ئاڵژین گیڤارا جە ساڵەو ١٩٩٧ ی حەلەبەنە جە ئەڎۍ بیە، جەلایەنو بنەیانەکەیشۆ بە نامۍ خوڎاوەنڎو زەنوبیایۆ نامۍ نریێنە. زەنوبیا یۆن جە خوڎاوەندەکا میزۆپۆتامیای و هێماو قەوەتی، پیرۆزی و ئازایەتی ژەنێن. ۋەرو ئانەی جە شارێوە کولتووری و تاریخی پېسە حەڵەبینە جە ئەڎۍ بیێنە ، جە ئەڎا بیەی و ژیۋایش کاریگەری فرەش سەر منیۆرە، هێماو زەنوبیای کاریگەری سەرو کەسایەتی و ژیۋای ئاڵژین گیڤارۍ منیۆرە. زەنوبیا بە جەنگاوەرێوە ئازا و نوێنەرەو بەهاکا ژەنێ ئشناسیێنە. هەرپاسە کەسایەتی ئاڵژینۍ بە ئازایەتی، سەربەخۆیی و زێڵۍ ئەرەکۊشای ئشناسیۍ.

ساڵەو ٢٠١١ کە پشێوییەکۍ سوریای دەسشا پنەکەرد، سەرەتاو خەباتی و فاڕیای دلۍ فرەو پێکئامایەکایچەنە دەسش پنەکەرد. چا ماوەنە ژەنی و جوانۍ چالاکانە دەسشا بە خەباتیکەرد. ئا وەختە ئاڵژین گیڤارا چالاکانە پەیوەنڎی بە یۆبیەی خۊنکارا کورڎەسانیوە مکەرۆ.

جە ساڵەکا ٢٠١٢ پەی ٢٠١٣ی، ئاڵژین گیڤارا سەرمەشقەو مڎرامانی بۍ جە گەڕەکەکا شێخ مەقسوودی و ئەشرەفیەینە جە حەڵەب. ئی دووە گەڕەکۍ، مېیانوو جمیەرەکا مڎرامانی بێنۍ. ئاڵژینە بە هەڵوێسە ئازایاکاش چی سەردەمەنە سەرنجوو گرڎ لێوەش لاو ۋێشەرە کێشت. بەشداریی جە مڎرامانە جەماوەری و کۆمەڵایەتیەکانە کەرۍ.

ئاڵژینە ساڵەو ٢٠١٤ گێڵۊوە پەی عەفرینی، جە کاتێنە کە ئەرەکۊشای پەی ڕزگاری ژەنا و یەکسانی جێندەری زیاتەر وەڵێکۊتەبۍ، ئەرکی تازەش گېرت ئەستۆ. عەفرین بی بە ڕەمزو مڎرامانی و ئاڵژینە کۊشش کەرد کە دەورو ۋێش چی مەنتیقەنە جە ئاستێوە بەرزەنە گێڵنۆ. بە پەروەردە جە ئەرەکۊشای سابۆتاژینە، ئەنجامێوە فرە عالش بەدەس ئاورد. جە تەماموو ئۆپەراسیۆنەکانە دەورێوە کاراس بۍ جە جەوهەرو مڎرامانوو عەفرینینە، ئاڵژینە جە ١و ئەیلولو ٢٠١٦ ینە گەشمەرڎۍ بییە.

ئامینە ڕەشید یوسف، ئەڎاو گەشمەرڎە ئاڵژینۍ، باسوو کناچەکێش (زەنوبیا ئەحمەد خلۆ)یش کەرد.

کەسێوە عالە و ۋەرپەرسە بۍ

ئامینە ڕەشید یوسف سەبارەت بە کناچەکێش ئاڵژین گیڤارۍ واتش: "ئاڵژینە چالاکە و زیڼۍ بۍ؛ بەڵام ئاڎە زاوڵێوە نەبۍ کە خەڵکی بێزار بکەرۆ یا ماننۆنە. ئاڵژینە واڵێوەش بۍ کە ساڵێوە جە ۋێش گۊرەتەرە بۍ. ساڵێ دماو یۊترینې بەشدارۍ ڕیزەکاو یەپەژەی بیۍ. ئاڎۍ پېسە دوانەی چامنۍ بێنۍ. قەڎ جە یۊترینی جیۍ نەبێنێوە، ئاڵژینە بە ۋەرپەرسانا تەماشەو چواردەورەکەیش کەرد. هەستیارە بۍ و دەوروبەرەکەش وەش سیۍ. گەرەکش نەبۍ ساتێوە ژیۋایش بەزایە بڎۆ. حەز بە پرسیارکەردەی و فێربیەی چێوی تازەی کەرۍ.

ئاڵژینە فرە دڵسۆزەو بنەیانەکەیش بۍ. من و تاتەش فرەما وەشەسیۍ. جە زاوڵەییشەنە فرە کۆمەڵایەتیە بۍ. تەنانەت لاو هامسایەکایچماوە وەشەسیۍ بۍ، فرە حەز بەپرسیارکەردەی زۆر جیاوازی کەرۍ.

ئەڎا ئامینۍ سەبارەڎ بە ۋەنای کناچەکێش ماچۆ: "ئاڎە خۊنکارێوە سەرکۊتۍ بۍ، مامۆساکێش وەششا سیۍ. ئەگەر ڕوۍ نەلێبیۍ پەی ۋەننگەی، هەمڕۍ و مامۆساکێش دەموودەس هەواڵس پەرسێنۍ. مامۆساکێش واچێنۍ زەنوبیا ئاینڎێوە زەریفش مبۆ. پاسە بۍ ئاڎە بە ڕاو حەقیقەتیرە لوا و جە دماینە جە ڕاو ئازاڎینە گەشمەرڎې بیە."

ئەڎا ئامینۍ ماچۆ بەردەوام گۆرانیۍ سەرو سەرۆکایەتیرە واچێوە، چا تەمەنە گەنجیەنە فرە دڵسۆزیش پەی سەرۆکایەتی بۍ. ئاوازەکێش بیۍ بە سەرچەمەو ژیۋای پەی ۋێش.

واتما لووە بە ڕاو ۋێت و بە دەسی ۋێت وەشش بکەرە

ئەڎا ئامینۍ باسش چانەیچ کەرد کە، ئاڵژینە جە ساڵەو ٢٠١١ پەی ماوەو مانگێوە لوا پەی پەروەردەو ۋێپارێزنای و دماتەر قەرارشدا پەیوەنڎی بە ئەرەکۊشای ڕزگاریوازی کورڎەسانیوە بکەرۆ، بە من و تاتەیش واتس گەرەکشا بلۆ خولۍ پەروەردەی و ڕائاوردەی. ئێمە ڕاما ۋنە نەگێرتە. بە دەسا ۋێم ئاماڎەکارییم پەی کەردە و کیاستەم. دماو مانگێوە جە پەروەردەی گێڵاوە. بەردەوام باسوو هەمڕاکاش کەرۍ. دماو ماوێوی قەرارش دا بەشداری ئەرەکۊشاو ئازاڎیی کورڎەسانی بکەرۆ. دیسان من و تاتەش ڕاما ۋنە نەگێرتە."ئێمە بە دەسا ۋێما ڕەوانێما کەردە."

ئەڎا ئامینۍ ماچۆ پەی ئەوەڵجاری دماو لوایش جە ٨و ئادارو ٢٠١١ ینە دییەم، وەختۍ دیەم فرە پەرۆشە بێنا و گرەوانی.  خوا و واتش مەگرەوە و هەڵسەکێش سەڕیانی. ئاڵژینە فرە فاڕیێبۍ، بیۍ بۍ بە خاوەن کەسایەتیێوە فرە جیاواز زیاتەر جە جارانی هەس بە ۋەرپرسیاریی کەرۍ، ئاڵژینە جە ١و تەمموزو ٢٠١٦ ینە گەشمەرڎۍ بیە بەڵام هەمیشە جە دڵو ئێمە و گرڎوو هەڤاڵا و گەلەکەیشەنە مەنێنۆو زینێنە و بەردەوام یاڎ و خیاڵەکاش بەرز مازمېوە."