حیزبوو کۆمۆنیستی کرێکاریی کوردستانی هجوومێوی ئەرەگیرکاریی دەوڵەتی ئەرەگیرکەروو تورکی شەرمەزار مکەرۆ و ماچۆ: " لەشکرکێشیی دەوڵەتی فاشیستوو تورکیای یاگێ سەرکۆنە و ڕیسواکەردەینە لاو ئێمە و هەر ئینسانێوی ئازادیوازیوە!".
حیزبوو کۆمۆنیستی کرێکاریی کوردستانی ئەرەیاوناێوی نویسیانە هجوومی ئەرەگیرکاری دەوڵەتوو تورکی شەرمەزار مکەرۆ، ئەوەڵوو ئەرەیاونایەکەیەنە ماچۆ: " لەشکرکێشیی دەوڵەتی فاشیستوو تورکیای پەی سەرو خەڵکوو کوردستانی یاگێ سەرکۆنەی و ڕیسواکەردەینە لاو ئێمە و حەر ئینسانێوی ئازادیوازیوە!".
درێژەو ئەرەیاونایەکەینە ماچۆ: "ئۆپەراسیۆنی وەرفراوانی زەمینی و عاسمانی چند ڕوێ چێوەڵتەروو دەوڵەتی فاشیستوو تورکیای پەی دلێ قووڵایی شاروو دهۆكی و دەگایەکا و ئامایدلێوە و دەیان تانك و زرەپۆش و ھەزاران سەروازی سوپاو تورکیای و نیایرەی دەیان خاڵاو وشکنای و هاموشۆ زیادکەردەی بنکەی سەروازی، هاموەخت هجوومی عاسمانی بە درۆن و بۆردومانکەردەی مەنتێقە سنوورییەکاو ناچارکەردەی خەڵکوو مەنتێقەکەی بە کۆچکەردەی پاڵوو کەردەی هەرمانێ تیرۆریستیێ و تەقنایوەی سەیارا شارەکاو کوردستانینە، گۆشێوی تەر جە سیاسەتوو میلیتاریزمی و فراوانوازیی حکومەتە فاشیستەکەو ئۆردۆگانی نمایش مکەرۆ".
حیزبوو کۆمۆنیستی کرێکاریی کوردستانی ئەوەخوایش مکەرۆوە ئی سیاسەتە تەنیا کوشتەی و کاولکاری پەی خەڵکوو کوردستانی مارۆ و ماچۆ: "دەوڵەتی فاشیستی تورکیای یەرێ دەیێ ویەردەینە بە بەهانێ بییەی چەکداراو پارتوو کرێکاراو کوردستانی دەسش هیچ تاوانێوەش نەپارێزنان. تا ئیساتێ چندین دەگێش وێرانێ کەردێنێ و باخ و مێی و پووشش سۆچنان و دەیان هاموەڵاتێ بێتاوانێش بریندارێ کەردێنێ و کوشتێنێ، تەنانەت کەمپوو ئاوارەکاش کەردەن ئامانجوو فڕۆکە جەنگییەکاو وێش و خەڵکی بێتاوانش ورکێشتەن جە ونێ و بەردەوامیچ تەرسی و دڵەراوکێش کەردەن تارمایێوی کوشندە سەروو ژیوایشاوە".
ئەرەیاونایەکەنە ئاماژە پانەیە کریان ئی سیاسەتە هەوڵێوەن پەی پۆژنایرەی شکسوو دەسەڵاتوو ئەردۆگانی و کێشەکاو دلێ، هەرپاسە ڕەخنە جە بێدەنگیی ئەمریکای و دەسەڵاتداراو هەرێمی و حکومەتوو عێراقی مگێرۆ، ماچۆ: "ئی لایەنێ پەی یاوای بە بەرژەوەندییە سیاسییە چەپەڵەکاشا، ئامادێنێ سڵامەتیی گیانی و یانەیی و ئەمنیەت و ئاسایشی کۆمەڵایەتیی هاموەڵاتاو کوردستانی، بەبارمتە بگێرا و بوزانێش وەردەموو تەرسێوە".
حیزبوو کۆمۆنیستی کرێکاریی کوردستانی پاڵوو شەرمەزارکەردەی هجوومەکا، ئەمریکا و دەسەڵاتداراو هەرێمی و بەغدای موزا وەردەموو وەرپەرسیی وەراوەروو ئی هجووما پەی سەروو خەڵکوو کوردستانی، ماچۆ: "تەنیا بە خەباتی یۆگێرتانەو خەڵکوو ئازادیوازوو کوردستانی و مەنتێقەکەی، وەڵێشاوە کرێکارێ و ئازادیوازاو گلێرگەو تورکیای و ئاردەی مەیدانوو ناڕەزایەتێوی جەماوەری وەرفراوانی بە دژوو دەوڵەتی فاشیستی تورکیای، متاویۆ سنوورێوە پەی تاوانەکا و دەسدرێژی و پەلامارە سەروازییەکا بنریۆرە".
