ڕێکوزیاو یانەو ژەنا هەورامانی جە درێژەو چالاکیێ و کۆشایشانە، جە شارو مەریوانی سەردای هونەرمەندی گۆرانۍواچ حەمەی هەورامی-ش کەرد. جە سەرداکەیەنە کە ژمارێوە جە ژنە ئەندامێ یانەکەی ئامادێ بێنێ،  تەندیس و خەڵات پێشکەش بە حمە هەورامی کریا ستاییش و ڕێزیچ جە کۆشای و مانیای هونەریش نریا.
هونەرمەندی گۆرانۍواچ حەمە وەشحاڵی وێش بە سەردای یانەو ژەناو هەورامانی بەروست و سپاسش کەردێ.

یانەو ژەنا هەورامانی سەرو تەندیسەکەیوە کە پێشکەشان بە حەمە هەورامی کەردەن بە ئی جۆرە ستاییشان کەردەن: 

بێشک هونەر جەوهەرو ئینسانیەن و هونەرمەندیچ جەوهەرو کۆمەڵگایەن. پەیامو هونەرمەندی، پارێزنای و ڕووەوستەی فەرهەنگ و ئەدەب و ڕەسانەیتی ئا مەحاڵیەنە کە چەنەش مژیڤۆ.  بەڕاسی شمەی ئازیز (حەمە هەورامی) بە واتەو گۆرانیە ڕەسەنەکا و درێژەدای بە فۆلکلۆروو هەورامانی ڕۆڵیوی وەرچەمتا بیەن پەی پارێزنای و گەشەو زوان و فەرهەنگوو هەورامانی و چی ڕانە ئەرکتا وستەن سەروو شانەو وێتا و یاونانتا سەرمەنزڵ و یۆ چا کەسایەتیە نامدٚاراندێ کە نەوەو دماڕۆی بە گۆشگێرتەی بە دەنگیتا باوەڕ و متمانەی فرەتەر کەروو بە قووڵایی ویەردەو وێش.
ئێمە پێسەو ئەرەمەرزیاو ژەناو هەورامانی ئاواتەوازوو سڵامەتی و لەش ساقی و بەردەوامیما هەن پەیت و بەشبەحاڵوو وێما دەس وەشیت چنە کەرمێ پەی زەحمەتەکات جە ڕاو گەشەو ترۆقی گۆرانیە فۆلکلۆرەکاو هەورامانی.

یاگێ ئاماژەیەنە، کە کاکە حەمە هەرامی  خەڵکو دەگاو (مازی بن)یەن و ساڵانێوی دوور و درێژەن جە بوارو گۆرانیێنە خزمەت بە هونەر و فەرهەنگو هەورامانی مەکەرۆنە و خاوەن سەدان گۆرانیێ و بەزمێ هۆرامیێ ڕەسەنێن و نام و نامبانگش سنور و هەورامانیش تەنانەوە و تەنانە دربازو ناوچە جاف شین و سۆرانی نیشینەکانیچ بیەن. حەمە هەورامی ماوێوەن تەندروستیش تێکشیەن و یاگەگیر بیەن و ئانێچە هۆرامیەکێ و هونەردۆستەکێش نیگەرانێ کەردێنی.