ماوەو ٤١ مانگان هیچ زانیاریێوە دەربارەو ڕابەروو گەلوو کوردی عەبدوڵا ئۆجالانی نییەن، کە ٢٥ ساڵێن ئیمراڵینە زیندانی کریان. مافوو دیداریش چەنی بنەیانەی و پارێزنەرەکاش وەنە قەدەغە کریان. دەوڵەتوو تورکی جە پاشێلکەردەی یاسایەکاو دلێ و پەیمانە ئیمزاکریایە میاننەتەوەییەکانە  بەردەواما و درێژە بە سیستموو گۆشەگیریی ئیمراڵی مدۆ. پەوکای تا مێ ناڕەزایەتییەکێ ئاستوو دلێنە و میاننەتەوەیینە زیاتەرێ  با دژوو گۆشەگیری ئیمراڵی.

ماوێ چێوەڵتەر ٦١ کەسایەتی فەڕەنسیێ نامێوەشا ئاڕاستەو کۆمیتەو ڕاگێری جە ئەشکەنجەو ئەورووپای کەرد کە دژوو گۆشەگیریی ئیمرالی هەنگامە بگێرۆرە وەر. بارەو دۆخوو گۆشەگیریی ئیمراڵییوە ئەنداموو ئەنجومەنوو شارەوانی و سەرۆکی وەڵینوو ڕێکوزیاو چەنەویەردەی میاننەتەوەیی، جەنەڤیڤی گاریگۆس پەی ئاژانسوو هەواڵوو فورات (ANF)ی قسێش کەردێ.

گاریگۆس ئانەش دیاری کەرد، کیانای ئا نامەیە پەی سی پی تی ، ئانەنە کە گرد کەس دەربارەو دۆخوو ڕابەروو گەلوو کوردی عەبدوڵا ئۆجالانی هەنگامە بنیۆ و واتش:" سی پی تی پێسەو ئەنجوومەنوو ئەورووپای هەرمانەش ئانێنە بلۆ شۆنەو بارودۆخوو زیندانیکەردەی بەڕێز ئۆجالانیرە. پێسەو فەڕەنسییەکا داواو ئانەیما کەردێنە، کە مافوو چەمپەنەکەوتەی عەبدووڵا ئۆجالانی و زیندانییای تەروو ئیمراڵی فەراهەم بکریۆ. کە ماوەو زیاتەر جە یەرێ ساڵان ڕاگێریی جە دییەش بکریۆ. تا ئیساتێ نمەزانمێ  دۆخی تەندرووسیشا  خاسا یا نا، مەنەن یا نا. ئی  دۆخە سەرچەمەو نیگەرانییەکامانە، تورکیا کە ئەنداموو پەیمانەو مافەکاو ئینسانوو ئەورووپایا، بەڵام گردوو مافەکاو چەمپەنەکەوتەی زیندانییاو ئیمڕاڵی پاشێلێ مکەرۆ."

'گۆشەگیری تاوانێوەن دژوو ئینسانی '

گاریگۆسە ئاماژەش پانەیە دا،،گۆشەگیری پێسەو جۆرێوە جە ئەشکەنجەی قورسی، دژە ئینسانی و مامەڵەی خراپی پەسەند کریان و پێسە بەردەوامە بییە جە قسەکاش:"گۆشەگیرکەردەی ئینسانی، کەریگەریی خراپ سەروو تەندرووسی و دەروونوو ئینسانەکەیوە جیا مازۆ. دۆخوو ئیساتێ عەبدوڵڵا ئۆجالانی  نیشاندەروو دۆخێوی هەستیارین. گۆشەگیری پێسەو شێوازێوی ئەشکەنجەی ئاشکراو سزادای و هەقکەردەیوە مکریۆ. جگە چینەیە نیگەرانییەکێما زیادێ بیێنێ و ئانەنە نمەزانمی ئی کەسێ ئینێ زیندانەنە یان نا، مەنێنێ یان نا. زیندانیکەردەی ئۆجالانی و هامڕایاش تاوانێوا دژوو ئینسانی. ئی دۆخێ نیگەرانیبەخشێنێ و پەنەوازا ئیتر حکومەتوو تورکیای ئی ئینسانا چا بارودۆخەنە نازۆوە، دمایی پا دۆخیەی بارۆ. بەردەوامیدای پی دۆخییە بەروزوو ئانەیەنە ئیمراڵینە قۆرتێوی گەورە هەن،کە نیگەرانیی زیاتەر دماو وێشرە مارۆ. وەروو هەڵوێستوو تورکیای گەر نەتاومێ سی پی تی ناچار بکەرمێ ڕاپۆرتەو وێش پەی رای گردینی وەڵا بکەرۆوە، ئا وەختە داوا بکریۆ جە سی پی تی کە سەرێوی ئیمراڵی بدۆ. مافوو عەبدووڵا ئۆجالانی و زیندانییای تەرت بوزۆ چێروو پارێزنگاریوە و پەیوەندیی بە پارێزننەرا و  بنەیانەکاشاوە بسازنۆ."

'عەبدوڵا ئۆجالان پەی چارەسەروو پرسەو کوردی سەرکردێوی گرنگا'

گاریگۆسە سەرنجەش وستە سەروو گرنگیی دەوروو ڕابەروو گەلوو کوردی عەبدوڵڵا ئۆجالانی پەی پەرسەو کوردی و واتش:" پەی کوردا، بەڕێز ئۆجالان سەرکردێوی سیاسیی گرنگا. پەنەوازا بتاوۆ بەشداروو دایوسانایەکا بدۆ، پەی چارەسەروو پەرسەکاو کوردی. پەنەەوازا ئانەیچ بزانمێ کە خاکوو کوردا بەینوو چند وەڵاتانە پارچە کریان و پەوکای دۆخوو ئیساتێ پاسە شێویا و ئاڵۆزا، ئیساتێنە گەلوو کوردی یۆ چا گەلانە  کە دەوڵەتش نییەن،پەنەوازا ڕا بە یۆگێرتەیوەی خاکە پارچەکریایەکاش بدۆ و واوەی بۆوە بە یەک خاک. پەنەوازا ئینەیچ  بە ڕای دیپلۆماسییە و دایوسانای سیاسی بگنۆ وەڵێ و عەبدوڵا ۆجالانیچ بەشداروو ئی دایوسانایا بۆ، عەبدوڵا ئۆجالان سەرکردێوی چانەنە کە متاوۆ گەلوو کوردی بکەرۆوە بە یۆ."

'پەنەوازا عەبدوڵا ئۆجالان ئازاد بۆ'

گاریکۆسە واتش هەڵمەتەو ' ئازادیی پەی عەبدوڵڵا ئۆجالانی، چارسەری سیاسیی پەی پەرسەو کوردی' گرنگەنە و مشۆم بپارێزننیۆ و  واتش؛" داوا وەنەو ئەمریکای و وەڵاتاو ئەنداموو ئەنجوومەنوو ئەورووپای لای سەری گردیوە فەڕەنسای و بەلجیکیای مکەروو ، پەی وەردای عەبدوڵلا ئۆجالانی، گرد ڕاێوە بگێرانە وەر . کورد ئینا چێروو فشاری سەختوو حکومەتوو تورکیاینە، پەنەوازا دمایی پی بابەتەی بێ. تا یۆبییەێوی هەرێمی واوەی  بخولقنیۆ و ئاشتی بێ ئاراوە، پەنەوازا ددان بە مافەکاو کوردارە بنیۆ و گرنگییش پەنە بدریۆ."

جە بەردەوامیی قسەکاشەنە گۆریگۆسە سەرنجەش وستە سەروو هەڵوێستوو ئەنجوومەنوو ئەورووپای و وەڵاتاو ئەرووپای وەراوەروو یاساماڕایەکاو دەوڵەتوو تورکینە و واتش:"  بە سەبەبی جیۆپۆلیتیکی و ڕێککەوتەینامەکاو کۆچەرا، گرد وەختێوە چەمپۆشیی وەنەو تورکیای مکەرا، گەرەکمەن سەرنجو بوزوون سەروو چند بابەتیوی جە هورچنیەیە وێمانەکاو تورکیاینە، سیاسەتمەداراو کوردی چندین شارەوانیێشا بەدەس ئاردێ . ساڵەو ٢٠١٩ەوە وەرپەرسیی بڕێو جە ئەندام شارەوانییەکا هورگیریاوە و گیریێ، ئی دۆخە هەڵای بەردەواما. ئی فشارە دەربارەو هورچنیەی پەنەوازا بۆ بە هۆکارێوی تا نیگەرانییەکاو ئەنجوومەنوو ئەورووپای زیاتەرێ با. پیسەو ئەندامێوی ئەنجوومەنوو پاریسی، ئا ڕاکارێ کە حکوومەتوو تورکیای وەراوەرو نوێنەراو کوردیوە بە هەڕەشەکەردەی ، سزادای و زیندانیکەردەی مگێرۆشارە وەر فرە نیگەرانەنا."

'ئەوروپا  دووەڕووییانە دەربارەو پەکەی مجمۆوە'

گاریگۆسە ئاخرۆ باسوو ئانەیش کەرد مامەەلەو ئەروورپای وەراوەروو پەکەکەینە هۆکاروو زیاتەر ئاڵۆزبییەی دۆخوو هەرێمەکەین و واتش؛" لاو ئەرەمەرزیا نۆعاوە پیسەو 'ڕێکوزیاێوی تیرۆرستی' پەکەکەی موینا، وەلێ پەنەوازا ئانە ویر بوزیۆوە کە کورد وەرنیشتەنە جەنگوو دژوو داعشینە پێسەو پاڵەوامی تەماشە کریا، ئا وەختە کورد کە دژوو داعشی گژیێ، لاو ئەنجوومەنوو ئەورووپایوە پیسەو پاڵەوانێ تەماشە کریێ، کەچی وەختێ پەی پارێزنای مافەکاو وێش دژوو تورکیای مجەنگیۆ نامێش منیا تیرۆرست.  ئەورووپا نمەتاوۆ بەردەوام بۆ چی دووەڕوویەو وێش نمەبۆ قوربانیبییەی کەردی نەوینوو وەراوەروو دەسەڵاتوازیی تورکینە و دماییچ داوا وەنەو کوردی بکەرا دژوو داعشی جەنگ بکەرۆ، ئینە بەرش موزۆ کە ئورووپییەکێ و ئەنجوومەنوو ئەورووپای هەوڵیوێ خاسێشا نەدێنێ پەی پارێزنای کەردا و چا ڕووەوە قەرزارێ کوردینێ."