گرووهو زۋان و فەرهەنگی هەورامی کە بە ”هەم ئەندیشی پاوە“ی ئەشناسیان، سەبارەت بە پاوە و هەوارمانی ٣٠ داواکاریێش ئاڕاستێ کاربەدەستانو ئێرانی کەردێ کە وانای و یاونەری بەزوانی هەورامی دوێشانێ.
جە بەردەوامی هەرمانێ و چالاکییەکانشانە، گرووهو زۋان و فەرهەنگی هەورامی کە بە ”هەم ئەندیشی پاوە“ی ئەشناسیان و دەیان ئەندامێش هەنێ، سەبارەت بە وەڵێ وستەی زۋان، فەرهەنگ، ئەدەبیات و چێربەنای ڕۆشنویری و فەرهەنگی و گەشتوگێڵی جە پاوە و هەوارمانەنە، ٣٠ داواکاریێش ئاڕاستێ کاربەدەستانو ئێرانی کەردێ کە گرنگتەرینێشان بە ئی جۆرەنێ:
دروستکەردەی هۆڵ یان ساڵۆنێوی مۆدێرن کە تایبەتمەندییە فەرهەنگیێ و ڕۆشنویریەکێش جەوێش گێرتێبانێ.
ناوەندێوی زانستی یان لقێوی دانشگاهی تایبەت بە ئەدەبیات، زوان، فەرهەنگ و دێرینەو هەورامانی جە پاوە دروست بکریۆن.
ناوەندێوی هەمیشەیی پەی ڕاوەبەردەی هەمامە، جەژنەوارە و کۆبیێ تایبەتێ بە فەرهەنگ و ئەدەبیاتی گەشتوگێڵی جە هەورامان دروست بکریۆن.
پاوە چوون، ناوەندو فەرهەنگی هەورامانی جەلاو لایەنە پەیوەندیدارەکانو ئێرانییەوە بەفەرمی تۆمار بکریۆنە.
ڕاوەبەریێوی تایبەت بمەرزیۆرە پەی بە بەخشای خەڵاتی و ڕێزگێرتەی جە کەسایەتییەکانو هەورامانی جە سەرجەم بوارەکانە.
میراث فرهنگی ئێرانی، یانەو شاعیر و هونەرمەندی کۆچکەردەی باقی شەفیعی بپارێزنۆنە و بەنامێ کۆچکەردەی بکەرۆنەش بە مۆزەخانە.
چالاککەردەی ئەنجومەنە فەرهەنگییەکێ پاوەی و هەورامانی.
یاگە تاریخیێ و فەرهەنگیکێ شارو نەوسوڎێ بازسازی بکریانێوە.
شوراکێ شار و شارچەکێ هەورامانی، نامێ هەورامیێ و تایبەتمەندێ بە هەورامانی بنیا جە (کۆجیێ، جادێ و مەیڎانێ و بلوارەکان) و جە پاوە مەیڎانێوی نو بەنامێ هەورامانی دروست بکریۆنە.
چەنڎین پارکێ و باخچێ بەشێوازی ستاندارد دروسێ بکریانێ.
جە گۆڕستانو پاوەی بەشێوی تایبەت بە هونەرمەدان دەستنیشان بکریۆنە.
ڕادوین و دەستگایێ یاونەریێ تایبەتێ بە زوانی هەورامی بمەرزیانێرە.
کۆبییەی هامبەشی ساڵانە ڕێکبوزیۆنە پەی ئەنجومەنە فەرهەنگیەکێ شارەکانو هەورامانی و شارە هەورامی نشینەکان چوون، پاوە، ڕەوانسەر، جوانرۆ، سەلاس، سەڵواوا، کامیران، مەریوان و سنەی.
سەرو بنەماو قانونی بنەڕەتی ئێرانی ماف بە وانای بە زوانی ئەڎایی، زوانی هەورامی جە ساڵێ ئایندەوە یانی ١٤٠١ی وەرەتاوی جە سەرجەم وانگا سەرەتاییەکانو هەورامانی و ناوچە هەورامی نییشنەکانە دەست پنە بکەرۆن.
دروستکەردەو مۆزەخانەی جە پاوە شاری.
دروستکەردەی پەیکەرێ پەی کەسایەتییەکانو هەورامانی چ ئانێشان کە کۆچشان کەردەن و چ ئانێچشان کە هیشتای مەژیوانێ.
دیاریکەردەی ڕوێوی جە ساڵنامەو ئێرانیەنە بەنامێ ڕۆو مللی هەورامانی.
ئەوەکەردەی لقو ئەرەمەرزیاو سینەماو ئێرانی جە هەورامان.
جە پاوە شار دروستکەردەی نماد (هێما)یێوی کە گوزارە بۆنە جە فەرهەنگ و دێرینەو هەورامانی. پەی نمونەی جە ئێران بروجەکێ ئازادی و میلادی و جە فەڕەنسا بورجو ئیفڵی و جە نیۆیۆرکو ئەمەریکای پیکەرو ئازادی هەنێ و بیێنێ بەهێما و سومبولێ ئا شارا.
هەوڵ بدریۆن بە همکاری گرد لایێوی زانستگایێوی تایبەت بە هەورامانی دروست بکریۆنە.
بە هامکاری ڕێکوزیا مەدەنییەکان، یۆ یان چەنڎ ڕوێ تایبەتێ دەستنیشانێ بکریانی پەی ئەنجامدای چالاکی مەدەنی، پەی نمونەی ڕۆو گیانبازی ٣ ژیوگەپارێزێ پاوەی کریۆنە یۆشان ببۆنە.
هەوڵ بدریۆنە پەی براندسازی و تۆمارکەردەی براندێ تایبەتێ بە هەورامانی،و وەڵێ وستەی پیشاسازی و گەشتوگێڵی جە هەورامانەنە.
دروستکەردەی ئەتڵەسێ جۆراوجۆرێ کە نامێ و زانیاریێ سەبارەت بە سەرجەم شارێ، شارچێ، دەگایێ، کەشێ، ڕڤارێ، هانێ، سەرچەمێ، دەرێ، دەشتێ، دۆڵێ، جوێ، دارستانێ، باغێ، هەوارێ، درەختێ، گیواۋێ، یاگە تاریخیەکێ بە زوانەکێ هەورامی و جافی (سۆرانی)، فارسی، ئینگلیزی و لاتینی.
ئامادەکەردەی کتێبە ئالبومێوی کە نامێ، وێنێ و زانیاریێ سەبارەت بە کەسایەتیەکانو هەورامانی جەوێش بگێرۆنە.
