سیستمو ئەشکەنجە و گۆشەگیری ئیمرالی، کە ۲۰ ساڵێن دژ بە ڕێبەر عەبدوڵا ئۆجالانی پەیڕەو مەکریۆنە و ۳ ساڵێچەن سەختەر و دژواتەر بییەن، ڕۆچ بە ڕۆچ فراۋانەتەر مەبۆنە و جیا جە ڕێبەر ئۆجالانی، دەربازو خانەۋادەکەیش بییەن.
جەی چوارچێۋەنە داۋاکاری گردیی تورکیای جە شارو ڕحا (ئورفا)ی بڕیاشدا، شییەی پەی بەرو تورکیا جە فاتمە و مەمەد ئۆجالان (واڵە و براو ڕێبەر ئۆجالان)ی قەدەغە بکریۆنە و بە نامێۋە فەرمییە بڕیارەکە ئاڕاستەو هەر دۋی کریان.
هەرپاسە کوپیێ جە بڕیارەکەی کیانیان پەی ٦مین دادگەو سزای قورسی جە ڕحا و فەرمانش پنە کریان، ئەگەر فاتمە و مەمەد ئۆجالان بڕیارەکەی پاشێل بکەرانە ڕووبەڕوو سزاو زیندانی بکریاۋە.

جە دمایین دیدارشەنە جە ئیمرالی، ڕێبەرو گەلو کوردی عەبدوڵا ئۆجالان بە مەمەدی برایش واتەبێ: "تەنها من گۆشەگیر نەکریانا، بەڵکو شمە و گەل-یچ گۆشەگیرێ کریێندێ".

۳ ساڵێن ڕێبەر ئۆجالان جە دۋێ کوڵە دیدارێ زیاتەر، ئیتر چەمش بە خانەۋادەکەیش نەکەوتەن و جە تەمووزو ۲۰۱۱یچەۋە پارێزەکێش سەردایشان نەکەردەن و هەر جارەو بە بەهانێ بێبنەمێ و جیا جیێ چوون، "کەشتی ئیمرالی جە کارکەوتەن، ئاو و هەۋا نالەبارەن و باری نائاسایی" هەن، کاربەدەستێ تورکیای دیدارەکێ ڕێبەڕ ئۆجالانی ئاستەنگێ مەکەرانە.

جە کوردستان و ئەورووپا و جیهان، ئەشکەنجە و گۆشەگیری ئیمرالی، ناڕەزایەتی فرەش شۆنیەرە ئومان و بە پێشەنگی لەیلا گۋڤەن، هامسەرۆکەو کۆنگرەی جڤاکی دیموکراتیکی-کەجەدە و پارلەمانتارەو هەدەپەی، ۱۰۷ شەۋانە ڕۋێن مانگێرتەی جە واردەی بە شێۋازی بێوادە و نۆبەتی بە شداری سەدان کەسێ دەستش پنەکەردەن و درێژەش هەن. مانگێرەکێ سەرەڕاو تێکشییەی و خراب-بییەی تەندروستیشان، بەڵام سورێنێ جە بەردەۋامی دای بە مانگێرتەکەیشان، تا ئا کاتە بە تەمامی کۆتایی بە ئەشکەنجە و گۆشەگیری ئیمرالی مەیۆنە.