پلاتفۆرموو هۆرامی جە ششەمین ساڵیادو ئەرەمەرزنایشنە کە هاموەختەن چەنی ڕۆو جیهانی زونی ئەڎایی، وازیارەن پەی پارێزنای زوان و فەرهەنگ و تایبەتمەندیەکێ هۆرامانی بڕیار پەی ئەرەمەرزنای ڕاوەبەری سەربەوێ هۆرامانی بدریۆنە.
بەیاننامەو ڕاوەبەری پلاتفۆرموو هۆرام-ی بە بۆنەو ٢١ فێبرێڤێری پسۆ ٦ مین ساڵڕۆو ئەڕەمەڕزنایرەو پلاتفۆرموو هۆرام-ی و ڕۆو زوانی ئەڎایی.
جە ٦ مین ساڵڕۆ ئەرەمەرزنایرەو پلاتفۆرموو هۆرام-ی کە هاموەختا چەنی رۆو جیهانی زوانوو ئەڎایی، جە ئاژێوەنە ژیومێ کە جیهان نزیکەو دوێ ساڵان بە گردی چەنی یۆتەر جە گرفتەکاو دەسوو سیستموو سەرمایەداری پسۆنەوەشی کرۆنای سەرقاڵ بییەن. جە لایەتەر بە بۆنەو خیانەتی، گەندەڵی و بێ هەڵوێستی بەشێ دیار جە لایانە کوردیەکاو پانیشتو کوردستانی، گەلەکەما کەوتەن دلێ ئاژێوی پەڕ جە زەحمەتی، بە جۆرێ کە سێبەرەو قەیرانە جیهانی و هەرێمیەکا ئاسەواروو وێشا سەروو خەبات و کۆشای گرد لایەرە قۆرس کەردەن. سەرەراو گرد و ئی گرفتا، خەتوو ئازادی گەلەکەیما بە ڕابەری بەرێز ئۆجالانی تاوانش جە گردو بەشەکا و لایانەکانە تەنیا هیوا و ئۆمێدێ بۆنە پەی یاوای بە ئازادی و مافەکاو گەلەکەیما. پلاتفۆرموو هۆرام-یچ پسۆ رێکوزیایە سەربەوێ جە چوارچێوەو سیاسەتەکاو کۆنگرەو دیمۆکراتیکی و ئازادو ڕۆژهەڵاتو کوردستانی- کۆدار و کۆما جڤاکێن کودستانی- کەجەکە کە ئەرەمەرزیێ سیستموو کۆنفدرالیسمی دیموکراتیکییەنێ، درێژە بە خەبات و کۆشای وێش مڎۆنە.
ڕۆو زوانی ئەدایی ، ڕۆ ئەرەمەرزنایرەو یۆهەمین رێکوزیای سیاسی، فەرهەنگی و کۆمەڵایەتی هەرێموو هۆرامانیا بە پێشەنگی و شکۆداری ژەنا و جوانا. هاموەخت بییەی ئی ڕوا پەێ ئیمەی هۆرامی، نیشانێ چڵاکیارەی و هەستکەردەیەن بە مەتەرسییە گەورە سەروو نەمەنەی و تاویایۆ بەشێ گرنگ جە شناس و تایبەتمەندیەکاو گەلەکەیما کە ئاڕۆ پسۆ هۆرامی و هۆرامانی ئەژناسیان. پەوچی پلاتفۆرموو هۆرام-ی پەێ پارێزناو بەشێ گرنگ جە زوان و تایبەتمەندی گەلەکەیما جە چوارچێوەو نەتەوەی دیموکراتیکینە پەێ رێکوستەی خەڵکوو هۆرامانی و بەدەسوستەو مافەکاشا بە تایبەتی پەی ئەرەمەڕزنایرەو سیستموو وێڕاوەبەری کە جەلاو خەڵکوو هەریمەکەیۆ بلۆڕاوە وێش رێکوستەن و خەبات مەکەرۆ.
دماجار پسۆ پااتفۆرموو هۆرام-ی سەرەڕاو مۆبارەکبایی کەردەی جە ششەمین ساڵرۆ ئەرەمەڕزنایڕەو پااتفۆرمەکەیما، ڕۆو زوانی ئەڎائیچ جە گەلەکەیما و بە تایبەت هۆرامانی مۆبارەکبایی مەکەرمێ. داواما ئانینە جە چالاکا، دڵسۆزا و وەڵاتپارێزا هۆرامانی جە چوارچێوەو نەتەوەی دیموکراتیکینە پەێ ئەرەمەرزنایرەو سیستمێ سەربەوێ کە ئامانجش پارێزناو شناس و زوان و تایبەتمەندیەکامانە وێشا رێکبوزا. بەداخەو سەرەراو بیەو داگیرکارێ پسۆ دەۆڵەتوو ئێرانی، نەبیەو ڕاوەبەریە وەڵاتپارێز و دیموکراتیک جە پانیشتوو کوردستانینە ئەرکوو ئێمەش جە هەر دوە بەشەکاو هۆرامانی قۆرستەر کەردەن. یاگێ وێشەنە سەرەراو ڕەخنە گێرتەی جە سیستموو ناوەندگەراو پانیشتی، خەلکوو هۆرامانی ڕۆو زوانی ئەڎایی بکەرا بە ڕۆو بەرزکەردەیۆ داواکاریەکاشا کە یۆشا وانای و نویستەیهن بە زوانی ئەڎائیی. بەنونگەو بیەو سیستموو داگیرکاری و دەسەڵاتوو نادیموکراتیکوو پانیشتوو کوردستانی، مەتەرسی فۆتای و نەمەنەی زوانوو هۆرامی، ئانەی جە گرد لایێ موازۆن تا گرد ڕوێ جە ژیوایما بکەرمێ بە ڕۆو زوانی ئەڎایی و داکۆکیکەردەی جە مافەکاما.
ڕاوەبەری پلاتفۆرموو هۆرام-ی
١٨-٢-٢٠٢١
