گەریلا ئۆرهان لۆتۆس ئاماژەش پانەیە کەرد فەرماندە عەگید بە هەڵمەتۊ ١٥و ئابی قەرار و ڕاسپاردەکۍ ١٤و تەمموزیش پێکئارڎۍ و واتش: "بېگومان هەڵمەتۊ ١٥و ئابی جە وېشۆ ۋەشە نەبیە؛ بە ڕەنج و مڎرامانو ١٤و تەمموزی ئی پرۆسە دەسشپنەکەرد."
گەریلاکاو ئازاڎیی کورڎەسانی بە ئەنجامدای چالاکی کاریگەری پێشوازییشا جە ٤٠ـەمین ساڵوەگەڕو ئەرەکۊشای ١٥و ئابینە کەرد. چا بارۆ گەریلاو هەپەگەی ئۆرهان لۆتۆس سەرو ماناڎاری هەڵمەتەکێوە پەی ئاژانسیما قسێش کەردۍ و پا بۆنۆ گەشمەرڎۍ شۆڕشیش یاڎۍ کەردێوە.
جە سەرەتاو قسەکاشەنە ئۆرهان لۆتۆس ساڵیاڎو هەڵمەتەو ١٥و ئابیش جە گەریلاکاو ئازاڎیی کورڎةسانی پیرۆزەکەردە کە ئینۍ سەنگەرەکاو مڎرامانینە، جە کەسایەتی فەرماندەی گەورەینە فەرماندە عەگیدی گرڎوو گەشمەرڎاو شۆڕشیش یاڎۍ کەردێوە.
گەریلا ئۆرهان ئاماژەش پانەیە کەرد کە ڕاو هەڤاڵ عەگیدی بە هەڵمەتەو ١٥و ئابی قەرارەکۍ ١٤و تەمموزیش ئاردۍ ئاراوە و پی جۊرە باسش چا هەنگامە تاریخیۍ کەرد: "بێگومان هەڵمەتەو ١٥و ئابی جە ۋێشۆ وەشە نەبیە؛ بە ڕەنج و مڎرامانوو ١٤و تەمموزی ئی پرۆسە دەسش پنەکەرد. پی بۆنۆ جە کەسایەتی ۋێڕاگراو ١٤و تەمموزینە گرڎوو گەشمەرڎا مانگەو تەمموزی یاڎۍ مکەرمێوە. هەڵمەتەو ١٥و ئابی دەرنجاموو قەرار و راسپاردەکا ١٤و تەمموزی بۍ. پۊکەی فەرماندە عەگید ئی قەرارداریەشە هۊرگېرت و کەردش بە بناغەو ئەرەکۊشای."
'پەنەوازا جە ڕاسی هەڵمەتەو ١٥و ئابی بیاومێنە'
جە بەردەوامی قسەکاشەنەگەریلا ئۆرهان ئاماژەش پانەیە کەرد کە جە کاسایەتی ڕابەرایەتینە مڎرامانوو ئیمراڵی ماناڎار بیەن و واتش: "هامکات چنی مڎرامانوو ئیمراڵی ئی زېڵۍ جە زاپ، مەتینا، خواکوڕک و گارەنە بە قەرارداریوە ڕاوەبەر مکریۆ. ئینە حەقیانەتێوە تاریخین هەرچڼە باسش چۆوە بکەرمۍ هەڵای هەر کەما. هەڤاڵ عەگید بە هەڵمەتەو ١٥و ئابی ۋەرپرسیاریێوە تاریخیش گێڵنا و خاوەنداریش ۋنەکەرد. پۊکەی جە ئاژێوە فرە سەختەنە ئا هەڵمەتێشە پێکئاورڎە. پۊکەی پەنەوازا پېسە شۊنکۊتا فەرماندە عەگیدی فرە عال چی حەقەتینیە بیاومێنە. هامکات پەنەوازا گەلەکەمایچ جە گرڎ بوارێنە ئی حەقەتینەیە بکەرا بە بناغەو ژیۋایۆ."
هەڵمەتەو ١٥و ئابی گورزێوە جەرگبڕە بۍ جەدژمنی
گەریلا ئۆرهان باسش چانەیە کەرد چا کاتەنە کە دوژمن ۋێش جە قەوەتتەرین کاتەکاشەنە وینێوە هەڵمەتەو ١٥و ئابی ئاما ئاراوە و واتش: "هەڵمەتەو ١٥و ئابی تاریخێوە گۊرەش خوڵقنا. ئارۆیچەنە ئا مڎرامانە ۋەرفراوانەی کە کەشەکا کورڎةسانینە هەستش پنەمکریۆ. ئا ئەرەکۊشایەی جە مېڎانەکا برادۆست، بادینان و سەرنیشتوو کورڎەسانینە ڕاوەبەر مکریۆ ئەرەکۊشایۍ ئەفسانەین. گورزەی قورسە ۋنەو دژمنی مڎریۆ، هەڤاڵەکېما بە زېڵۍ تاریخو ١٥و ئابی ئەرەکۊشای مکەرا و میاوا بە کارەوانوو نەمرا. دەوڵەتو تورکی چی جەنگەنە ۋێش فرە بە گەورە موینۆ! بەڵام جە حەقیانەتەنە پاسە نیا و جە مېڎانەکا ئەرەکۊشاینە ئی حەقەتینە ڕۆشن بیەنۆ. پېسە ئانەی مائو ماچۆ؛ 'فاشیزم شێرێوە کارتۆنییا'. کەچی موینمۍ فاشیزمو تورکی پڵنگێوە کارتۆنیچ نیا. جە ۋەرا ۋەرو مڎرامانەکا گەریلاینە جە گرڎ ڕووێوە تەریق بیەنۆ."
گەریلا چارەنوویس و جەنگەکا یەکلایی مکەرۆوە
گەریلا ئۆرهان جە دمادمایی قسەکاشانە ئاماژەش بە مڎرامانی تاریخی گەریلای کەرد و واتش: "گەریلا چارەنوویس و جەنگەکەی یەکلایی مکەرۆوە. دوژمن ئینا شکسەنە. بەتایبەت جە هرووژمەکا سەرو هەرێمەکاو برادۆستی و بادینانینە تووشوو شکسی بۆ. ۋەروو ئانەی عەشیرەتو برادۆستی جە تاریخەنە نامێش ئامێتەو مڎرامانی بیەن، دژمنیچ پا هرووژماشە پەی سەرو هەرێموو برادۆستی گەرەکشا ئا حەقەتینەیە دلێنە بەرۆ، بەڵام ئەرەگیر پا شێوازا نمەتاوۆ بیاوۆ بە مەرام، چونکی راسی و حەقیقەتو ئێمە سەرو بنەماو ئا مڎرامانا ڕاوەبەر مکریۆ".
