سەرسەبای ئارۆ ۳ شەممەی، جە بەغدادی پایتەخت هەزاران هەوادارێ حزبوڵای و حەشدی شەعبی وەردەم بالیۆزخانەو ئەمەریکا-یەنە کۆبیێوە و دژ بە هێرشە ئاسمانیەکەو ئەمەریکای پەی سەرو حزبوڵای ئێراقی ناڕەزایەی جەمارەریشان نیشانەدا.
جەماوەری ناڕازی و توڕە ئێرشان نیا خاڵو پاسەوانی باڵیۆزخانەکەیەوە و هامکات دروشمێشان دژ بە ئەمەریکای واتێوە و داواشان جە دەسەڵاتداری ئەمەریکای کەرد تا ئێراقی بازۆنە جیا.

جە وەرانوەرەنە پاسەوانێ باڵیۆزخانەو ئەمەریکای بۆمبێ گازیێشان دژ بە حەشاماتەکەی بەکاربەردێ و جە ئاکامشەنە ۳٥ کەسێ بریندارێ بیێ.
مەهدی موهەندیس فەرماندەو گردیی حەشدی شەعبی، هادی عامری یاگەگیرش، قیس غزعەلی سەرۆکو عاسیب ئەهل ئەلحەقی و چەنڎین فەرماندێ حەشدی و وەرپەرسێ ئێراقیێ تەرێ بەشدارێ بیێنێ ناڕەزایەتیەکەی بێنێ.
 
جە ئیسەنە تا ملۆنە بارودۆخەکە ئاڵۆزتەر مەبۆنە و مەتەرسی هەن ئەگەر بە خێرایی چارەسەر نەکریۆنە دۆخەکە جە کۆنترۆڵ بەربشۆنە.
میدیاکێ ئێراقی وەڵاوشان کەردەوە کە  یاسین یاسری وەزیری دلین و  نەجاح شەمری وەزیرو وەرگیری ئێراقی پەی کۆنترۆڵکەردەی بارودۆخەکەی سەردای بالیۆزخانەو ئەمەریکاشان کەردەن و هەوڵشان دان جەماوەری ناڕازی ئارام بکەرانێوە.

جە کاروەدایێوەنە دۆناڵد ترەمپ سەرۆک کۆمارو ئەمەریکای جە تویتێوەنە هۆشداریش بە ئێرانی دا و تۆمەتبارش کەرد بە ئەنجامدای هێرشەکەی پەی سەرو بالیۆزخانەکەیشان جە بغداد و داواش جە حکومەتی ئێراقی کەرد، تا بالێۆزخانەکەیشان بپارێزنۆنە.

شەوەو یەک شەممەی ویەردەی وەزارەتو وەرگیری ئەمەریکای (پنتاگۆن) جە ئەرەیاونایێوەنە ئاشکراش کەردەبێ: "سەعات ۰۸:۰۰ بە وەختو ئێراقی جە شارچەو قائم-ی سەر بە پارێزگا ئەنباری باڵەپڕە جەنگییەکێ ئەمەریکای ۳ هێرشێشان کەردێنێ سەرو بنکێ و بارەگا لەشکریەکانو حزبوڵای ئێراقی. 
وەزارەتەکە هۆکارو ئەنجامدای هێرشەکەیش پێسەو وەڵامێوی پەی هێرشە چەکداریەکەی کە دژ بە سەربازگەو کەیوانی جە کەرکوک ئەنجام دریابێ بەنامێ کەردەنبێ کە جە ئاکامشەنە ۱ سەربازی ئەمەریکی کوشیا بێ.

سەبارەت بە زیانەکێ هێرشەکەی فەرماندەییحەشدی شەعبی ئێراقی ئاشکراش کەردەبێ: "جە ئاکامشەنە ۲٥ چەکدارێ حزبوڵای کوشیێنێ و زیاتەر جە ٥۰ی تەرێ بریندارێ بیێنێ".

سەرۆک وەزیرانی دەست جەکارکێشتە عادل عەبدولمەهدی جەمبەیاننامێوەنە هێرشەکەو ئەمەریکایش بە دوژمنکارانە و چەپەڵ بەنامێ کەردەبێ و پەی قوربانیەکان ۳ ڕووێ ماتەمینی سەرتاسەریش ئەرەیاونابێ.