گەلەکەیمارە دووبارە بکریاوە.
ئێمە جە پلاتفۆرمو ھۆرام-ی داوا مەکەرمێ کە پنەوازی هن تا ھەرمانێ جدی بکریۆ پەی قەرەبوکەردەو کەسوکارو شەھیدا و ئاوەدان کەردەی ھەڵەبجەی و ھەورامانی و ھەوڵێ زیاتەریچ دریانە پەی ئێستەی و گێڵنای زاڕۆڵە گمبیەکێ ھەڵەبجەی و چارەسەر کەردەو زامداراو چەکو کیمیایی ھەڵەبجەی و ھەورامانی.
وەروئانەیە پێویستا گرد لایێوە بەتایبەت حکومەتو ھەرێمی چەنی تەمامو حزبە سیاسیەکا بەبێ جیاوازی فشار سەرو کۆمەڵگاو نێودەوڵەتی دروس بکەرا پەی بەجینۆساید ئەشناسای تاوانو ھەڵەبجەی و تەمامو تاواناکەو تەری کە دژو گەلەکەیما ئەنجامێ دریێنێ و تاوەکو چێوەلای تاوانێ ھام شێوەو ھەڵەبجەی سەرو گەلەکەیمارە نەیانێۋە.