شەۋێ ۋیەردی جە شارو هەڵەبجە-ی، جە شەۋەئاهەنگێۋە جەماۋەرییەنە، خەڵاتی زەڕین و هەر پاسە چنڎین خەڵاتۍ تەرۍ بەخشیێ بە پزشکی نامی هەورامانی و کوردستانی (د. تاهیر هەورامی) خەڵکو شارەکڵەو تەۋێڵۍ. خەڵاتەکۍ جەلاو ڕێکوزیاو یانەو سیاچەمانەی و بەهامکاری ڕاوەبەریی گردیی ڕۆشنویری و هونەرو هەڵەبجەی و چەنڎین ڕێکۋزیۍ و لایەنۍ و کەسایەتیاوە بەخشیێ بە نامبریا جە پاو ئاخزمەتە فرەیە کە ساڵانێوەن جە ڤیاور پزشکیی و تەندروستییەنە بە خەڵکو هەورامانی و کوردستانیش کەردەن.
جە شەوەئاهەنگەکەنە ژمارێو جە هاموڵاتیا و کەسایەتییەکاو هەڵەبجەی، هەورامانی و کوردستانی ئامادۍ بیۍ و جە میانشەنە هەر یۆ جە؛ سوبحان فەیرۆز، ڕاوەبەرو یانەو سیاچەمانەی و مامسا ئەیوب کوێخا ڕۆستەم، بەنامێ وەزارەتو ڕۆشنویری هەرێمی و مەڵبەندو ڕۆشنویری هەورامانی وتارێشا وانیێوە و جە میانشانە ستاییش و سپاسگوزاری وێشا و خەڵکیشا پێشکەش کەرد بە (د. تاهیر هەورامی) و هیواو سەرکەوتەیشا پەی وازا.
دماتەر،  (د. تاهیر هەورامی) وتارو وێش پیشکەش کەرد و سپاسو رێکوزاو شەوەئاهەنگەکەی و بەخشای خەڵاتەکاش کەرد و بەڵنیشدا تا ئانڎە کە تەمەن بوارش بڎۆنە خزمەتی زیاتەر بە خەڵکی بکەرۆنە.
شۆنیەرە، گۆرانیواچی گەنج و دەنگ وەش بۆکان هۆرامی و یاوەرە موزیسیەنەکێش بە چند گۆرانیۍ و پارچە موزیکۍ شەۋەکێشا زیاتەر ڕازناۋە.
جە دماییەنە یانەو سیاچەمانەی خەلاتی زەڕینش بەخشا بە د. تاهیری. هەرپاسە محەمەد فەتاح ڕاوەبەرو ڕۆشنویری پارێزگاو هەڵەبجە و چنڎین کەسۍ و لایەنۍ و ڕێکۋزیۍ تەرۍ خەڵاتۍ ڕێزگێرتەیشا بەخشیێ بە نامبریای.

سەرچەمە/ یانەو سیاچەمانەی

هـ. هـ