خدر خەباتی گیۋاۋشانسی هەورامانی، ئەرەنیشتەو دەگاو دەمەیەۋیٛ، دمای ٤ ساڵان جە کۆششی و پەیجۆری زانستیی تاۋاش جە گیۋاۋی دەرمانو چارەسەری نەوەشیەکێ "یەهەر-جگەری Fatty liver disease" درۆست بکەرۆنە.
خەبات خدری ئاشکراش کەردەن:  ٤ ساڵێن خەریکنا تا ئی دەرمانمە درۆست کەردەن و سەلەمنانم، گردو هازەو تەواناییم وستەن کار تا یاوانا بە وەرپیٛکێوە یاگەگیر، دەرمانەکە تەمام گیواوین و پەی چارسەرو نەوەشیەکاو یەهەری کەلکش هەن، پیٛسە: چەربی یەهەریFatty liver disease . هەوکەردەی یەهەری Hepatitis، نەوەشی سرهۆسس Cirrhosis ، جەهەرمان کەوتەی یەهەری Hepatic failure.

دروسکەرو دەرمانەکەی واتش پەی ئانەی بتاووٙ موٙڵەت بوازوٙ پەی ئەنەئاردەکەیش ئەوەجەش بە سی ملویٛن تمەنان، تا بتاو بڕیٛوە فرەیچ جە دەرمانەکەی بەرهەم باوەروٙن، ئیسەچ سەرقاڵو بەرئاوەردەو موٙڵەتین پەی وستەی بازاڕ و بەکار ئاوەردەی دەرمانەکەی، ڕەنگا ماوەو ساڵێنە موٙڵەتەکەش تەمامیوٙ. تا نامیٛ دەرمانەکەی سەلەمنو چەنی نامیٛ دروسکەرەکەیش وزو سەرو دەرمانەکەی(گەواهی نامە).

دریٛژەو قسەکاشنە واتش ئی دەرمانە پەی نەوەشی زەخمو گەڎیٛ فرە بەکەلکەن، شونیەرە واتش دەرمانێوە تەرم ئاردەنەنە و وەشم کەردەن کە پەی پیٛشەی کەلکش چەنە گیریوٙ، خەریک گەواهی نامەینا پەیش.

نەوەشی چەربی یەهەری تائیسە نمەزانیوٙ بە نونگەو چیٛشی سەر هوٙرمڎوٙنە و چارەسەرش چیٛشەن، هەرپاسە نەوەشی سرهوسسی یانە وردیلەکاو یەهەری شییٛ باوەو یانیٛ وردیلیٛ تەریٛ یاگیٛشا گیٛراوە، کەنمەتاوا هەرمانەو یەهەری بکەرانە، جەهەرمان کەوتەی یەهەری بە نونگەو نەوەشیا تەریوە یام نەوەشییٛ ویٛش، یەهەری، جەهەرمانە گنوٙ، نەوەشی هەوکەردەی یەهەری ئیٛڎیچ بە هورکارو ڤایرۆسی یام بەکتریای یام کرمیٛوە دروس بوٙنە.

یەهەر ئەندامێوە فرە چالاک و بەهازو ئانزانین، فرە مانیوٙ، بەشدارەن جە هەرس کەردەی واردەی و ئەوەفاڕای فرەو مادەکا کە جە واردەیۆ هوٙرگیریا، دلیٛ جگەرینە  فاڕیاو تاویاوە و شیکریاوە، تا لاشە کەلکشا چەنە بگیٛروٙ، وەرو ئانەی یەهەر ئەوەجەش بە پاریزنای هەن جە ڕاو دیاری کەردەی واردەکاماوە، بە تایبە دووریٛ بگنمیٛوە جە (الکهولی) ، کە شوٙنەمای خراپە منیوٙرە سەرو جگەریوە پەی توشبیەی بە نەوەشیەکان.

ناجح گوڵپی/هەورامان نێت