پلاتفۆرموو هۆرام-ی بە بۆنەوە ٨مین ساڵیادو ئاخێز و سەرهۆردای وەرنیشتوو کوردستانی (ڕۆژئاوا)ی پەیامێش وەڵاوکەردەنەوە و جە میانشەنە ئاخێزەکەش بە ئاخێزو مرۆڤایەتی بەنامێ کەردەن کە وێ-باوەڕیش بە کوردی و گەلە بندەستەکان بەخاشانەوە.

تەمامی پەیامەکەو پلاتفۆرموو هۆرام-ی:

ئەرگەر چەمێ بخشنمێ ویەردەو کۆشیای و سەرهۆرداکانو گەل کوردیەرە پەیمان بەربگنۆ  کە هیچکام پێسەو ئاخێزوو ڕۆژئاواو کوردستانی نەتاوانشان ببانێ بە ئیرادە و باوەری پەی کوردی و هەر پاسە گەلە چێردەسەکان. ئاخێزوو ڕۆژئاوای بەنیشاندای شێوە جیاوازکان هەر جە وێڕاوەبەری و سیاسەتیەوە بگێرە تا پێوەرە ژیوای گەڵان، یەکسانی ژەنێ و پیای، گرنگیدای بە ژیوگەی، پارێزنای گرد شناسنامەکان بەبێ جیاوازی، مەتاوانش پەرسەو کوردی جە پەرسێ هەرێمی بکەرۆن بە پەرسێ جیهانییە.
هاموەخت ڕۆژئاوا جە ماوەو هەشی ساڵێ ویەردەێنە سەرەرا گردوو ئا هێرشا کە کریەنێ سەرش، بەمدرامان پارێزگاریش جە بەها ئینسانیەکانو وێش کەردەن. باور بییەی بەوێ ڕۆژئاواش جە بییەی بە ئەبزارێ جە دەسوو زڵهێزانە واڕا بە کارێکتەرێ هەرێمی و جیهانی کە حەسابی تایبەتس سەرۆ بکریۆن و کرێڵو فرەو فاڕیاکان جە وەرکەوتوو دڵێراسیەنە. پەوکەی سەرکەوتەو ڕۆژئاوای، چەنی وێش خاوری میانەی دیموکراتیک و ئازاد بونیاد منیۆنە.

پێسەو پلاتفۆرموو هۆرام-ی، جە ڕۆێ چوون ئارۆی (١٩ تەموز- جووڵای) سەرەڕاو موبارەکبایی ئی ڕوەیە جە گەلەکەیمان، خانەوادە و کەسوکارو گیانبەتکەرانو ڕاو ئازادی، زیندانیێ سیاسیێ، شەرڤانێ یەپەژە-ی و یەپەگە-ی، سەرجەم ئاکەسێ کە جە مدرامان و داستانە پەر جە قارەمانیەکانو گەلەکەیمانە گیانشان بەختکەرد یا بەشێ جە جەستەیشان پەی سەربەرزی ئێمە و نیشتمانی بەخشان، هژیارانە یادشان مەکەرمێوە و ڕەنجشان جە ویر نمەکەرمێ.
هەرپاسە جە ڕوێ پێسەو ئاڕۆینە پەیمانمان چەنی ئامانجە ئینسانیەکانو ئاخێزو ڕۆژئاوای دووبارە مەکەرمێوە و داوامان ئانەن، گەلەکەمان جە هەریاگێنە کە هەن تا سەرکەوتەی یەکجاری بە رۆحوو کۆبانێ، سەرێکانی و عەفرینەکان پاڵپەشتی جە ئاخێزوو ڕۆژئاوای بکەرۆنە. چونکە ڕۆژئاوا ئاخێزێن پەی مرۆڤایەتیی و ئا هێمانە کە وانەو مدرامانی و باوەڕ بەوێ-بیەیش جارێتەر بە گرد کوردێ بە تایبەت ئێمەی هۆرام-ی بەخشانەوە و بێگومان بە ڕێکوستەکەردەی و باوەڕ بەوێ-بییەی، سەرکەوتەی جە گرد ئاژێوەنە مسۆگەرا.