بۆنەو بۆردومانیوە کۆچەرییەکاو برادۆستی کویسانەکا چۆڵ مکەرا
بۆنەو بۆردومانەکاو دەوڵەتوو تورکی ئەرەگیریوە پەی سەروو پانیشتوو کوردسانی، کۆچەرییەکاو هەرێموو برادۆستی کویسانەکا چۆڵ مکەرا.
بە پاو هەواڵیوی ئاژانسوو ڕۆژنیوزی کە زانیارییەکێش جە سەرچەمە وێمانەکاوە ورگێرتێنێ، بۆنەو بوردومانەکاو دەوڵەتوو تورکی ئەرەگیریوە سەروو پانیشتوو کوردسانی، کۆچەرییەکاو هەرێموو برادۆستوو هەولێری کویسانەکا چۆڵ مکەرا.
دیمەنەکاو ئا سەرچەمەینە بەرمگنۆ، کۆچەرییەکێ یانێ و دەوارەکاو وێشا مپێچانێوە و مەنتێقەکەی جیا مازا.
یاگێ واتەینە چەنی دەسپەنەکەردەی هجوومە ئەرەگیرکارییەکاو دەوڵەتوو تورکی، جگە جە چۆڵکەردەی بەزۆروو دەگا سنوورییەکاو پانیشتوو کوردسانی، تا ئیساتێ دەیان شوانێ و کۆچەرێ کویسانەکاو سنوورو هەولێری و دهۆکی گەشمەردێ و بریندارێ بیێ.
