گەریلاکاو هەپەگەی ئازاد تۆڵهەلدان و چەکدار سەرحەد سەبارەت بە ئاژەو جەنگی جە هەرێمەکاو پارێزنای مەدیاینە پەی ئاژانسوو هەواڵوو (ANF)ی قسێشا کەردۍ.

گەریلاو هەپەگەی ئازاد تۆڵهەلدان سەرنجش وست سەرو ئانەی کە گەریلا جە تاکیک و ستراتیجوو جەنگینە وەڵێکۊتەیۍ ۋەرچەمش بەدەسئاوردەن و واتش: "بە تایبەت ئا چالاکیۍ کە فەسڵوو زمسانینە ئەنجامدریۍ، ئێرش جە دڵوو ئەنقەرەی ۋەردا. گرڎ ڕووۍ ئانەما گنۆ گۆشۍ کە سەروازۍ سوپاو تورکی ۋێشا کوشا. ئی ئاژە وەرچەمامانە ڕووە مڎۆ. سوپاو تورکی ئەرەگیری، بە پەشتیوانی بنەیانەو بارزانی، چەتەکۍ ئەل نوسرەیشا ئاردێنۍ هەرێمەکاو پارێزنای مەدیای. ئی چەتۍ بە جل و بەرگوو سوپاو تورکیوە جە ۋەرا ۋەرو  ئێمەنە جەنگ مکەرا. گرڎ مەڕیێنۍ. پۊکەی نە سوپاو تورکی، نە گروپە چەتەکێش و نە هامکارا خیانەتکارەکێش نمەتاوا جە ۋەرا ۋەرو مڎرامانەکا ئێمەنە مردا. دەرونیەن سوپاو تورکی ۋەرا ۋەرو مڎرامانەکا ئێمەنە تێکشیەن. هەواڵوو وێکوشتەی فرەی مژنەومۍ. لەشکرێوە کە بەزۆر جەنگشا پنە کریۆ هیچ ڕێوەتەرشا نیا جگە جە وێکوشتەی. قسێوە هەنە ماچۆ 'هێلانۍ بازەکا پەی کاوەترا نمەبۆ'. ئی کەشۍ یانەو ئێمەنۍ. دوژمن هێز و دەبابێش ئاردێنۍ، بەڵام سەروەری و باڵادەسی هەرێمەکەی گرڎ کاتێ ئینا دەسوو گەریلاینە. هیچ کاتێ دەسبەردارۍ گورز شانای جە دوژمنی نمەبیێنمۍ و نمەبیمۍ. بە مەڵامەتوو مەڕەکاماوە دوژمن نمەتاوۆ جەنگوو ئێمە بکەرۆ، بڕۍ مەڕێما هەنۍ کە کیلۆمەترێ درێژێنۍ. دوژمن ۋێش ئانەش ئاشکرا کەردەن و ماچۆ؛ 'نمەتاومۍ ئی مەڕا گێرمۍ. ئی مەڕۍ بە کیلۆمەتر درێژێنۍ.' پېسە گەریلاکاو ئازاڎیی کورڎەسانی پەیلوایما چامنەن پا تاکیک و ستراتیجەی هەنما، ئی ئەرەکۊشایە میاونمۍ بە سەرکۆتەی."

هرووژمێوە ۋەرفراوان دژوو گەریلای هەن

هەر جە بارەو ئاژەو جەنگیوە گەریلاو هەپەگەی چەکدار سەرحەد باسش چانەیە کەرد سوپاو تورکی جە جەنگکەردەینە بەها مرۆڤایەتییەکا پاشێلۍ مکەرۆ و پی جۆرە بەردەوامیش بە قسەکاش دا: "جەنگێوە ۋەرفراوان هەن دژوو گەریلای. سوپاو تورکی چی جەنگەنە گرڎوو دەرفەتەکاش بەکاربەرۆ، گۆش بە هیچ ئەخلاق و یاسێوە جەنگی نمەڎۆ. گرڎ جۆرە چەکێوە کیمیاوی و قەڎەغەکریا بەکار بەرۆ. سەرەڕاو ئینیشایچ گرڎی نمەتاوۆ ۋەرا ۋەرو گەریلاین مردۆ. پۊکەی هەوڵمڎۆ گرڎوو هێزە هەرێمیەکا پەلکێشو ئی جەنگەیە بکەرۆ. بەڵام تا ئیساتۍ بنەیانەو بارزانی بیەن بە هامکار و کۆیلەش، بڕۍ وەختێچ حکومەتو عێراقی هامکاری دوژمنی مکەرۆ. سەرەڕاو گرڎوو هامکارییەکایچ دەوڵەتو تورکی نەتاوانش هیچ سەرکۊتەیۍ بەدەس بارۆ. جە گرڎ ڕووێوە ئینا شکسەنە."

جە بەردەوامی قسەکاشەنە گەریلا چەکدار زانیاری گرنگش وست ڕووە و سەرنجش وست سەرو ئا هەلیکۆپتەرە سکۆرسکیا کە وزیێنێرە واری و واتش: "سوپاو تورکی بە مەڵامەتوو زاڵبیەی و باڵادەسی گەریلایۆ ئینا ئاژێوە فرە خراپەنە. سوپاو تورکی گەرەکشا ١٠-١٥ ڕوۍ جارێ یاگۍ ئا هێزا فاڕۆنە. بەڵام بە مەڵامەتوو هرووژم و گەریلایۆ نمەتاوۆ ئا فاڕیایا بکەرۆ و گرڎوو سەروازا سوپۍ تەرسەو گەریلاینە ۋێشا کوشا و چەکەکاشا منیارە. ئینەیچ شڵەژیای سوپاو تورکی نیشانە مڎۆ. پی تێکشیەیشۆ هەوڵمڎۆ جەنگەکەی ۋەرفراوانتەربکەرۆ. پۊکەی گورزەی کوشندێش ۋنە شنیۆ. پا گورزا خاکەکەیما بە تەمامی جە دووژمنی پاک مکەرمێوە. ئی خاکە پیرۆزە بە ۋنەو گەشمەرڎا ئاوی دریان پۊکەی نمازمۍ دووژمن چی خاکەنە مەنۆوە. گەلەکەما ڕا پینەی نمەڎۆ. گەلوو پانیشتیچ ئینەی قبوڵنمەکەرۆ. جە گرڎوو پارچەکا کورڎەسانینە هەڵوێسی تن ۋەرا ۋەر بە دووژمنی نیشانە دریا."