جە ڕەزاونە جەژنەو کەشکەکی ملۆ ڕاوە. پا جۆرە جە قەڎیمیاوە‌ گێڵیانەوە ئی مەراسمە وەڵتەر بە مەلووڎی پەی ئەسحاب عەبدوللەی (زیارەتەکاو ڕەزاوێ، شەخسێ ئینا چاگە کە ماچا جە جەنگوو عەرەبەکا و جەنگاوەرەکاو ئێرانینە چەنی ئەسحابێوەتەری بە نامێ ئەسحاب یۆنسی شەهیدی بیێنێ و ئەسپەردە کریێنی)لوان ڕاوە. بە بۆنەو ئانەیە کە دەگاو ڕەزاوێ جە هامن و پاییزنە کەم ئاو بیەن ئی مەراسێمەشا بەردٚەن پەی چەمەهانێوە بە نامێ (هانە شێخەڵی) کە بە قۆربانی کەردەی گیاندارە ماڵیەکا (گاوە، مەی، بزە و... )چا یاگێنە گۆشتەکەشا تێکەڵ کەردٚەن و دلێ خەڵکینە بەنێسبەتێ بەرانبەر بەش کریان. بەڵام دماتەر ئی بۆنە ئەپی شێوە کەم‌ڕەنگ بی، ڕەوتوو  مەولوڎیش گێرت بە وێشەوە، جە مانگەو مەولوڎینە بریێ ڕاوە، جەژنەو کەشکەکیچ کە جە زمساننە ملۆ ڕاوە، خەڵک جە دەگانە جەمێ بیێنێ.

ئەچی ساڵاو دماییەنە جەژنەو کەشکەکی بە گەرمی و پێشوازی خەڵکوو دەگای و شاروو و دەگایەکاو دەوروو بەری ملۆ راوە. مەولوڎی مانگێ کە زووتەر بە بەخشایوەو گۆشتی لوێ ڕاوە ئێسە جە مزگینە بە بەخشایوەو شیرینی مەراسمی ئائینی گیریۆ. بەڵام مەولوڎی ئەسحابی ڤاریاوە و گێڵاوە، بە جەژنەو کەشکەکی.

جەژنەو کەشکەکی بە تەقەلاو خەڵکوو ڕەزاوێ جە دەگاو شارەکاو دەورووبەری ملۆ ڕاوە. خەڵک بە یارمەتی دای ماڵی بڕە پووڵ جەم کەراوە، پەی سانای گیاندارە سەرەبریاکێ و گەنمێ و ئا کەرەسا کە بە کار بریا. چەن روێ وەڵتەر بە شۆرتەیوەو گەنما و وشک بیەیوە پەی کوای گەنمەکا ئامادە کاری کریۆ. وەروو ئانەی گەنمێ کوا کە پۆسەکەشا جیا بۆوە تا جە دلێ کەشکەکەینە ڕینگە بڎۆوە وخاستەر هەزمە بۆ. قۆربانیەکە کریا و گۆشتەکە ئامەدە بی چەنی گەنمەکا ملۆ دلێ چەنەها قازانێ گەورێ کە زووتەر ئامادێشا کەردێنێ. وێرەگا وەخت ئاویرش پەی کریۆوە، منیاشا سەروو ئاویری کە بە هێزمێ کریانۆ. هەر کەس گەرەکش بۆ ملۆ پەی مەنایوەو ئاویرەکەی و شێونای کەشکەکەی دەوروو قازانەکانێ جەمێ باوە و یارمەتی مڎا. شێونای قازانەکا تا ساعەتەو یەرێ ساعبێ درێژەش هەن و چاودمای قازانەکا پۆژنارە و وزاشا خەفە تا یەرێ چوار ساعەتی تا ئامادە بۆ، کە ئامادەبی خەڵک جە فرەو یاگەکاو و دەگایاو دەورووبەری مەیا پەی بەردەی و واردەی کەشکەکی.