جە ڤییەرێ گرنگەنە جە کەشە سەرکەشەکێ کوردستانی (هێزو پارێزنای جەوهەریی پانیشتو کوردستانی) بە بەیاننامێ ئەرەمەرزنایش ئاشکرا کریا.
جە بەیاننامەکەنە کە جەلاو یۆ جە فەرماندەکانو هێزی جەوهەریی ونیاۋە و ئاماژە دریان بە پەرەسەندەی بە (بە عەرەبکەردەی، تاڵانکەردەی، کوشتەی و ئەڕفانای هاموڵاتیان و سۆچنای خەلە و خەرمانی) جە ناوچە ئەرەبڕیێکێ کوردستانی وارینی. هاموەخت باس جە سیاسەتو ئەرەگێرتەی عوسمانی نۊی بە تایبەتی جە برادۆست و کەرکوک بە گردیی و جە کوردستان بە گردیی کریان کە چەند هێزێ و لایەنێ باشورو کوردستانی هامکارێ ئەرەگێرتەکەیەنی و هێزێ و لایەنێ تەرێچ سەبارەت ئەرەگێرتەکەی بێدەنگێ و بێهەڵۋێستێنێ و پەی جۆرە ڕەۋایەتیش پنە مڎانە.
جە بەیاننامەکەنە بەڵێن دریان: "هێزو پارێزنای جەوهەریی کوردستانی وارینی، سەرجەم بنکێ و بارەگێ سەربازیێ وسیخوڕیێ دوژمنە ئەرەگێرەکێ کوردستانی بکەرۆنە ئامانج"

تەمامی بەیاننامەکەی:

پەی ڕای گردی: 

دیارەن جە ئیسەنە وەرهۆرزی دلین بە گردیی و کوردستان بە تایبەتی ڕۆچانە فڕیایێ نۊینێ ڕووە مڎانە و جەنگێ و ململانێ هێزە هەرێمیێ و جیهانییەکان پەرەش سانان و قوڵێ بیێنێۋە. جەی بارودۆخەنە جە ناوچە ئەرەبڕیێکێ کوردستانی وارینی بەگردیی و کەرکوک بە تایبەتی هەڵمتێۋە (بە عەرەبکەردەی، تاڵانکەردەی، کوشتەی و ئەڕفانای هاموڵاتیان و سۆچنای خەلە و خەرمان)ی دەستش پنە کەردەن. هاموەخت ئەرەگێرتەی عوسمانی نۊی بە تایبەتی جە برادۆست و کەرکوک و بە گردیی جە کوردستان کەردەیی کریان کە چەند هێزێ و لایەنێ باشورو کوردستانی هامکارێ ئەرەگێرتەکەیەنی و هێزێ و لایەنێ تەرێچ سەبارەت ئەرەگێرتەکەی بێدەنگێ و بێهەڵۋێستێنێ و بۆشایی سیاسیی و سەربازی خوڵقنان و زەمینەشان پەی دوژمنی و ئەرەگێرتەکەی ئافڕنان و پەی جۆرە ڕەۋایەتیشان بە ئەرەگێرتەکەی دان.

جە هەمچنین بارودۆخێۋەنە ئێمە ژمارێۋ گەنجێ و جەوانێ پەی پەڕکەردەی بۆشاییەکەی و مدراۋە دژ بە دوژمنە ئەرەگێرەکێ کوردستانی و پەی پارێزنانی گەلی و وڵاتی و بەها، فەرهەنگ و دەستکەوەتەکێ پانیشتو کوردستانی و سەرجەم پێکئاما ئایینیێ و نەتەوەیەکێ وڵاتی بڕیامان دا بە ئەرەمەرزنای (هێزو پارێزنای جەوهەریی کوردستانی وارینی). چونکە دەستکەفەتکێمان بە هوون و ڕەنج و مانیای و گیانبەختکەردەی هەزاران هەزار ڕۆڵێ وڵاتی بەدی ئامێنێ و پارێزنایشان ئەرک و ۋەرپەرسیاری گەنج، ژەنێ، پیای و سەرجەم چینە جیا جیاکێ گلێرگەیەن.. 

پێسەو هێزی جەوهەریی ۋازیارێنمێ جە حکومەتەکێ بەغدادی و هەولێری ۋەراۋەر بە ئەرەگێرتە نۊینەکەی بێدەنگێ نەبانە و سەروەری ئێراقی و هەرێمو کوردستانی پارێزنانە. هاموەخت داواکارێنمێ جە هێزو پێشمەرگەی درێژەدەرێ ڕێبازو شەهید مامە ریشە، شەهید ئارام، لەیلا قاسم و تەمامی شەهێدێ تەرێ کوردستانی ببنانە و هامشانمان کوردستانی جە دوژمنی و ئەرەگێرتەی پارێزنانە. وازیارێنمێ جە پارتو دیموکراتو کوردستانی (پەدەکە-PDK) تا ئیتر ڕا پەی ئەرەگێرتەی تورکیای وەشە نەکەرۆنە و هەوڵ و تواناش پەی خزمەت بە گەلی و وڵاتی بوزۆنە کار نەک پەی خزمەتکەردەی دوژمنی ئەرەگێرەری.

ئێمە فەرماندێ و شەڕۋانێ جە (هێزو پارێزنای جەوهەریی کوردستانی وارینی) وازیارێنمێ جە تەمامی گەلی جە پانیشت بە تایبەتی ژەنێ و گەنجێ دژ بە ئەرەگرتەی هەڵۋێست نیشانە بڎانە و پەوەستێ هێزی جەوهەریی ببنانە. 

هێزو پارێزنای جەوهەریی کوردستانی وارینی چالاکی هێزەکەیشان جە زاخۆ دژ بە هێزە ئەرەگێرەکێ تورکیای بەیادئاۋردەن و چالاکییەکەش پێشکەش وخەڵات کەردەن بە ڕۆحو شەهیدانی و گەلو باشوری و بەڵێنش دان؛ "تا کۆتایی ئارۋردەی بە ئەرەگێرتەی ئەی جۆرە چالاکیێ جە پانتایی کوردستانی وارینی دژ بە بنکێ و بارەگا سەربازیی و سیخوڕیەکێ دوژمنی درێژەشان ببۆنە".

هێزو پارێزنای جەوهەریی

سڵام و ڕێزی شۆڕشگێڵی