'چالاکا هیلبۆرنی سەرمەشقایەتی پۍ هەڵمەتەکاو ئەڵمانیای کەرا'
هامسەرۆکوو کۆم-مەدی سەردای چالاکا مانگرتەی جە واردەی کە جە ١و شوباتیوە بە نۆرە بەردەوامە و ئەرەیاۋناش، "متاوو واچوو چالاکا مانگرتەکەو هیلبورنی سەرمەشقایەتی هەڵمەتەکاو ئەڵمانیای کەرا".
شاروو هیلبۆرنی ئەڵمانیاینە پەی ئازاڎیی جەسڎەیی رابەروو گەلوو کوردی عەبدوڵا ئۆجالانی و حەرپاسە پەشتیوانی جە چالاکی ئێشکگیریی داڎپەروەری کە جە کوردسان و تورکیانە ملۊڕاوە، جە ١و شوباتیوە مانگرتەی جە واردەی دەسشپنەکەردەن و تا ١٥و شوباتی بەردەوام بۆ.
چالاکیەکە جە ناوەنڎوو جەمەو دیموکراتیکی کوردی جە هیلبۆرن (نەجەدەکە) دەسشپنەکەرد، یەرۍ ڕووۍ جارۍ چالاکا نۆرە بڕۍ کەرا. ڕووانە چنڎین کەسۍ چالاکا کەراوە سەر.
هامسەرۆکوو کۆن-مەدی کەرەم گۆکیش سەردای چالاکاش کەرد و جە بارەو کاریگەری چالاکی مانگرتەی جە واردەی هیلبۆرنەنە سەروو کورداو ئەڵمانیای واتش، "پۍ وەڵێوستەی هەڵمەتەکۍ، متاو واچوو مانگرتەی کە واردەی هیلبۆرنەنە سەرمەشقی کەرۆ. چنی دەسپنەکەردەو ئی چالاکیە، ئەڵمانیانە جموجوڵ فرەتەر بیەن. متاو واچوو ئیتر ئەڵمانیا سەرمەشقایەتی جە هەڵمەتەکا ئەوروپای کەرۆ. جە مانهایم، جە کیل ڕاپیمای دەسشپنەکریان. حەرپاسە ئەڵمانیانە چنڎین ڕاپیمای و کۆبیەیۆ سازۍ کریا. جە بڕۍ شارانە یەرۍ جار کۆبیەیۆ سازکریان. حەرپاسە بڕۍ هەنگامۍ نمونەیۍ و ڕەمزیۍ نریێنۍ. ۋەروو ئانەی گەرەکما بە چالاکا چالاکی مانگرتەی واچوو، کە دەور و ۋەرپرسیاریێوە پی جۆرە جابەجێ کەرا".
