میرزا ئەولقادری پاوەیی کورو میرزا موحەمەڎی کورو کێخوا جافری  شاعری نامی وگەورەو شارو پاوەیەن و یۆ جە پانزە نفرە شاعرە کلاسیکە کانەن جە ئەدەبیاتو گورانی جە عەسرو ناسرەدین شای قاجاری.

میرزائەولقاڎر جە وەڵاتو عوسمانی (شارەزور و هەڵەوجە و سلێمانی) ئەژانسیابیەن حەر پەوکەی فرە جە شاعرە نامییەکان جە دورو نزیک پێسە مەولەوی تاوگۆزی ئەژناسان و پێوەرە موشاعرەشان بیەن.

مەولەوی ئەوەڵ جار پەی دەرس وەنەی ئامەن پاوەو جە خزمەتو عولەماو قوزاتو پاوەینە فقە و علوم دینی وفارسیش وەنەن حەر چن مەولەوی بە سنعو سال جە میرزائەولقاڐری گەورەتەر بیەن.

پەی نمونەی ئی شعرێ ئەوەلین چەم پەنە کەوتەو بەینو مەولەوی و میرزا ئەولقاڐری بیەن جە پاوەنە کە مسرەعەو ئەولی مەولەوی مواچوش میرزائەولقاڐر گورج مسرەعەو دومی جواوش مەڐو وە.

هەنگەکەی روحم پەرواز کەردەوە

(ئاوارەش جە زولف لەیل ئاوەردە وە)

مەولەوی دیسان ئی مسرەعیچە مواچو میرزا ئەولقاڐر تەمامەش مەکەو

جەشیرینی مەیل ئەوجەمین پەڕگوڵ

(تیرە شانش دا نەکلورەی دڵ)

جا حەر پابونەوە فرە کەسی راشان کەوتێ بۆ پاوە لواینێ خزمەتو میرزا ئەولقاڐری چەمشا کەوتەن پەنەش و جە شعرو قسە وە شەکانو میرزائەولقاڐری بی بەشی نەوینێ،

پاسە مەگێڵنانێوە گوایا کەسێوە بە نامی سەعیڐئاغەی جافی فرە تاریفێ میرزائەولقاڐری مەژنەوو ماچو مەشیو بلو پەی پاوەی چەمم بگنو پەنەش سەعیڐئاغە مەگنو را مەی تا میاوو نزیکو پاوەی یاگێوە بە نامێ باوازامانی چەمش مەگنو  پیایوە ریش چەرمەی باریو قاترێ هیزمیش پە نە مەوان  مەپەرسو چەنەش ماچو و تو میرزا ئەولقاڐری مەژناسی،

پیا ریش چەرمەکەیچ  میرزا ئەولقاڐر وێش مەوو ماچو بەلی مەژناسوش ئەمن پیاو ئاڐیشانەنان وێش مەکەرو نەوکەرو یانەو میرزائەولقاڐری،

سەعیڐئاغە بە جافی پەنەش ماچو:

ئەگەر عاقلی عەقلت لەبیرە

مەلی مەلاندەر کامی وەشیرە

 

 

یانی کام پەلەوەر گواندارەن

میرزائەولقاڐریچ گورج  جواوش مەڐو وە ماچو :

کوردی بی ماوا بەری جە دەوران

پەنەت مواچو بەلەفزی گوران

پەڕش پڕپولەن چەمش مژمورەن

ئەگەر نمەزانی شەمشە لە کورەن

مواچان سەعیڐ ئاغە حەر چاگەنە

مەگیڵو وە  وەرو وێشەرە مواچو ئینە نەوکەرەکەشانەن پێسەنە واوەیلا بە حاڵو میرزائەولقاڐر ویش چەنی بو.

حەر چن سەعیڐ ئاغە دماتەر زەمەو میرزائەولقاڐری مە کەرو و نامێش بە خراو مە وەرو و میرزائەولقادریچ جە جواوشەنە هەجویاتیوەش پورە مواچو کە ئیسە ئا هەجویاتە مەوجودەن بەلام بە بونەو ڕەعایەت کەردەو ئەدەب وئخلاقی جە دیوانە چاپ کرایاکەو کاکە هادی سپەنجی و کاکە حمە رەشیڐی ئەمینیەنە چەمپوشیشان چەنە کریان و چاپێ نەوینێ.

عەدنان معازی

نەوروزو ۱۴۰۰کوچی روجیاری

وەرانوەر چەنی سالەو۲۹۲۱ ی گۆران
پاوە پرێس