ئیدارەو وێڕاوەبەریی شەنگالی هۆشدارییش دا جە بانگەشە و هەڕەشاو بڕێو کەسا، کە هەمان عەقڵوو داعشیشا هەن و داواش جە حکوومەتوو عێراقی کەردە وەراوەروو ئەگەروو هجوومیوە پەی سەروو ئێزدییەکا، ڕاکارێ پەنەوازێ بگێرانە وەر.
ئیدارەو وێڕاوەبەریی دیموکراتیکوو شەنگالی سەبارەت بە هەڕەشە و بانگەشەو بڕێو کەسا پانیشتوو کوردسانینە، دژوو گلێرگەی ئێزدی بەیاننامێوەش وەڵا کەردۆ.
بەیاننامەکەنە ئەرەیاونیان، بۆنەو بانگەشە و قسە هەڕەشاوییاوە بەشێو جە پیا ئاینییا هەرێموو کوردسانینە، گلێرگەی ئێزدیی عێراقەنە ڕووبەڕووێ تەرسەو ئاستەنگی بیێوە، ئی دۆخە نیگەرانیی جیددیش سەروو ئارامی و ئاسایشیشاوە وەش مکەرۆ.
بەیاننامەکەنە ئامان، "مەبەست چا تۆمەت و هجووما ئانەنە کە مەنتێقەکە ئەمنیەتش نەمەنۆ، جەنگ بەینوو ئایین و نەتەوەکانە سەرە هوربدۆ، ئینەیچ تەرسێوی جیددییەنە پەی سەروو ئارامی و پێوەژیوای عێراقەنە."
ئینجا واوەی ئەرەیاونیان، کە بانگەشو هجوومەکێ قسێ گردوو کوردا نییەنێ، ئانە پیلانەو لایەنە تندڕەوانێ، کە گەرەکسانە مەنتێقەکەنە نائارامی بنیاوە، ئانەیچ وچیان ئیدارەو وێراوەبەریی دیموکراتیکوو شەنگالی پەی پارێزنای کەمینە ئایینییەکا، بەتایبەتی ئێزیدییەکا عێراقەنە، پەی مسۆگەرکەردەی مافوو ئازادیی ئاینی و پێوەژیوای شایسەی و شکۆمەندانەی ئینسانییا، پەوکای ئاماژەن پەی گرنگیی هامکاریی گردوو لایەنەکا.
وێراوەبەریی دیموکراتیکوو شەنگالی سەرنجەش پەی فشاروو سەروو ئێزدییەکا بەروستە ژەمپەکانە و واتش:" بۆنەو تەوقەو سەروو ئێزدییەکاوە لاو حکوومەتوو هەرێمیوە کەمپەکانە، ئێشێوە فرەشا پەنە میاوۆ و بێ وەرگێریی مەنێنیوە، وەراوەروو حەر جۆرە هجوومێوی تیرۆریستانە، چی دۆخە سەختە مرۆییەنە، پەنەوازا ئێزدییەکێ، کەمپەکانە بپارێزنیا و حکوومەتوو عێراقی پەی ئەوەگێڵایسا پەی شەنگالی بەسڵامەتی زووتەرین وەختەنە راکاری پەنەواز بگێرۆنە وەر.
درێژەو بەیاننامەکەینە، بە نامێ وێراوەبریی دیموکراتیکوو شەنگالیوە، داواو وەنەو حکوومەتوو عێراقی کریان، کە دمایی بە قسە ڕەقا و قینێ و هاندای بارۆ، ڕای خاسە بگێرۆنە وەر تا گرد لاێوە وەرپەرسانە مامەڵە بکەرا.
ئەرەیاونایەکەنە داوا کریان، کە دەروازەو فیشخابووری بکریۆوە و را بدریۆ بە ئێزدییەکا پەی ئەوەگێڵایشا پەی شەنگالی.
ئاخروو ئەرەیاونایەکەینە واوەی داوا ئاڕاستەو شەنگالییەکا کریێنە کەمپەکاو پانیشتوو کوردسانینە پەی ئەوەگێڵایشا پەی سەروو خاک و یانەو وێشا و وچیان؛" باوڕما چانەن کە حکوومەتوو عێراقی جە پارێزنای گەلوو ئێزدییمانە وەرپەرسیی وێشا بەیاگێ مارا و گردوو عێراقییەکا پەی ناستەی ئی قۆرتا و مسۆگەرکەردەی ئاشتی و ئارامی عێراقەنە هەرمانەکاشا مکەرا."
