هەولێرنە دژوو ئەرەگیرکەریی دەوڵەتوو تورکی کۆبییەیوە کریا
وەردەموو مەڵبەندوو هەولێروو حزبوو شیوعیی کوردستانینە دژوو هجوومە ئەرەگیرکەرییەکاو دەوڵەتوو تورکی پەی سەروو خاکوو پانیشتوو کوردستانی کۆبییەیوەی ناڕەزایەتی کریا.
سەرباروو فشارەکاو پەدەکەی تا مێ ناڕەزایەتیی هاموەڵاتا پانیشتوو کوردستانینە دژوو ئەرەگیرکەریی دەوڵەتی تورکی زیاتەر مبۆنە، چا چوارچوەنە مەڵبەندوو هەولێروو حزبوو شیوعیی کوردستانی کۆبییەیۆێوەش کەرد.
کۆبییەیوەکەنە بەشدارێ بەتندی دژوو ئەرەگیرکەریی دەوڵەتوو تورکی ئەرەگیرکەری مردێوە و ڕەخنەی تندیچشا ئاراستەو بێدەنگیی لایەنە ڕسمییەکاو حکومەتوو هەرێمی وعێراقی کەرد.
حەر جە کۆبییەیوەکەینە بێدەنگی و بێهەڵوێستیی ڕێکوزیا میاننەتەوەییەکانە بەتایبەتی نەتەوە یۆگێرتەکێ وەراوەروو دەسدرێژی و ئەرەگیرکەریی دەوڵەتوو تورکی شەرمەزار کریا.
هیزیچ سنووروو قەزاو ئامێدیینە ژمارێوی فرە جە هاموەڵاتا دژوو ئەرەگیرکەرییەکاو دەوڵەتوو تورکی کۆبییەیوەیشا کەرد، بەڵام لاو هێزەکاو پەدەکەیوە بە زۆر بڵاوەشا پەنە کریا و چند ڕۆنامەنویسێوە دەسبەسەرکریێ، تا ڕاگێری جە فاڕایوە و ئرمانای ئا ناڕەزایەتییە بکریۆ.
