گەریلا سەرهەڵدان پێنجوێنە، کە دژوو هرووژمە ئەرەگیریەکا دەوڵەتو تورکی و داردەسەیی پەدەکەی بەشدارەو دلۍ ریزەکا گەریلای بیێنە، داواو هەمان هەڵوێسی جە جوانا پنیشتوو کورڎەسانی مکەرۆ.
گەریلا سەرهەڵدان پێنجوێنە کە دژوو هرووژمە ئەرەگیریەکا دەوڵەتو تورکی و داردەسەیی پەدەکەی جە پێنجوێنۆ بەشداریش جە ریزەکا گەریلاینە کەردەن، جە ۋەرا ۋەرو هرووژمە ۋەرفراوانەکانە دژوو پانیشتوو کورڎةسانی ناڕەزایی ۋێش بەربڕی و واتش، "دوژمنۍ باو و باپیراما جە قسۍ نمەیاوانە، مشۊم ئێمە بە چەک دژوو ئاڎیشا مڎرامان بکەرمۍ".
'ئی داردەسەیی و هرووژمۍ مایەو قبوڵکەردەی نیەنۍ'
گەریلا سەرهەڵدان پێنجوێنە ئانەش وست ڕووە، کە هامکاری پەدەکەی و سوپاو ئەرەگیرکەرو دەوڵەتو تورکی جە پانیشتوو کورڎەسانینە بەتایبەتی سەرو هەرێمەکاو بادینانی مایۍ قبوڵکەردەی نییا و واتش، "من پېسە جوانێوە پانیشتوو کورڎەسانی، پېسە کناچێوە و گەریلایۍ یەژاستاری ئا داردەسەیی و هامکارییەو پەدەکەی چنی سوپاو تورکی ئەرەگیری و دەوڵەتو تورکی فاشیستی قبوڵ نمەکەرو. بوو بە شایەتەو هەر دیمەنێوە جە بادینانەنە، زیاتەر توڕەییم پەی حەق ئەسایۆ فرەتەر مکەرۆ. جە ڕاو جەنگی ئەرەگیرکەری دەوڵەتو فاشیستی تورکی پەی سەرو کورڎەسانی و هامکاری و داردەسەیی پەدەکەی پەی ئا ئەرەگیریە، زیاتەر حەقەتینو پەدەکەی ئاشکرا بی. جەلایەنوو گرڎ کەسێوە وینیا کە پەدەکە پا هەڵوێساشە هێزی یووەما کە ڕا پەی سوپاو تورکی ئەرەگیری مکەرۊوە پەی ئەرەگیرکەردەی خاکو پانیشتی. چن ڕوۍ چێوەڵتەریچ دیما پێشمەرگێوە گەرەکش بۍ دەگاکۍ ۋێشەنە، دلۍ زەمینەکا ۋێشەنە، دلۍ خاکو ۋێشەنە بژیۋۆ، بەڵام جەلایەنو پەدەکەی داردەسی و سوپاو تورکی ئەرەگیریوە تیرۆرکریا، بۆردومانکریا و کەسێوەتەریچ چنیش گەشمەرڎەبی. ئا گەلەی سەرو ئی خاکیۆ مژیۋۆ خاوەنو ئی خاکەینۍ، ئاڎۍ مکریا مەرامو سوپاو تورکی ئەرەگیری. بەڵام مشۊم گرڎ کەسۍ ئی حەقەتینەیە بوینۆ ئانەی ڕا پەی سوپاو تورکی مکەرۊوە، پەدەکەن. مەراموو پەدەکەی و سوپاو تورکی ئەرەگیرکەری ئانەنە کە گەلوو پانیشتی جە خاکەکەیشانە بەربکەرا، یانە و مەنزڵشا تاڵان بکەر و دلېشانە بڎا".
'پەدەکە ۋنەو گەشمەرڎا بە زایە مڎۆ'
گەریلا سەرهەڵدان پێنجوێنە ئانەش وست ڕووە کە خاکو پانیشتوو کورڎەسانی بە قوربانیدایۍ فرۆ رزگارکریان و پی جۆرە بەردەوامە بیە: "بە هەزاران جوانۍ پەی کورڎەسانۍ ئازاڎی لوۍ چێرو خاکی و گەشمەرڎۍ بیۍ. مشۊم ئا حەقەتینە جە لایەنو جوانا پانیشتوو کورڎەسانیوە بوینیۆ و تنتەرین هەڵوێس بگېرانە ۋەر. گەشمەرڎۍ نەدریۍ پەی ئانەی دەوڵەتو تورکی بێ سەرو خاکو پانیشتی. سەرو هەر بستێوە خاکو کوردەسانیۆ گەشمەرڎۍ دریان، ئێمە ڕا بە ئەرەگیرا نمەڎەیمۍ".
'پەدەکە بەرەو کورڎەسانیش ڕووەو ئەرەگیری، قڕکاری و تاڵانکاریرە کەردەنۆ'
گەریلا سەرهەڵدان پێنجوێنە هۊرسەنگنایش پەی دەورو پەدەکەی چی جەنگە قڕکارییەنە کەرد و پی جۆرە دوا: " ساڵەکا ١٩٩٠ینە جە سەرنیشتوو کورڎەسانی دەگایەکۍ چۆڵێکریۍ و سۊچنێشا. گەلوو سەرنیشتی جە ماواو ۋێشانە کۆچبەرۍ کریۍ. کۆمکوژی فرە گۊرە سەرو گەلوو کوردیرە ئاما. ئانەی ئینەش کەرد دوژمنێوە بۍ، دوژمنوو کوردا بۍ. تورکی فاشیست بۍ. بەڵام ئێمە موینمۍ، جە ئارۆمانە هەمان شێواز جە لایەنو پارتێوە کە ماچۆ 'من کوردەنا' و چېرو نامۍ کوردایەتینە سیاسەت مکەرۆ و ڕاوەبەر مکریۆ. سەرو دەسو پارتێوە کوردی ڕا پەی ئەرەگیری ، قڕکاری و تاڵانکاری جە کورڎەسانەنە مکریۆوە. پەدەکە بە دەسی ۋێش کورڎەسانش رادەسوو دەوڵەتو تورکی فاشیستی کەردەن.
سەرهەڵدان پێنجوێنە ئاماژەش پانەیچ کەرد کە ئامێدی بیەن بە بارەگێوە سەرەکی سوپاو ئەرەگیرو تورکی و پی جۆرە درێژەش بە قسەکاشدا: "بەتایبەتی ئامێدی و بە گرڎیی هێڵەکۍ بادینانی و سنوورەکۍ عێراقی ئینۍ چێرو کۆنترۆڵو دەوڵەتوو تورکینە. گرڎ ڕوۍ سەرو ڕاو ئامێدینە گەڵابەکۍ کەلوپەل پەی سوپاو تورکی ئەرەگیری فاڕاوە. حەرپاسە پەدەکە هامکاری لۆجستی پەی سوپاو تورکی ئەرەگیری مەیسەر مکەرۆ. جە مەنتیقەکەنە ئاڵاکۍ پانیشتوو کورڎەسانی لا بریا و جیای ئاڎیشا ئاڵاو تورکیای هۊر مکریۆ. مشۊم کەس ۋەرا ۋەر پینەی بێدەنگ نەبۆ و هەڵوێس نیشانە بڎا. گەلوو پانیشتی بەتایبەتی جوانۍ مشۊم ئا ئاژەیە قبوڵ نەکەرا".
'دیسان کاتوو ئەرەپڕای و سەرهۊرداین'
سەرهەڵدان پێنجوێنە، ئەرەپڕای گەلوو پانیشتیش دژوو رژێموو بەعس یاڎ ئاوردۆ و واتش؛ "جە تاریخەنە پەی پارێزنای بیەی و ئشناسنامەو کوردبیەی وڵاتپارێزنا پانیشتوو کورڎەسانی دژوو رژێمو بەعسی ئەرەپڕێنۍ. هەرپێسە چنی ئا سەردەمە جوانۍ و گەلوو پانیشتی دژوو بەعسی ئەرەپڕایشا کەرد، مشۊم چی سەردەمەیچەنە هەمان هەڵوێس بگێرانە ۋەر. ۋەرو ئانەی ئاژەو ئیساتۍ چانەو ئا سەردەمیە جیاوازتەر نییا. پېسە کناچێوە پانیشتوو کورڎەسانی هەڵوێسوو ۋێم نیشانەدا و پەی پارێزگاریکەردەی جە وڵاتەکەیم تفەنگم کەرد شانەم. تەنیا بە بڕۍ قسۍ و ئەرەیاۋنۍ نمەتاومۍ ۋەر پی ئەرەگیریە بگێرمۍ. دوژمنی ئەرەگیرکەر جە زۋانی نەرمی نمەیاوۆنە. ڕاو چارەسەری و مردنای ئی ئەرەگیریە چەکا. مشۊم جوانۍ پانیشتی ئی ڕۍ بە بنەما بگێرا و رووە بکەرا ڕاو ئەرەکۊشای. مشۊم جوانۍ پانیشتی گەشمەرڎا ئەنفالی و هەرپاسە ئا گەشمەرڎۍ جە سلێمانینە جە دژوو پەدەکەی مردێوە جە یاڎ نەکەرا. خاوەنداری جە گەشمەرڎا خاکی پیرۆزی، ئەرکو جوانا پانیشتیا".
