ڕێکوزیاو سی پی تی کە ڕێکوزیاێوی ئەمریکییا ئاخر ڕاپۆرتەشنە سەبارەت بە ئەرەگیرکارییەکاو دەوڵەتوو تورکی ئاماژەش پانەیە کەردەن؛ ئەوەڵڕۆو ئێساڵیوە ئا دەوڵەتە هەزار و ٧٦ هجوومێشا پەی سەروو پانیشتوو کوردستانی کەردێنێ، هەرپاسە زیاتەر جە ١٦٢ دەگایا چۆڵێ کریێنێ.
ڕاپۆرتەکێنە ئاماژە پانەیە کریان، جە ١٥ـو حوزەیرانوو ٢٠٢٤ینە، سوپای ئەرەگیرکەرەو تورکی دەسش کەردەن بە هجوومێوی سەروازیی تازەی دەوروو بەرواریی باڵاینە و شش دەگایاشنە ئۆپراسیۆنی سەروازییش کەردەن، هەرپاسە ٢٥ـو حوزەیرانینە، سوپاکێ بازگەی سەروازییش بەینوو دەگایەکاو بابیرێ و کانی بلاڤێنە مەرزنارە، ڕۆی دماتەرەنە ئا سوپا ئەرەگیرکەرێ دەسش کەرد بە وەشکەردەی حەوت بارەگایە سەروازییە تازا و ڕۆو ٢٧ـوو حوزەیرانینە، سەروازاو تورکی لوێ دلێ دەگاو دەرگەلێ موسا بەگی و ئەرن ئەرەنیشتێ دەگێکێشا ناچارێ کەردێنێ جیاش بازا.
حەر بەپاو ڕاپۆرتەکێ، چی لەشکرکێشییەنە دەوڵەتوو تورکی ٢٣٨ جارێ بۆردومان و هجوومش پەی سەروو خاکوو پانیشتوو کوردستانی دەس پەنە کەردەن، بۆنەو ئانەیچۆ زیاتەر جە ٢٠ هەزار دۆنما زەمینی کشتوکاڵی و دارستانێ ئا یاگا سۆتێنێ، تەنیا جە دەگاو سەرگەلێنە نزیکەو ٥٥٪ـو دارستانا و مێوە وباخوو هاموەڵاتە مەدەنییا سۆتەن.
ئاماژە پانەیچە کریان؛ بۆنەو هجوومە بەردەوامەکاو دەوڵەتوو تورکیوە ١٦٢ دەگێ پانیشتوو کوردستانینە چۆڵێ کریێنێ و زیاتەر جە ٦٠٢ دەگایا تەریچ ئینێ چێروو تەرسەو چۆڵبییەینە.
ئەرەنیشتاو دەگاو سەرگەلێ پەی سی پی تی پەشتڕاسشا کەردۆ، کە جە بەرەبەیانوو ٤ـوو تەمووزینە، هێزێوی سوپاو تورکیای بە نزیکەو (٤٥) زراپۆش و سەیارە سەروازییاوە لوێنێ دلێ دەگاکێشا و هێزەکە پەشتەو دەگاو سەرگەلێوە مەرزیێنێرە، ئەرەنیشتاو دەگێکێ تەرسەو ئانەیشا هەنە ئی هجوومە درێژە بکێشۆ و بۆ بایسوو ئاوارەبییەی دەگانشینا و چۆڵبییەی دەگایەکاشا.
ڕاپۆرتەکێ سی پی ت-ینە ئاماژەش پانەیە کریان، ئەوەڵوو کانوونوو دووەمیوە تا ئاخرو حوزەیرانوو ٢٠٢٤، دەوڵەتوو تورکی هەزار و ٧٦ هجوومێ و بۆردومانێش پەی سەروو پانیشتوو کوردستانی کەردێنێ، کە ٥٢٦ـێشا پەی سەروو پارێزگاو دهۆکی، ٤٠٥ پەی سەروو پارێزگاو هەولێری، ١٣٥ پەی سەروو پارێزگاو سلێمانی و ١٠شا پەی سەروو پارێزگاو نەینەوای بیێنێ، کە ٩٣٪ هجوومێ و بۆردومانەکێ بە فڕۆکەی جەنگی کریێنێ، ئینە وەختێونە ساڵەو ٢٠٢٣ سوپای ئەرەگیرکەرەو تورکی ١٥٤٨ هجوومێش پەی سەروو خاکوو پانیشتوو کوردستانی کەردێنێ.
ڕێکوزیاکە ڕاپۆرتەکێشەنە باسوو ئانەیشە کەردەن، سەرباروو گەشمەردەبییەی هەشت هاموەڵاتە مەدەنییا چی ساڵێنە، هجوومەکاو سوپاو تورکی چێرخانی ئابووری و یانە و باڵەیانێ مەدەنییشا بە ئامانج گێرتێنێ و زەرەرشا وەرکەوتەن، وێرەگاو ڕوەکاو ٤ و ٥ـی تەمووزینە، دووێ پارچە تۆپێ دلێ یانەکاو دەگاو گوهەرزێنە کەوتێرە واری و سەرباروو زەرەریاونای بە یاناو یەرێ هاموەڵاتە مەدەنییا، سەیارێوی هاموەڵاتێوەیچ زەرەرش وەرکەوت.
ڕاپۆرتەکێشا تیموو کوردستانوو عێراقوو سی پی تی ئانەیچش وستەن ڕووە: بە نیگەرانیێوی قووڵۆ جە دماین ئۆپەراسیۆنە سەروازییەکەو تورکیاینە و کاریگەرییەکاشنە پەی سەروو هاموەڵاتە مەدەنییا و سەروو یانەو دەگانشینا مدیەیمێ، ئەگەروو بەردەوامبییەی ئۆپەراسیۆنە سەروازییەکانە، تەرسیما جە ئاوارەبییەی سەدان بنەیانە مەدەنییا هەنە سنووروو شارەکڵەو ئامێدیینە.
