ژەنە چالاکەو بوارو ژیۋگەو سویدی گرێتا تونبێرگە کە ماوەو حەفتێوەن ئینا پانیشتوو کوردەسانینە، جە گەشتەکەشەنە ئا وێنۍ کە شارو وانینە گێرتێنێش سەرو پەلیانەو ۋێشۆ وەڵاشکەردێنێ و چنیش یاداشتێوەش نویستەن.

جە بەشێوە یاداشتەکەیشەنە تونبێرگە باسش چانەیە کەردەن جە گەشتەکەیشەنە چنی چنین کەسا قسێش کەردێنێ و باسش جە فشاری و ستەمو سیستەماتیکی کەردەن سەرشاوە، کە بەتایبەت جە لایەنو دۆڵەتو تورکی فاشیستی گیریانەرەوەر.

ئاماژەیچش پانەیە کەردەن گرد هجومێ ژیۋگەیی سەرو سروشتو سەرنیشتو کوردەسانی ملۆڕاوە و ئینەش نویستەن: "ئی هجومە کاولکارییەو سەرو سروشتی ڕاش وەردەمو کۆچکەردەو گلێرگە دلێینەییەکا و تێکدایی دۆڵەمەنی سروشتی مکەرۆوە."

'ئیدارەو وێڕاوەبەری پەنەوازیا'

حەر جە یاداشتەکەیشەنە تونبێرگە ئاماژەش بە پەنەوازی ئیدارەو وێڕاوەبەری پەی هەرێمە کوردییەکا کەردەن و نویستەنش: "مشۆم تورکیا مافو پێکئامایەکا بە دەستوری هەمیشەیی چەسپنۆنە. حکومەت پەی بێدەنگ کەردەو ئۆپۆزسیۆنی سیاسی 'تیرۆری' پێسەو پاساوێ بەکارمارۆنە. بە هەزاران سیاسەتمەدارێش بە بێ ئەنجامدای دادگایکەردەی دادپەروەرانەی وستێنێ دلۍ زینانی. ڕێکوزیێ و ئەرەمەزیێکێ مافو مرۆڤی ئی ڕێکارا تورکیایشا شەرمەزارۍ کەردۍ و داواو ئازاد کەردەی ئا کەساشا کەردەن".

'مشۆم هجومەکێ سەرو کوردەسانی مردانە'

پەی ئاشتیێ هەمیشەیی و دما ڕوێ دادپەروەرانەی، مشۆم ڕێز جە ماف و  ئازادی و سەربەخۆیی کوردا بگیریۆ و دمای بە هجومە سەختەکا سەرو کوردەسانی بەیانە. تا گرد کەسۍ ئازاد نەبۆ، حیچ کەسێ ئازاد نیا.

"بژیۋۆ کوردەسان".