کەنەکە و یەکێتی پەرلەمانتارانو کوردستانی سەبارەت بە بارگرژی جە پانیشتو کوردستانی، بە بەشداری دەیان پارتێ و کەسایەتیێ هەر چواربەشێ کوردستانی، بە ئۆنلاین کۆنفڕانسی هامبەشان بەست و بەشێ ئەنجامنامەکەیش پەی ڕای گردی ئاشکرا کریا.
شەممە ڕێککەفتو (٢٠٢٠/١١/٢١)ی، کۆنگرەو نەتەوەیی کوردستانی (کەنەکە) و یەکێتی پەرلەمانتارانو کوردستانی سەبارەت بە ئا بارگرژیە کە جە پانیشتو کوردستانی ئومان ئاراوە، بە ئۆنلاین کۆنفڕانسی هامبەشان بە نامێ "ڕاوێژ پەی پەرەپەندای دیالۆگی دلێوێیی" بەست. جە کۆنفڕانسەکەنە سەرسەبای دەستش دەست پنەکەد و تا ئێوارەگا بەردەوام بی، نزیک بە ٢٠٠ نمایەندێ سەر بە پارتێ و لایەنێ سیاسیێ و مەدەنیێ و کەسایەتیێ سەربەوێ هەر چواربەشێ کوردستانی و کوردێ ئەرەنیشتێ ئەمەریکا، کەنەدا، وڵاتێ جیهانی عەرەبی، ئەورووپا، ئوسترالیا، ڕوسیای ئامادێ بیێ و وتارێ وێشان وانێوە.
جە کۆنفڕانسەکەنە، سەرجەم لایەنێ و کەسایەتیە بەشداربیەکێ جە وتارەکانشانە ئاژەو ئارۆ کوردستانی و ناوچەکەیشان شەی کەردەوە و مەتەرسیەکێشان وستێ وەرچەم و سوربییەی وێشان دژ بە ڕوونەڎای جەنگی کورد بەکوردی نیشانەدا و دیالۆگ و گفتوگۆ و یەکڕیزی و یەکێتی نەتەوەییشان بە ڕاچارە دەستنیشان کەرد و وازیارێ بێنێ سەرجەم لایەنەکێ پابەندێ ئا جۆرە جە چارەسەری ببانێ.
جە کۆتاییەنە کۆنفرانس چەنڎین خاڵێش پەی چارەسەری پەسەندێ کەردێ کە ئینێ گرنگتەرینێشانێ:
– دەستکەوتەکێ کوردستانی، دەستکەوتێ نەتەوەیێنێ و پنەوازەن بپارێزیانێ.
– جەنگی دلێوێیی (کورد بەکورد) خەتێ سورەنە و کۆنفڕانس دژشەن و سەرکۆنەش مەکەرۆن.
– هەر کێشێوی دلێوێیی، مەتەرسی گەورە چەنی وێش باوەرۆنە و جەنگی دلێوێیی جە بەرژەوەندی هیچ کەس و لایەنێوی نییەن و گرد لایێ زیامەندێ مەبانێ.
-- پنەوازەن کێشەکێ بە دیالۆگ و گفتوگۆ چارەسەرێ بکریانێ.
– کۆنفرانس پەشتیوانی جە هەر هەوڵێ پەی ئاشتی و چارەسەی مەکەرۆن و وازیارەن لایەنە سیاسیێ و مەدەنیەکێ و سەرجەم کەسایەتیێ گلێرگەی هەمان پەشتیوانی پەی ئاشتی نیشانە بڎانێ.
– کۆنفرانس داوا جە لایەنە سیاسییەکان مەکەرۆن جە هەنتری نزیکی ببانێوە و یەکێتی نەتەوەیی پێکباوەرانێ.
– داوا جە لایەنەکان مەکەرمێ جەنگی میدیای مدرنانێ.
– کۆنفرانسەکە داوا جە لایەنەکان مەکەرۆن، پەی پارێزنای دەستکەوەتەکان، پەیماننامەو شەرەفی ئیمزا بکەرانێ.
بڕیارەن جە زوتەرین وەختەنە کەنەکە و یەکێتی پارلەمانتارانو کوردستانی ئەنجامنامەو کۆنفەڕانسو "ڕاوێژ پەی پەرەپەندای دیالۆگی دلێوێیی" پەی ڕای گردینی ئاشکرا بکەرانێ.
