ئەرەنیشتا سەرنیشتوو وەرکەوتوو سووریای کە چنی هرووژمەکا دۆڵەتو تورکی و چەتەکاش وێشا یاونا بەنداو تشرینی پەی ئانەی ڕاگیری جە کارەساتێوە مرۆیی گێرانە. جە کۆنگرێوە ڕۆنامەوانینە واتشا: "تا دما نەفەس چنی هێزەکاما بیمێ و جە دژو هرووژمەکا مدرمێوە."
ڕێکوزیاو کۆنگرەو ستاری کانتۆنی فراتی کە هیزی چنی هەزارا کەسا بە ئامانجو پارێزناو بەنداو تشرینی لوێ هەرێمەکە، ئارۆ سەرو بەنداوەکەینە کۆنگرێوە ڕۆنامەوانیش ئەنجامدا.
ئەرەیاوناکەی بە ئامانجو ساڵڕۆو کۆمکووژی یوەمو پاریسی جە (٩و کانوونو دووەمی ٢٠١٣) و شەرمەزار کەردەو کۆمکووژییەکا دۆڵەتو تورکی ونریاوە. ئەرەیاوناکە جە لایەنو ئەندامو کوردیناسیۆنو کۆنگرەو ستاری فراتینە پەیمان عەلۆشێوە ونریاوە.
پەیمان عەلۆشە ئانەش یاڏ وستیمێ کە جە٩ و کانوونو دوووەمی جە پاریسو پایتەختو فەڕەنسای ٣ ژەنێ سەرمەشقێ (ساکینە جانسزە، فیدان دۆغانە، لەیلا شایلمەزە) گەشمەرڏێ کریێ و واتش: "ماوەو ١٢ ساڵا ویەردەن بەڵام تا ئیسە بکوژەکێ نەدریێنێ دادگا. هەڤاڵ ساکینە تەمامو ژیوایش سەرو هێڵەو ئەرەکۆشای و مڏرامانی پەی مرۆڤایەتی سەر بەرد. ئی ئەرەکۆشایە بی بە موڵکو مرۆڤایەتیی. ئەرەکۆشای ژەنا سەرمەشقی ئارۆ جە تەمامو وەرکەوتوو مییامینی و کوردەسان وەڵا بییەنۆ".
پەیمان عەلۆشە ئاماژەش پانەیە کەرد کە هەمان زیهنیەتو پیاسالاری، جە شارو سلۆپیو سەرنیشتوو کوردەسانی ٣ ژەنێ سەرمەشقێ (فاتمە ئویار، سێوە دەمیر و پاکیزە نایر)، دیسان پاریسەنە ئەمینە کارا (ئەڤین گۆیی)، میر پەروەر و عەبدولڕەحمان کزڵ بە دەسو میتو دۆڵەتو تورکی گەشمەرڏێ کریێ.
پەیمان باسش چانەیشە کەرد جە دەسپێکو شۆڕشو ١٩و ئابو (٢٠١٢)نە گەلا سەرنیشتوو وەرکەوتوو سووریای ڕووبەڕووو کۆمکووژی بیێنێ و واتش: "چیا دماییا گەلا هەرێمەکەی بە گرڏو پێکئاماکاشاوە ، پێسەو زاڕۆڵەی، ژەن هەتا تەمەندار پەی پارێزنا بەنداو تشرینی بە دروشمو 'خاک و ئاویما پارێزنتێ' چالاکشا ئەنجامدان. زیهنیەتو فاشیستی جارێوە تەر بۆمبوارانش کەرد و کۆمکووژیش ئەنجامدا".
پەیمان عەلۆشە هرووژم و کۆمکووژییەکێش بە تنی شەرمەزار کەردێ و واتش: "مڏرامانو ئارۆی جە بەنداو تشرینی و سردەو قەرەقۆزاقی ملۆڕاوە، ئەنجامو مڏرامانو ساڵانێوە فرەین. تاو خاکەکەیما پارێزنمێ و فاشیزم دلێنە بشۆ، پەنەوازا پاڵو هێزەکا پارێزناینە یاگێ گێرمێ، حەقەو گەشمەرڏەکاما بکەرمێوە".
ئەرەیاوناکەی بە دروشمو "ژەنی ژیوای ئازادی" دمایش ئاما.
