کەبەدەهە سەبارەت بە قەرارو سزاو جە قەنارەدای دۆڵەتو ئێرانی ئەرەیاۋنێوەش وەڵاکەردۆ و واتش: " پەی جە بەینبەردەی قەرارو جە قەنارەدای، دروشمەو 'ژەنی، ژیۋای ئازاڎی' بەرزبکەرمېوە و ڕا جە قەنارەدای بگېرمۍ. دەنگ و هېزما جە جاڎەکانە بەرزبکەرمېوە."
کۆنسەو گرڎیی تەڤگەرو شۆڕشگێڵنی یۆگێرتەو ژەنا (کەبەدەهە)ی جە دژوو قەرارەکا جە قەنارەدای دۆڵەتو ئێرانی ئەرەیاۋنێوە نویسیاش وەڵاکەردۆ و ئاماژەش پانەیەکەرد کە ڕژێمو ئاخوندەیی ئێرانی بە زیاکەردەی فشاری سەرو گلېرگەو ئێرانی مەتڵەبشا زېڵۍ مڎرامانوو گەلی بماڕۆ و ماچۆ: "ئا کەسۍ ۋەرا ۋەر بە ڕژێمی سەرەمەنامنارە و بە گیانوو ۋێشا قوربانی پەی ژیۋایۍ ئازاڎی و بە شکۆی مڎا، گیریانە."
هەر جە ئەرەیاۋناکەینە باس جە خەباتەکا شەریفە محمەدیۍ و پەخشان عەزیزیۍ مکەرۆ و ماچۆ: "ئامانجی هامبەششا دژو ڕژێمو ئاخونی کوێش کەردێوە. هەردووە ژەنە شۆڕشگێڵنۍ کە ویستوو ژیۋایۍ ئازاڎی و یەکسانیشا هەن، پەی ئی مەرامیچە دماو سەرهۊردایەکا ئێرانی ڕابەرایەتی مڎرامانێوە گۆرەیشا کەرد. هەردووە ژەنە شۆڕشگێڵنۍ گیریۍ و سزاو جە قەنارەدایشا سەرەرە سەپیا."
جە ئەرەیاۋناکەینە داواو ۋەرفراوانکەردەی ئەرەکۊشای مکەرۆ و ماچۆ: "پېسە چنی هێزو ۋێما دژو سیستەمو سەرمایەداری بە سەرداری پیای، ئەوەمەنڼەی و فاشیستی نیشانەدا، ئارۆیچەنە پەی جە بەینبەردەی سزاو جە قەنارەدای، جە گرڎ شۊنۍ جیهانینە بە دەنگو هێز و چالاکیەکما بە دروشمەو 'ژەنی، ژیۋای، ئازاڎی'یوە گلېرێبیمێوە و مجیەیمێرە جاڎۍ و کۆڵانەکا."
